O Soo o Iesu Keriso i le Ekalesia ma le Nuu

I le avea ai ma tagata o le Ekalesia, o lo tatou avanoa ma lo tatou tiute le “tutu o ni molimau a le Atua i taimi uma” (Mosaea18:9). I le itulau e 4 o lenei lomiga, o loo aoao mai ai Elder Ronald A. Rasband o le Korama a Aposetolo e Toasefululua e faapea o le tutu atu o ni molimau a Iesu Keriso ia i latou o siomia i tatou e mafai ona faia ai se eseesega i o tatou nuu. I le itulau e 16, ou te faamalamalama atu ai e faapea e mafai foi ona tatou faataunuuina lenei tiutetauave i le ala tatou te molimau atu ai ia Iesu Keriso ma le moni o Lana Ekalesia toefuataiina i isi tagata o le ekalesia.

E mafai ona tatou molimau atu ma le mautinoa o le moni o le Ekalesia toefuataiina a le Alii ma ona taitai a o tatou iloa ai faapea e le o le Ekalesia, ona taitai, po o ona tagata e manaomia ona atoatoa ina ia moni ai le Ekalesia. E moni lava, na fetalai mai le Alii o Lona faamoemoega o le “faaatoatoaina lea o le au paia” (Efeso 4:12). E opogi e le Ekalesia ia fanau a le Alii e le atoatoa ae o loo taumafai pea. E ala i ona aoaoga, sauniga, feagaiga, ma le Togiola a Iesu Keriso, e fesoasoani ai le Ekalesia ia i tatou seia oo ina “tatou o mai uma i le lotogatasi i le faatuatua, ma le malamalama o le Alo o le Atua, ina ia atoatoa ona lelei” (Efeso 4:13), lea o le a tatou le faataunuuina atoatoa i lenei olaga.

Ou te molimau atu O Le Ekalesia a Iesu Keriso o le Au Paia o Aso e Gata Ai o loo taitaia e le Alii o Iesu Keriso Lava Ia e ala i perofeta ma aposetolo soifua; ina ia faaeaina i latou o e e mauaina sauniga o le faaolataga ma le faaeaga ma tausia feagaiga e o faatasi ai o le a faaeaina i le malo selesitila o le Atua; ma o le a molimau mai le Agaga Paia i nei mea i tagata saili faamaoni o le upumoni.

Ma le faamaoni lava,

Elder J. Devn Cornish

Pulega Aoao a Fitugafulu ua Malolo Faamamaluina

Alema o loo Papatiso [tagata] i Vai o Mamona — “Ma o le ala lenei sa papatiso ai e [Alema] i latou uma taitoatasi o e na o atu i le nofoaga o Mamona; ma o lo latou aofai pe tusa ma le lua selau ma le fa agaga; ioe, ma sa papatisoina i latou i vai o Mamona, ma sa faatumuina i latou i le alofa tunoa o le Atua.”