“I se Lalolagi ua Tumu i le Pisapisao, O E Faaavanoaina se Taimi e Lagona ai le Filemu o le Atua?,” Liahona, Iuni 2024.
Autalavou Matutua
I se Lalolagi ua Tumu i le Pisapisao, O E Faaavanoaina se Taimi e Lagona ai le Filemu o le Atua?
A o ou faaaluina se taimi e fifilemu ai, ua ou latalata atili atu i le Tama Faalelagi ma Iesu Keriso ma lagonaina lo Laua filemu.
O le Alii o Lo’u Leoleo Mamoe, saunia e Yongsung Kim, faatagaga a le LDSart
A o o’u i ai i le aoga maualalo, e piki a’u e lo’u tina mai le aoga i Aso Lulu taitasi ina ia mafai ona ma maua sina faamalositino laitiiti e ala i ni taamilosaga o feausiga fai faatasi. I le taimi muamua, ou te lei fiafia i lenei mea. Sa laitiiti lava, pe leai foi sa’u taleni afeleti, ae na ala lava ona ou alu ia aua ai nei o’u alu i le pasi i le fale mai le aoga.
Ae na vave ona ou iloaina le aogā o lenei taimi faatulagaina faalevaiaso. Sa aoao a’u e lo’u tina i le auala e faamalosia ai la’u aau, le auala e faaogatusa ai lo’u tino i le vai, ma le taimi e manava ai. Sa ou mauaina se faatinoga faifailemu [o le aau] a o o’u asaina e a’u lava totonu o le vai.
Toso, toso, toso, mānava.
Ae, o le mea sa sili ona ou faatauaina,o le taimi sa le’i faalavelaveina faatasi ma lo’u tina. Ou te lei popole lava e uiga i le taumafai e faatautava ma a’u tupulaga e sili ona talenia po o le siakiina o le aofaiga o taamilosaga na ou aau ai. Sa na o a’u lava ma lo’u tina o loo tausisia se mamanu aau.
E lei leva atu, sa amata ai ona ou toe aau. O le toe aoaoina o le mamanu aau sa faigofie. Toso, toso, toso, mānava. O le fifilemu o le aafiaga sa lagonaina ai o se mea masani ma avea ai ma se vailaau mo lo’u mafaufau e masani ona vevesi. Ua ou iloa e ala i le mauaina o se nofoaga e le mafai ai ona ou faalogoina le tele o le vavaō o siomia ai a’u, e tau le mafai ai ona oo o’u mafaufauga i faatosinaga mai fafo.
I lenei taimi tuuto ia te au lava ia, pe a ou le aapa atu mo la’u telefoni po o le siakiina o mea mai la’u lisi o mea e fai, ua ou vaai ai i le taua tele o se siosiomaga fifilemu e mafai ona i ai. O le aveesea o nisi o leo e tele o lo’u olaga i lea aso ma lea aso, ua faigofie ai ona liliu atu o’u mafaufauga i le Tama Faalelagi ma Iesu Keriso.
Ma e ala i le sailia e le aunoa o lenei filemu, ua mafai ai ona ou valaaulia nisi aafiaga faaleagaga i lo’u olaga. O le tapeina o la’u telefoni po o le laa ese mai a’u galuega mo sina taimi i aso taitasi, o se auala lea mo a’u e fai atu ai, “Tama Faalelagi, ua ou saunia a’u lava e faalatalata atili atu i Lau Afio. Ua ou sauni e faalogo.”
O le tele o taimi, a o ou faatalitali ma faalogo, e leai se leo manino po o se mafaufauga patino, ae o se lagona o le filemu. Faatasi ai ma le fifilemu e oo mai ai le mafanafana, filemu, ma le latalata atu i le Atua ma Iesu Keriso (tagai Salamo 46:10). E mafai ona ou lagonaina a’u taumafaiga ina ia ogatusa ma i La’ua ua faamalosia. I lona iuga lava, o le sailia o taimi filemu e le faalavelaveina e pei o lenei ua mafai ai ona ou lagona le latalata atu i lo’u Tama Faalelagi ma lo’u Faaola, o Iesu Keriso, ia iloa i Laua, ma faalogo ia i Laua.
Faalogoina o Le Leoleo Mamoe Lelei
I le aluga o tausaga ua ou aoao ai e saili le filemu o le Atua i isi auala. Mo le tele o lo’u tulaga faatagata matua, ua ou suesueina ai atavali, faatasi ai ma se taulaiga faapitoa i na ata o se natura paia. Ua ou maua le tele o atavali atonu e le foliga mai e faalelotu i le tagata maitau faasamasamanoa ae e paia lava ia te a’u.
O se atavali faigofie o se leoleo mamoe o loo taitaiina se tamai lafu mamoe i se laufanua ua ufitia i le puao o se tasi lea o atavali faapena. O le faatusa masani o le leoleo mamoe i lenei atavali e mafaufau ai i le Ioane 10:27: “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au.”
E pei ona aoaoina i le tele o taimi i tusitusiga paia, ua valaaulia i tatou e le Tama Faalelagi e faalogo i le siufofoga o Lona Alo, o Iesu Keriso (tagai Mataio 17:5; 3 Nifae 11:7; Iosefa Samita —Talafaasolopito 1:17). Talu mai le vaaia o lenei atavali mo le uluai taimi, sa avea o se faamanatu ia te a’u o le uiga o le faalogo i le siufofoga o Iesu Keriso, le Leoleo Mamoe Lelei, i o tatou olaga i aso taitasi.
O le tusiata o lenei atavali, o Granville Redmond, sa logonoa i le popofou o lona soifua ma, o se taunuuga, na atiaeina se tomai faapitoa e vali ai ata ia na lagona ai le filemu.
E pei lava ona fatuina e le tusiata se siosiomaga paia ma anoa e ala i lenei atavali manino e aunoa ma ni upu, e faapena foi ona masani ona fetalai atu le Leoleo Mamoe Lelei i Lana lafu i se leo e lei tautala ae sa lagonaina—mo na o i latou e i ai “taliga e faalogo” (Mataio13:9). O lenei ata, na vali e se tusiata sa malamalama lelei i le taua o le leai o se upu, na aoaoina a’u i le mana o le faalogo atu i se ituaiga ese—e le o le siomaga faaletino, ae o le faaleagaga. E le o le leo i le taliga, ae o le agaga i le agaga.
Sa fai mai se uo mamae a Granville Redmond e uiga ia te ia: “O nisi taimi ou te manatu ai o le filemu o loo ia nofo ai ua atiae ai ia te ia se lagona, o se gafatia sili mo le fiafia lea e le o maua e nisi o tatou. Na te valiina le nofotoatasi e pei ona le mafai e se isi tagata ona faamatalaina, ae, e ala i se feteenaiga uiga ese, o lona nofotoatasi e le tuuatoatasi ai o ia.”1
A o ou mafaufau i lenei atavali i le aluga o tausaga, ua aumaia ai lagona masani i mea ua ou oo i ai i le toafilemu o le vaitaele, ma saili ia lagona le latalata atu i le Atua ma faalogo i le siufofoga o le Leoleo Mamoe Lelei. I lena sailiga ua ou iloa ai o o’u mafaufauga ma amioga patino e tosinaina i lagona o le latalata atu i le Tama Faalelagi ma Iesu Keriso, ma e le manaomia ona ou faalogoina i o’u taliga o La siufofoga ina ia maua ai se aafiaga faaleagaga ma i Laua.2
Mauaina Ai o le Fifilemu
Na aoao mai Peresitene Russell M. Nelson: “O le faalogo o se vaega taua o le tatalo. E matua oo filemu mai lava tali mai le Alii. O lea ua Ia fautuaina ai i tatou ia ‘filemu ma iloa o A’u o le Atua’ (M&F F 101:16).”3
O auala tatou te maua e fifilemu ai ma faalogo mo le siufofoga o le Alii o le a eseese mo tagata uma. Ma ua ou iloa e faapea, e faalagolago i tulaga o lo’u olaga, o nisi o auala i le mauaina o le filemu ua sili atu ona mafaia nai lo isi.
Sa i ai taimi na ou lagonaina ai le fifilemu e ala i le ofoina atu o le faamafanafanaga i se uo popole, faalogologo i le molimau a se tasi e pele, po o le nonofo faatasi ma o’u uso i se vasega a le Aualofa. O isi taimi ou te maua ai le fifilemu e ala i le faafaigofieina o la’u faagasologa o tiute ua mamafatu, faaaluina o le taimi i fafo, po o le susueina o a’u tusitusiga paia.
Pe a ou saofai i se sauniga faamanatuga ma faalogo i le gasē o fata ma ipu [o le faamanatuga] ma pepe vaogata, ua faamafanafanaina a’u i le mea moni e faapea e ui lava i tagata o siomia au, e mafai ona ou liliuina o’u mafaufauga i totonu ma talanoa ma le Atua. E pei ona folafola mai e Peresitene Nelson, e mafai ona ou “maua le malologa mai le mau gasu, lē mautonu, ma faigata o lenei lalolagi e ala i le faatoilaloina o le lalolagi e ala i [a’u] feagaiga ma le Atua.”4
Pe a ou nofo i totonu o le potu selesitila o le malumalu—pe toatele ni tagata iina pe toalaiti—e mafai ona ou toe talanoa ma le Atua. O totonu o na avanoa paia ou te manatua ai le tele o mea e le o faatopelau, lēleoa, ma filemu. Ma o totonu o na avanoa paia ou te lagona ai le sili ona saunia e sasaa atu lo’u loto i lo’u Tama ma maua le filemu paia o loo ia te Ia mo a’u. (Tagai Kalatia 5:22–23.)
Faalatalata Atu Ai i le Atua
I Lana galuega atoa, sa vavaeeseina ai e le Faaola o Ia lava mai le motu o tagata ua faatupulaia o ni Ona soo. I le faaliliuga a Iosefa Samita o le Mataio, tatou te faitau ai e faapea “sa taitaiina a’e Iesu e le Agaga, i le vao, e faatasi ma le Atua” (Faaliliuga a Iosefa Samita, Mataio 4:1 [i le Mataio 4:1, vaefaamatalaga e]). Sa i ai i le Faaola se paleni o mea e faamuamua i Lona soifuaga, ma ou te faafetai i le iloaina ai e faapea i le lotolotoi o Ana vavega ma aoaoga, sa Ia faaaluina le taimi e faatasi ai na o Ia ma Lona Tama.
E le mafai ona ou iloa po o le a se mea atonu na faasoa mai i le va o le Tama Paia ma le Alo i na taimi, ae sa ou taumafai e saili na aafiaga mo a’u lava ia. E tusa lava pe i ai ni mea lelei e oo mai i lo’u olaga pisi, e itiiti lava se isi mea ua valaauliaina ni aafiaga faaleagaga e sili atu nai lo le sailia o le taimi e fifilemu ai ma fesootai atu ma lo’u Tama oi le Lagi.
E lei iloa e lo’u tagata aoga maualalo e faapea, ina ua valaaulia a’u e lo’u tina ou te aau faatasi ma ia i vaiaso taitasi, sa ia aoaoina foi a’u i le auala e saili atu ai le fifilemu ma faalogo i le siufofoga o le Leoleo Mamoe Lelei. A o ou tuputupu a’e ma faataitai le sailia o taimi ma nofoaga e fesootai ai ma le Atua, o le tele foi lena o lo’u iloaina o loo i ai pea le Atua iina ma o loo faatalitali mai ma le naunautai mo a’u ia faalatalata atili atu ia te Ia.
O le faaavanoa o se taimi e talanoa soo ai ma le Atua o se avanoa lea mo i tatou e faalogo ai i le siufofoga o Lona Alo Pele. Ma a o tatou saili atu i lo tatou Tama Faalelagi ma Iesu Keriso, tatou te maua mai ia i Laua le filemu, toafimalie, ma le taitaiga. O loo i ai ni aafiaga matagofie o loo avanoa mo i tatou pe a tatou tosina ese i tatou lava mai le lalolagi. Ma ua ou iloa o le tele o lo’u faia faapea, o le tele foi lea o lo’u lagonaina o le filemu o le Atua.