Tali atu ma le Alofa

Pe a faasoa atu e se tasi e latalata ia te oe a latou fesili po o atugaluga e uiga i le Ekalesia, o se mea masani le lagona o le atuatuvale po o le popole. Taumafai e tuuese nei lagona ma tali atu ma le agalelei ma le agaalofa. Atonu e te le malamalama atoa i le aafiaga o le isi tagata, ae e mafai ona e mulimuli i le faataitaiga a Iesu Keriso ma faaali atu i taimi uma le alofa.

O nisi taimi e faatuai ai e tagata ona faasoa mai o latou tauiviga ona latou te fefefe nei aveesea ai o latou sootaga ma i latou o e latalata ia i latou. Afai e aapa atu se tasi ia te oe, o loo latou sailia se lagolago. Tali atu ma le alofa, e tusa lava pe e te lē iloa se mea e fai pe tautala atu ai. Vaavaai mo ni auala e faaali atu ai le agaalofa ma le agalelei, e tusa lava pe latou te faia ni filifiliga e te le ioeina.

O nisi nei o mataupu faavae o le a fesoasoani ia te oe e faaali atu ai le alofa i tagata pe a latou faasoa atu a latou fesili ia te oe:

Tautala ma le alofa. Fesootai ma le lotomaualalo, agalelei, ma le faamaoni. O manatu faagaeetia ma matagofie e itiiti le aoga nai lo o le faaalia o le alofa faa-Keriso. Faailoa atu lou alofa faigofie, faamaoni, ma faifai pea. E pei ona faatonu mai e le Agaga, vaavaai mo le taimi sa’o ma le auala e tuuina atu ai ‟se mafuaaga o le faamoemoe o loo ia te oe.”¹
Auauna atu ia i latou i ni auala anoa. Saili ni auala e faaali atu ai lou alofa ma se faamautinoaga. Fesili atu ia i latou po o le a se mea latou te lagonaina ai lo latou tāua ma pe faapefea foi ona e lagolagoina i latou. Ona mafaufau lea pe mafai faapefea ona e faatinoina mea ua e aoaoina. O lau auaunaga o le a faamalosia ai au upu o le alofa ma o le a faamautinoa atu ai i le tagata e te alofa.
Faasao la outou sootaga. E sili atu ona taua le atiina a’e o se sootaga o le alofa ma le faatuatuaina nai loo le tuuina atu o ni tali vave. O se sini lelei atonu o le tau lava o le faaauau pea o le talanoaga. O le faatumauina o la outou sootaga a o tausia au feagaiga o le auala sili lea e faaauau ai ona i ai sau faatosinaga lelei.
Taumafai e vaai atu ia i latou e ala i fofoga o le Alii. Na aoao mai Elder Dale G. Renlund, ‟E le mafai ona tatou faataunuuina atoatoa a tatou matafaioi o le feagaiga e faanoanoa faatasi ma ē faanoanoa ma faamafanafana i ē o loo manaomia ona faamafanafanaina, sei vagana ua tatou vaai atu ia i latou e ala i fofoga o le Atua.”² O lau uo po o sē e pele o se atalii/afafine o le Atua e i ai sona gafatia faalelagi. O loo latou feagai ma tofotofoga na fai mai le Aposetolo o Peteru e tatau ona tatou faamoemoeina e ono tutupu i le olaga.³ Ua valaau atu Iesu Keriso i Ona soo ia alolofa atu i isi e pei ona Ia alofa ia i latou.⁴ Tatalo mo se vaaiga e vaai atu ai ia i latou e pei ona Ia faia.
Alofa ia i latou e aunoa ma se fetuunaiga. Pe a filifili se tasi tatou te alofa i ai e ese lona talitonuga nai lo tatou pe faia ni filifiliga tatou te le malamalama ai, e tatau ona tatou faaaloalogia la latou faitalia ma faaauau pea ona alolofa ia i latou. E mafai ona tatou faia lenei mea e aunoa ma le lafoa’ia o o tatou lava talitonuga loloto. Na aoao mai Peresitene M. Russell Ballard: ‟E mafai ona tatou alolofa o le tasi i le isi e aunoa ma le fetuuna’ia o manatu paia faaletagata lava ia. Ma e mafai ona tatou talanoa i na manatu e aunoa ma le ta’ufaatauvaaina o isi.”⁵

Mau autu: Faataoto 15:1; Ioane 13:34–35; Mataupu Faavae ma Feagaiga 52:16; 121:41–42