Mafaufau e Toefaaipoipo Mulimuli Ane i le Olaga?

Saunia e Norman C. Hill

O le toe faaipoipo e mafai ona fatuina ai luitau atoa ma fiafiaga.

Ina ua maliu lona toalua ina ua mavae le 25 tausaga talu ona faaipoipo, sa manatu la’u uo o Susana ua matua tele o ia e mafaufau ai e toe faaipoipo. “Sa faamalieina a’u i le avea ai ma se tina ua oti lana tane mo aso o totoe o lo’u olaga,” o lana tala lea.

Ae—o le mea e ofo ai—i le lua tausaga mulimuli ane, sa toe faaipoipo o ia. O lona toalua, o Siaosi, o se tasi foi ua maliu lana avā. O le asō ua la ola faatasi ai i se olaga fiafia, ma faasoa atu mea masani e fiafia i ai e pei o sailiiliga ma auaunaga faasolopito i le Ekalesia ma le nuu.

Olioli ma Luitau

Atonu e foliga mai o se tala e pei o le fiafia-e-tau-i le-faavavau lena tala. Ae e vave lava ona ioe Susana ma Siaosi o le toe faaipoipo ai i soo se tausaga o le matua e mafai ona fatuina ai le olioli ma luitau. Atonu e faapitoa le moni o lenei mea mo i latou o e na faamauina i le malumalu mo le la faaipoipoga muamua. O lo’u lava olaga o se tulaga faapea.

Sa ou alofa i lo’u toalua o Raelene ma faapelepele i le ma faaipoipoga i le malumalu. Ina ua maliu faafuasei o ia ina ua mavae le 42 tausaga o le faaipoipoga, sa ou faavauvau. Sa ou lopala i le alofa faapito mo a’u lava ia mo le toeitiiti atoa le tausaga. Na iu lava ina ou maua se galuega fou i se aai fou. Sa ou lagona le saunia e toe amata. Sa ou mafaufau e uiga i tafaoga faamasani. Ae mata o le uiga o lena mea sa ou le faamaoni?

Sa ma fefautuaai ma se uo sa toe faaipoipo. “O se faaiuga a le tagata lava ia,” o lana tala lea. “Ua e iloa lou toalua ua maliu. Mata o le a sona manatu? Ua e iloa lou aiga ma pe faapefea ona latou tali atu. E pei o se isi lava faaiuga—e tatau ona faia ma le lotomaualalo ma le tatalo.”

Sa fai mai se isi uo na toe faaipoipo, “E le faatatau i le agai i luma. E faatatau i le agai i luma ma le faatuatua e tusa lava po o le a toe faaipoipo po o le nofo toatasi.”

O lea sa ou suesue ai i tusitusiga paia, e masani ona faitauina le tala ia Ruta, o se fafine ua oti lana tane, ma lona tina faaletulafono, o Naomi, o lē sa lagonaina “ua matua oona mea ua faia ia te au e Le ona le malosi uma lava” (Ruta 1:20) ona o le maliu o lana tane ma lana fanau tama e toalua. Na iu ina faaipoipo Poasa ia Ruta ina ua ootia o ia e “mea uma ua e faia i le tina o lau tane talu ina oti o lau tane” (Ruta 2:11). O lenei “tala o le alofa” faatusi paia i le va o Ruta ma Poasa na faamanatu mai ai ia te au o loo latalata mai pea le Atua, e oo lava i o tatou taimi sili ona pogisa, ma e mafai ona taialaina i tatou i a tatou faaiuga o le olaga.

Sa amata ona ou toe tafao faamasani, ma na iu ina ou feiloai i lo’u toalua o Stephanie. Ina ua ma faaipoipo, sa tonu ia i ma’ua o le faamoemoe ia tutusa mea uma e pei o a ma faaipoipoga muamua po o le faia o faatusatusaga i taitoalua muamua po o tulaga sa i ai o se mamanu lea mo fevesiaiga. Sa manaomia ona ma fatuina lo “aiga faaopoopo” e ala i le faaaofia uma o a ma fanau i faaiuga taua ma fanau uma a ma fanau i tu ma aga fou [faaleaiga].

Nofofua pe Toe Faaipoipo: O Se Filifiliga Patino

O loo i ai i tusitusiga paia le tele o faataitaiga o tagata amiotonu o e na tumau i le nofofua ina ua mavae le maliu o se toalua. Ua faamanatuina le fafine Sarefata ua oti lana tane ona o lona faamaoni ma lona agalelei (tagai 1 Tupu 17:8–16). O le fafine ua oti lana tane na lafoina ni tupe iti se lua i le mea sa teu ai oa sa faamalo i ai le Faaola mo le lafoina “ana mea uma sa ia te ia, o ana mea uma e ola ai” (Mareko 12:44). Ua tusia e le fai salamo e faapea o le Alii e “faamalosia e ua matuaoti ma fafine ua oti lana tane” (Salamo 146:9). O nei faataitaiga ua faamanatu mai ai ia i tatou o loo silafia lelei e le Alii i latou o e ua maliu sona toalua. Na aoao mai Elder Gerrit W. Gong o le Korama a Aposetolo e Toasefululua, “O lo tatou tulaga i luma o le Alii ma i Lana Ekalesia e le o se mataupu o lo tatou tulaga faalefaaipoipoga ae o lo tatou avea ma soo faamaoni ma le lototoa o Iesu Keriso.”¹

O Peresitene Dallin H. Oaks, Fesoasoani Muamua i le Au Peresitene Sili, sa na o le fitu tausaga le matua i le taimi na maliu ai lona tamā mai le mamapala. Sa nofofua pea lona tina i aso na totoe o lona olaga a o faataunuuina le tele o mea i auaunaga i le Ekalesia ma le nuu, e aofia ai le auauna atu o se pulenuu o le aai o Provo.

“Sa faamanuiaina a’u i se tina ofoofogia,” sa toe ta’ua ai e Peresitene Oaks. “Na mautinoa lava o ia o se tasi o le toatele o tamaitai tautupu o e na ola i aso e gata ai.”²

Tumau i le Talalelei

A o auauna ai o se tasi o Fitugafulu, sa ta’ua ai e Elder Randy D. Funk “nisi o mafuaaga o le le fiafia: … faanoanoa ma le tuuatoatasi mai le oti o sē pele, ma le fefe mai le le mautonu o le mea e tupu pe a tatou oti.” I le avea ai ma se vaifofo, sa ia fautua mai ai “o le filemu i totonu i le malupuipuia i totonu o le lafu a le Atua” e mafai ona faafesootaia ai lena tuuatoatasi ma le le mautonu.³

Na ta’ua e Elder Gong o le faatuatua ma le tausia o feagaiga ma faamanuiaga tamaoaiga o loo avanoa tele mo i latou o e filifili e le toe faaipoipo pe a mavae le maliu o se toalua. Sa ia taua se tasi o ona tuaa lea “na tuua faatasi ma se fanau laiti e toalima ina ua maliliu faafuasei lona toalua ma le atalii ulumatua na o ni nai aso na va ai. I le avea ai ma se tina ua oti lana tane mo le 47 tausaga, sa tausia ai e Tinamatua lona aiga ma le alofa tumau mai taitai ma tagata o le au paia i le lotoifale. I le tele o na tausaga, sa folafola atu ai e Tinamatua i le Alii afai o le a Ia fesoasoani mai ia te ia, o le a le faitio lava. Sa fesoasoani le Alii ia te ia. Sa lei faitio lava o ia.”⁴

Tuufaatasiga o Aiga

O le tuufaatasiga o aiga o se iloiloga i le tele o faaipoipoga, ma e mafai ona faapitoa le luitauina pe a aafia ai tamaiti, e tusa lava po o le a lo latou matutua. O le mea moni, o se tasi o luitau aupito maoae, o le ono mafai ona fesoasoani i tamaiti e talia sootaga fou.

O fanau e masani lava [ona avea] o tagata faanoanoa faagaloina pe a maliu se matua. Atonu latou te lagonaina le leiloloa i le fesouaiga—pe lagona foi se manao e fefautuaai faatasi e uiga i faaiuga e aafia ai le aiga. Atonu e i ai ni o latou manatuaga latou te le o toe lagonaina e mafai ona latou faasoa mai. “Manatua le taimi na tatou …” lagona le le atoatoa ma atonu o le tuulafoaina. Atonu latou te iloaina e faigata ona faamasani i le mafutaga fou a o latou matua o loo soifua, e aofia ai le faigata ona tuuina atu lo latou alolofa ma le faamaoni i se matua fai.

I le tulaga faamaoni lava ia, atonu e lagona e se toalua fou e pei ia o se tagata ese. “E tusa lava pe faia e tagata o le aiga i se auala sili ona agalelei e faafeiloai ai oe, e mafai lava ona e lagonaina e pei o loo e i ai i fafo i le tele o taimi,” o le tala lea a se tamaitai na toe faaipoipo. O lana fautuaga? “Manatua e te le o suitulagaina se tasi; o loo e faaopoopo atu i le aiga. Tuu atu i ai le tele o le taimi ma le alofa.”

O nisi taimi e le o ni gaoioiga fuafuaina pe na mafaufauina ae o aafiaga faigofie ma le le fuafuaina e faalelei ai lenei sootaga fou. O mea nei e tolu e foliga mai e [mafai ona] fesoasoani:

O le auai ai i taaloga, musika, ma isi mea e fiafia i ai le tagata lava ia e taua i tamaiti taitoatasi.
Faataitai le faalogo loloto e aunoa ma le soona tuuina atu o ni fautuaga se tele.
Fefaasoaai o aafiaga patino ma mea e vaivai ai.

O Fanau ma Fanau a Fanau

Nai lo le tuumuli ese mai fegalegaleaiga a aiga potopoto ma tumau ai i autafa, e mafai e matua “faaopoopo” ma matua matutua ona saili mo mea masani e fiafia i ai tagata taitoatasi o le aiga ma iloa ai ni manatu ma ni auala fou faatasi. I lo matou aiga faaopoopo, matou te faasoa atu feau tusitusia i autu e amata mai le tulaga faamatua e oo atu i tulaga faaupufai, taumafaiga faapisinisi e oo atu i fesoasoaniga faale-faamalositino, kukaina o meaai e oo atu i talafatu. Sa amata ona matou fono eseese i luga o le initoneti ma aiga potopoto e lua i le taimi o le faama’i pipisi e suesue faatasi ai le Sau, Mulimuli Mai ia te A’u ma faaauau ai lava talu mai lena taimi.

Faapaleniina o le Faatinoga

O le faapaleniina o taimi paganoa e fiafia i ai, feau i le fale, aemaise lava o mea tautupe a le aiga i se faaipoipoga fou i se taimi mulimuli ane o le olaga e mafai ona luitauina ma faigata. E manaomia ai le agaalofa, agamalu, ma “[o le mea tau tele] o le loto agamalu ma le filemu” (1 Peteru 3:4) e faatautaia ai manaoga fou ma o nisi taimi o manaoga feteenai.

O le a maua e ulugalii taitasi a latou lava tali i le faatautaiga o feau, taimi paganoa, ma tupe. Afai e talanoaina faatasi mea e fiafia i ai, o le tele o eseesega e mafai ona foia i le aluga o taimi. I le avea ai ma se taiala aoga mo na talanoaga, mafaufau i lenei fautuaga e uiga i le setiina o sini na tuuina mai e Peresitene M. Russell Ballard (1928–2023), Sui Peresitene o le Korama a Aposetolo e Toasefululua: “Faatutu ni sini mo se taimi puupuu e mafai ona e ausia. Seti ni sini e paleni lelei—e le tele naua pe laiti tele foi, ma ia le maualuluga tele pe maualalalo tele foi. Tusi i lalo ia sini e ono mafai ona ausia ma galue i ai e tusa ma lo latou taua. Tatalo mo le taitaiga faalelagi i le faatuina o au sini.”⁴

O se faaipoipoga lona lua, e pei lava o se faaipoipoga muamua, e mafai ona faamalieina ma faamanuiaina pe atuatuvale ma faigata [foi]. E tele ina faalagolago i le tomai o le ulugalii e talanoaina faatasi ia mataupu masani. O le toatele o e toe faaipoipo mulimuli ane i le olaga ua iloa e mafai ona mafana le olaga i se tasi e talanoa i ai, talie faatasi, ma e oo lava i fetufaaiga o loimata pe a manaomia. E pei lava o soo se faatinoga o le faatuatua, o le toe faaipoipo e manaomia ai le faaaogaina o uiga faaKeriso e pei o le onosai, faapalepale, faamagaloga, agalelei, ma le alofa.

E alala le tusitala i Iuta, ISA.