“O Le A Le Uiga o La Tatou Tala Pe a Tatou Fai Atu e Moni le Ekalesia?,” Liahona, Iuni 2024.
O Le A Le Uiga Pe a Tatou Fai Atu e Moni le Ekalesia?
Taitaia ai e le Faaola lava Ia, O Le Ekalesia a Iesu Keriso o le Au Paia o Aso e Gata Ai ua saunia ai aoaoga, pule o le perisitua, sauniga, ma feagaiga ia e taitai atu ai i tatou e toe foi atu i lo tatou aiga faalelagi.
E masani ona mafanafana o tatou loto pe a tatou faalogo i se tasi o molimau mai, “Ou te iloa e moni le Ekalesia.” O se mea taua le molimau mai o le Agaga i lena upumoni ia i tatou foi.
Ae e foliga mai o faiga faaleaganuu o i ai nei ua aumaia faatasi ai ma le salalau o le lē faatuatuaina o tauaofiaga lautele ae patino sili lava i faalapotopotoga faalelotu. I se faatusatusaga, ua osi feagaiga le Au Paia o Aso e Gata Ai e lagolagoina Le Ekalesia a Iesu Keriso o le Au Paia o Aso e Gata Ai i lana misiona faavae e fausia le malo o le Atua i le lalolagi ma faatuina Siona, i le tulimataiga fiafia uma o le Afio Mai Faalua o Iesu Keriso. O le faia o lena mea, tatou te iloa ai e na o le faatulagaga aloaia lava o le Ekalesia toefuataiina a le Alii e mafai ai ona faataunuuina na faamoemoega taua.
Ua manino le Feagaiga Fou e faapea i le taimi o Lana galuega i le olaga nei, sa le gata ina musuia e le Alii o Iesu Keriso se nuu o tagata talitonu ae sa faatulagaina foi Lana Ekalesia i taitai ua valaauina, aoaoina, ma faauuina (tagai Efeso 4:11–16). Sa taua le Ekalesia ia te Ia. O le Ekalesia i aso nei, e pei ona sa i ai, ua “atiina a’e i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20; tagai foi Mataio 16:17–18). Fai mai le Tusi Paia ina ua mavae Lona Toetu, “sa faaopoopo e le Alii i le ekalesia i aso fai soo o e uma e pei o le ua faaolaina” (Galuega 2:47).
Ae Faapefea Pe Afai e Le Atoatoa Taitai o le Ekalesia?
Atonu o nisi e faalotolotolua ona molimau atu i le moni o le Ekalesia ona ua latou lagona atonu e le atoatoa le Ekalesia ma ona taitai. E moni, e le atoatoa le Ekalesia po o ona taitai, pe sa latou fai mai foi latou te atoatoa! E taua faapea e le o maua i tusitusiga paia po o aoaoga a taitai o le Ekalesia se mea o loo ta’ua ai faapea o le faamoemoega o le Alii o le faaatoatoaina lea o le Ekalesia. Ae, na tusia e le Aposetolo o Paulo:
“Na ia tuuina mai foi nisi e fai ma aposetolo; o isi foi, e fai ma perofeta; o isi foi e folafola le tala lelei, o isi foi e fai ma leoleo atoa ma aoao;
“Ina ia faaatoatoaina ai le au paia, latou te fai ai le galuega a auauna, ia atiina ae ai le tino o Keriso:
“Seia tatou oo atu o i tatou uma lava ma le loto gatasi i le faatuatua ma le iloa lelei o le Alo o le Atua, ina ia fai ma tagata matua ia oo i le fua o le ua matua, e tatau ma le tumu o Keriso” (Efeso 4:11–13; faaopoopoina le faamamafa).
O le faamoemoega la o le Alii o le faaatoatoaina lea o le Au Paia, ae le o le faaatoatoaina o le Ekalesia. E mafai ona tatou maua le mafanafana moni mai lena mataupu faavae aua e ta’u mai ai o loo i ai se avanoa i le Ekalesia a le Alii mo i tatou uma o tagata e le atoatoa!
O le mea moni, i le konafesi aoao ia Oketopa 2013, na saunoa ai Elder Dieter F. Uchtdorf, a o fesoasoani Lua i le Au Peresitene Sili:
“Ma, ina ia faamaoni atoatoa, e i ai taimi e faia ai e tagata po o taitai i le Ekalesia ni mea sese, i se faaupuga faigofie. Atonu na i ai ni upu po o ni mea na faia ua le ogatusa ma o tatou tulaga faatauaina, mataupu faavae, po o le aoaoga faavae.
“Ou te manatu e na o le pau le mea e atoatoa ai le Ekalesia pe ana faapea e taitaia e ni tagata atoatoa. E atoatoa le Atua, ma e mama Lana aoaoga faavae. Ae e galue o Ia e ala ia i tatou—O Lana fanau le atoatoa—ma o tagata le atoatoa e faia mea sese. …
“O le mea e faanoanoa ai o nisi ua tautevateva ona o mea sese e faia e tagata. Ae e ui lava i lenei mea, o le upumoni e faavavau o le talalelei toefuataiina o loo maua i Le Ekalesia a Iesu Keriso o le Au Paia o Aso e Gata Ai e le faaleagaina, pe faaitiitia, pe faaumatiaina.
“I le avea ai ma se Aposetolo a le Alii o Iesu Keriso ma i le avea ai ma se tasi e vaai tino i aufono ma taualumaga a lenei Ekalesia, ou te tuu atu ai se molimau paia e leai se faaiuga taua o aafia ai lenei Ekalesia po o ona tagata ua faia e aunoa ma le naunautai i le sailiga o musumusuga, taiala, ma le faamaoniga a lo tatou Tama Faavavau. O le Ekalesia lenei a Iesu Keriso. O le a le faatagaina e le Atua Lana Ekalesia e see ese mai ona ala atofaina pe toilalo e faataunuu lona taunuuga paia.”1
O nisi taimi tatou te puipuia ai se manatu e uiga i le ala e taulima ai e le Alii ia taitai ma tagata o Lana Ekalesia e le auauna lelei mo i tatou. Atonu tatou te faamoemoe e tatau i le Alii ona pulea mea uma e faia e taitai ma pulega o le Ekalesia ina ia leai se mea sese e mafai ona faia. Atonu e sili atu le iloa e faapea e tuuina mai e le Alii le taitaiga i na auauna a o latou faia ma le agaga tatalo le mea sili latou te mafaia i o latou lava valaauga e taitaia Lana galuega. O le auala lena e aoao ai e matua agaalofa a latou fanau.
E tuuina mai e le Alii ia i tatou le taitaiga ae e le masani ona faatinoina le puleaina, sei vagana ai i mataupu e fitoitonu lava i lo tatou faaolataga. Ua toe faapea atu foi, e le o Lona faamoemoega le faaatoatoaina o le Ekalesia ae ia faaatoatoa Lana fanau, e aofia ai taitai ma au pulega o le Ekalesia. O lenei mamanu o faatinoga musuia i le laumua o le Ekalesia e le matua ese lava mai lea e faaaoga i siteki ma uarota ma aiga.
E ui e tuuina mai e le Alii faaaliga tuusao i nisi taimi, ae maise lava ia i latou tatou te lagolagoina o ni perofeta, tagatavaai, ma talifaaaliga, ua Ia faamoemoeina foi i tatou e suesue i mea i o tatou mafaufau (tagai Mataupu Faavae ma Feagaiga 9:8–9) ma ia “aumai le amiotonu tele” (Mataupu Faavae ma Feagaiga 58:27) e aunoa ma le “poloai [ina] i mea uma” (fuaiupu 26).
E mafai ona tatou faatuatuaina o le a taialaina i tatou e le Alii i luga o le ala o lo tatou faaolataga a o tatou mulimuli i taitai faaaposetolo o Lana Ekalesia. Ma e mafai ona tatou maua le mafanafana sili mai le folafolaga a le Alii o le a Ia faamautu mai ia i tatou taitoatasi le moni o mea uma a o tatou sailia taitoatasi (tagai Moronae 10:5).
Faamanuiaga i Le Ekalesia a Iesu Keriso
O le a la le uiga pe a tatou faapea atu e moni le Ekalesia pe afai tatou te le manatu e atoatoa?
-
Muamua ma le sili, o lona uiga o loo taitaia e le Alii o Iesu Keriso Lava Ia e ala i perofeta ma aposetolo soifua.
-
O lona uiga ua i ai tusitusiga paia uma ua faaalia mai e le Atua ma aoaoga faavae uma ma upumoni taua mo lo tatou faaolataga.
-
O lona uiga o loo i ai le pule o le perisitua e taitai ai le Ekalesia ma faatautaia ai sauniga taua, ma o lona uiga o na sauniga o le a aoga uma i lenei olaga ma i le faavavau.
-
O lona uiga o i latou o e mulimuli i ona mataupu o le a maua le olioli tumau i lenei olaga ma le faavavau.
-
O le uiga o la tatou tala o i latou o e mauaina sauniga faaola ma tausia feagaiga e o faatasi ai, salamo faamaoni pei ona manaomia ai, o le a faaeaina ma le mautinoa i le malo selesitila o le Atua.
-
Ae maise lava la tatou uiga e faapea o le a molimau mai le Agaga Paia i nei mea i tagata saili faamaoni o le upumoni.
O le mulimuli ai i aoaoga a le Ekalesia e galue—e avea ai i tatou ma tagata sili atu ona lelei, aumaia ia i tatou le filemu ma le olioli, ma saunia ai i tatou e toe foi atu i lo tatou Tama Faalelagi.
“O le Ekalesia o [le] malo na valoia o aso e gata ai, e lei foafoaina e le tagata ae na faatuina e le Atua o le lagi,” na aoao mai ai Elder D. Todd Christofferson o le Korama a Aposetolo e Toasefululua.2 E taua tele mo e talitonu faamaoni i upumoni na toefuatai mai e Iesu Keriso ona tutu i luga ma molimau atu ma le lototoa O Le Ekalesia a Iesu Keriso o le Au Paia o Aso e Gata Ai o le “ekalesia moni ma ola e tasi lava” (Mataupu Faavae ma Feagaiga1:30).
Matou te ofoina atu lo matou alofa atoa ma le faaaloalo ia i latou uma o e talitonu ma mulimuli i le upumoni i soo se mea lava e mafai ona maua ai. Tatou te faaaloalo ma faatauaina le agalelei susulu tatou te maitauina i le tele o isi lotu, ma tatou te le faitioina talitonuga o soo se vaega po o tagata taitoatasi. Ae e faivalea le mafaufau ai faapea e mafai ona tatou talitonu ia Iesu Keriso ma mataupu na Ia aoao mai ma maua ai le manuia atoatoa o faamanuiaga ma sauniga e na o Lana Ekalesia toefuataiina e maua ai e aunoa ma le talitonu i ai, lagolagoina, ma le puipuia o lena Ekalesia.
Ioe, e tatau ona tatou molimau atu o le talalelei a Iesu Keriso, le Perofeta o Iosefa Samita, o le Tusi a Mamona, ma isi faavae autu e moni, ae e i ai foi le taua tele i le molimau atu i le moni o le Ekalesia o se faalapotopotoga. I totonu o le malumalu tatou te aoao ai e faapea o iina e taulai atu i ai lo tatou faapaiaga. A o tatou lagonaina le moni a’ia’i o le faalapotopotoga lea e taitaia e le Alii lava Ia, ona tatou lagona lea o le tiutetauave e faamaoni i aoaoga faavae ma faiga ua aoaoina e le Ekalesia.
O le Faamaoni ai i le Ekalesia
O upumoni o le talalelei e le manaomia ai le puipuiga ma le faamaoni o le Au Paia e faatumauina ai. E moni ma e mo i latou lava. Ae o le talitonu i se tulaga lautele e mafai ona matua faaleiloga lava e le mafai ai ona i ai se mana faaosofia po o se mana faaola, ma e mafai e tagata e faaletalitonu ona maua le avanoa (tagai Iakopo 2:19–20). I se faatusatusaga, o se talitonuga maumaututu O Le Ekalesia a Iesu Keriso o le Au Paia o Aso e Gata Ai e moni ma taialaina e le Alii e taitai atu ai se tasi e auai i sauniga, totogi sefuluai ma taulaga, auauna atu i valaauga, maua sauniga, ma tausia feagaiga e o faatasi ai. Faatasi ai ma le talitonuga manino ma le maumaututu e oo mai ai tautinoga manino ma faamalosiau. I se isi faaupuga, o le taimi lava tatou te iloa ai e moni, ona avea lea o i tatou ma e tuuto ma le amio mama e faatino e pei ua moni.
Ou te molimau atu ua ou iloa e ala i aafiaga patino ma le molimau mautinoa a le Agaga Paia O Le Ekalesia a Iesu Keriso o le Au Paia o Aso e Gata Ai o le Ekalesia moni ma le ola lea e taitai e le Alii o Iesu Keriso e ala mai i o tatou perofeta ma aposetolo o i ai nei. Tau ina ia le gata ona tatou iloa e moni le Ekalesia ae faapea foi i a tatou upu ma galuega, tau foi ina ia tatou faamaoni i le Ekalesia.