Peresitene Dallin H. Oaks: Mulimuli i Ala a le Alii
Pe a silafia e Peresitene Oaks le mea e finagalo le Alii na te faia—na te faia.
Ina ua uma ona valaauina e auauna atu o se uso o le Korama a Aposetolo e Toasefululua ia Aperila o le 1984, sa manatunatu loloto Elder Dallin H. Oaks i lana matafaioi fou ma suiga e le maalofia o le a tupu i lona olaga.
E le o se taimi muamua lea na talosaga ai Elder Oaks e tuua lana “upega” patino ma faalegaluega (tagai i le Mataio 4:18–20). I le 1970 na ia faamavae mai ai i lana galuega faafaiaoga i le Aoga Faaletulafono a le Iunivesite a Sikako i le tali atu i le valaaulia mai taitai o le Ekalesia ia avea ma peresitene o le Iunivesite o Polika Iaga i Provo, Iuta, ISA. Na fiafia tele o ia e aoao atu, faatautaia sailiiliga, ma fegalegaleai ma tagata aooga faaletulafono i Sikako. Ae na ia tali atu ma le faatuatua i le talosaga e auauna atu o se peresitene lona valu o le BYU.
Na feagai Elder Oaks ma se tulaga talitutusa i le 1984 i le mavae ai o lona valaauga i le Toasefululua, ao ia toe tuua foi se tofiga ma galuega na te fiafia i ai o se faamasino sili i faamasinoga i le setete o Iuta. Peitai, na ese le suiga lea.
I le 1970, atonu na mafaufau ma le talafeagai Elder Oaks o le a ia toe foi i lena galuega faaletulafono pe a maea lana tautua i le BYU, lea na iu lava na ia faia. Peitai o le valaauga i le 1984 sa tulaga ese lava—ao se tautinoga faapaiaina o lona agaga atoa ma lona soifuaga atoa i le Alii. O le taua e faavavau ma le tulaga i le lalolagi atoa o ona tiutetauave fou na matuai lofituina lava.
Sa faamatala e Elder Oaks ona mafaufauga loloto e uiga i lenei suiga taua:
“I lenei vaitaimi o le sailiili ai, mafaufau i le auala o le a ou faaaluina ai le vaega o totoe o lou olaga, sa ou fesili ia te a’u lava pe o le a le ituaiga o aposetolo o le a ou avea ai. Pe o le a ou avea ma se loia ua valaauia e avea o se aposetolo, pe o le a ou avea ma se aposetolo o le na avea ma se loia? Na ou faaiuina o le tali i lenei fesili e fuafua lava pe o le a ou taumafai e mamanu lo’u valaauga i o’u lava agavaa ma aafiaga patino, pe o le a ou faia le faagasologa tiga o le taumafai e mamanu au lava i lo’u valaauga.
“Pe a o le a ou taumafai e faatino lo’u valaauga i ala o le lalolagi, pe o le a ou taumafai e fuafua ma mulimuli i ala a le Alii?
“Na tonu ia te a’u o le a ou taumafai e suia a’u lava e fetaui i lo’u valaauga, o le a taumafai e fua i agavaa ma tulaga faaleagaga o se aposetolo. O se luitau lena mo le olaga atoa.”1
O le alofa tunoa paia o le Alii, o aafiaga o le olaga, o se aiga lagolagosua, ma uiga auau mama ma le amio pulea o le tagata lava ia na atiina ae e ala i le suesue ma le aoaoina ma le maelega, galue malosi, ma le auaunaga alofa ua mafai ai e Peresitene Oaks ona “mulimuli i ala a le Alii” ma avea moni ma se Aposetolo lototoa lea na avea ma se loia.
E tele meaalofa ua manino mai i le soifuaga ma le galuega a Peresitene Dallin H. Oaks.
Faatuatua i le Faaola
Ua faamanuiaina Peresitene Oaks i le meaalofa faaleagaga o le iloa e ala i le mana o le Agaga Paia o Iesu Keriso o le Alo o le Atua (tagai MF&F 46:13–14). Na aoao atu le aoaoga faavae o le Faaola ma le manino ma molimau atu e uiga ia te Ia ma le talitonuga maumaututu. O le Alii o lona malamalama lea i soo se vaega o lona olaga. Pe a silafia e Dallin H. Oaks le mea e finagalo le Alii na te faia—na te faia.
E ala i ana aoaoga i le silia ma le tele o tausaga, ua fesoasoani Peresitene Oaks i tagata o le Ekalesia ina ia malamalama atili atoatoa i le faamoemoega ma le taua o le fuafuaga o le faaolataga a le Tama, le Togiola a le Faaola, pule ma ki o le perisitua, le sauniga paia o le faamanatuga, le faagasologa o le na ona “faia” ae ia “avea ai,” o eseesega i o tatou olaga i le lelei, lelei tele, ma le lelei silisili, ma le tele o isi mataupu faavae o le talalelei. O lana auala faigofie ma le faatulagaina lelei i le aoaoina o le talalelei ua faamalosia ai le faatuatua o le Au Paia o Aso e Gata Ai i le salafa o le lalolagi.
Amio Sa’o
O Peresitene Oaks o se tamalii o le amiosa’o. O ona talitonuga ma amio ua faavae i mataupu faavae o le talalelei, ma e soifua o ia i mea ua ia talitonu i ai. O le faanatinati e lei avea lava ma se filifiliga mo ia ona na te naunau e faia le mea sa’o, e tusa lava pe o se faatinoga e le tauleleia ai lona tulaga po o vaaiga faaletagata. E leai ni auala pupuu i lona olaga—fai mea e sa’o po o le leai lava.
O lana amiosa’o ua atagia mai i lona naunautaiga e taulima ia faafitauli ma tofiga faigata. Ma e na te faia i se auala poto—le ala a le Alii. Sa ia aoao sa’o atu e uiga i autu e pei o le puipuia o tu masani faaleaiga, taulimaina o taufaamatau i le saolotoga o tapuaiga, puipuia o fanau mai agasala manatu faapito a tagata matutua, ma le tausalaina o mea leaga o ponokalafi.
Agamalu
O meatotino ma tomai faapitoa na ausia e Peresitene Oaks e tulaga ese i soo se tulaga. Ae ui i lea na faaalia e Peresitene Oaks le agamalu ma le naunautaiga ia aoaoina uma mai le Agaga Paia ma mai tagata e eseese uma talaaga ma aafiaga.
I se tasi o a tatou sauniga a le korama, sa faaalia ai e Peresitene Oaks se manatu malosi e uiga i le ala e faatino ai lea na ia talitonu e tatau ona tuliloaina. O mafuaaga na ia faaalia na faatosina, ma o lona malamalama e uiga i le mataupu e lautele. Na malosi ana finauga e faatatau i le faatinoga.
Ao matou fefautuuai faatasi, na faaalia e se tasi o le Toasefululua e itiito ifo lona sinia le maliega i le ala autu o le faatinoga ae na faailoa mai se faalotolotolua e uiga i le taimi ua tuupoina. Na mafai lava e Elder Oaks ona finauina le popole ma se tali e pei o le “Ou te talitonu ua sili atu lo’u poto masani i lenei mataupu nai lo oe.” Ae na te le’i faia. E aunoa ma se faailoga o le tetee po o le ita, sa fesili atu Elder Oaks i lona uso o le korama, “E mafai faamolemole ona e fesoasoani e faamalamalama mai ia te a’u lou faalotolotolua e uiga i le taimi?”
Ina ua mavae ona faalogologo ma le totoa i lona uso aposetolo, na mafaufau loloto Elder Oaks mo sina taimi ona fai atu lea, “O le manatu na e faaalia e taua. Ou te lei mafaufauina atoatoa ia aafiaga o lenei taimi o lenei faatinoga i le ala na e faia ai, ma ua ou talitonu ua tatau ona toe galueina le talosaga i mea ua tatou aoaoina i lenei talanoaga.”
Na faalogo ma aoao mai Elder Oaks mai lona uso a korama ona savali lea i le agamalu o le Agaga a le Alii (tagai MF&F 19:23) e faataunuu ia faamoemoega e manaomia. Mo Dallin H. Oaks, o le mataupu e le faatatau lava i le mea na e manao i ai; ae e faatatau lava i le finagalo o le Alii ma e faatatau i le mulimuli i Ona ala.
Iloatino
Ua faamanuiaina foi Peresitene Oaks i le meaalofa faaleagaga o le iloatino ma le gafatia e iloa ai ia taunuuga uumi o talosaga, filifiliga, ma faatinoga. Ua faaalia lenei gafatia i se fesili e masani ona ia fesiligia ai o ia lava faapea ma isi: “O fea e taitai atu i ai?”2 E le mafai lava ona talanoa pe fautua se tagata i se fonotaga ma Peresitene Oaks ae le iloaina i le taimi lava lena le auala ua faamanuiaina ai e lenei gafatia le lemafaitaulia o tagata ma aiga ma le Ekalesia atoa i le taimi o lona soifua atoa o le auaunaga i le Alii.
I se po o le taumafanafana i le 1970, sa feagai ai Peresitene Oaks ma se tulaga taufaafefe ma se tagata faomea i le Itu i Saute o Sikako ao ia toe foi atu i lana taavale o loo paka. O lona faletua, o June, sa faatalitali mo ia i totonu o le taavale.
“Aumai ia te a’u au tupe,” na faatonuina ai e le gaoi.
“E leai ni a’u tupe,” o le tali atu lea a Brother Oaks, o faaali atu ia te ia lana atopue gaogao.
“Aumai ki o lau taavale,” na ia faatonuina. O ki o loo loka i totonu o le taavale ma Sister Oaks. “Fai atu ia te ia e tatala le taavale,” na uunaia ai e le gaoi. Sa fai atu Brother Oaks leai.
Sa faafefe o ia e le gaoi. “Fai, po o le a ou fasiotia oe.”
Sa fai atu ma le mausali Brother Oaks, “Ou te le faia.”
Ao toe fai atu e le gaoi ona manaoga ma taufaamatau, sa vaaia e Brother Oaks se avanoa e fao ai le fana mai le alii talavou. E pei ona faamatalaina e Peresitene Oaks i se saunoaga o le konafesi aoao i le 1992, “O le taimi lava o le a ou faia ai la’u gaoioiga, sa ou maua se aafiaga uiga ese. Ou te lei vaai i se mea pe faalogo i se mea, ae na ou iloaina se mea. Na ou iloa le mea o le a tupu pe afai ou te aapa atu i lena fana. O le a ma tauivi, ma o le a ou faliu atu lena fana i le fatafata o lena alii talavou. O le a pa, ma o le a ia oti ai. Sa ou iloaina foi e le tatau ona i ai le toto o lena alii talavou i lo’u mafaufau mo lo’u olaga atoa.”3
O lenei faaaliga faavavega o le meaalofa o le iloatino na mafai ai e Peresitene Oaks ona foia le finauga ma mulimuli ane faasaoina lona lava ola ma le ola o le gaoi talavou.
Talu ai nei lava, i se fonotaga a le Aufono Faatonu a Faifeautalai, lea na taitaia e Elder Oaks i le taimi, sa matou fefautuaai faatasi ai e uiga i se talosaga e faatatau i faifeautalai o loo auauna atu i se eria faapitoa o le lalolagi. Ina ua uma ona faaalia e sui uma o le aufono o latou manatu i le mataupu, sa tuu atu e Elder Oaks ni fesili ma aoteleina mea sa aoaoina. Ona ia fai mai lea, “Ou te lagona tatou te le o tasi i lenei mataupu. E tatau ona tatou faatali i le Alii aua nei faia se faaiuga faaiu i le taimi nei.”
O mea na tutupu i nai masina mulimuli na matuai faamamafa mai ai lava le uunaiga lea na i ai i lena faaiuga e faatali. O le aufono, i le galue ai i lalo o le taitaiga musuia a Elder Oaks, sa faamanuiaina e faia se faaiuga sa’o, i le taimi sa’o, ma i le ala a le Alii e puipui ia faifeautalai ma ia manuia le galuega.
Aga Malie ma le Agalelei
E i ai se aga malie fiafia o Peresitene Oaks. Mo se faataitaiga, i le faaiuga o se taumafataga o le aoauli lea na auai atu i ai uso uma o le Toasefululua, o se tasi o le Usoga sa fautua mai o le a faigata ona ala i le taimi o le aoauli ina ua mavae ona fiafia i se ‘aiga ma matagofie. Na ataata faalauaitele atu Peresitene Oaks ma tali atu: “Pe afai lena e le mafai ona e mauaina se nofoaga lelei e te moe ai.”
E masani ona ia faia ni tala malie e uiga ia te ia lava ma lana tula. Ae na te puipuia malosi foi i latou o e tau leai ni lauulu i o latou ulu. E na te tautino soo atu, “E faia e le Alii le tele o ulu, ma o i latou e le aulelei tele na te ufiufia i lauulu.”
O lona toafimalie ma le aga malie e mataina, ma e le faavaivai lona alofa ma le agalelei. E masani ona tuu mai ni manatu faaalia o tagata pe a mavae ona faatasi ma Peresitene Oaks faapea latou te fiafia i le ala na te faatoafimalieina ai o latou lagona ona o le malie o ona uiga, o le moni o lona alofa, ma ona uiga alofa.
O Uunaiga a Tamaitai Amiotonu
Faatasi ai ma mea uma ua ausia ma le faamamaluina e o faatasi ma lona soifuaga mataina, o Peresitene Oaks o se tagata muamua ua faailoa mai le aafiaga loloto o ni tamaitai amiotonu e toatolu i lona olaga. O Stella Harris Oaks, June Dixon Oaks, ma Kristen M. McMain Oaks.
E fitu tausaga o Dallin Oaks ae maliu lona tama, o Lloyd E. Oaks, o se fomai, i le tuberculosis i le na o le 36 tausaga. Na lagomau o ia i le faamanatuina o le 11 tausaga o lana faaipoipoga i le tina o Peresitene Oaks, o Stella Harris Oaks. Sa nofo toatasi o ia mo le vaega na totoe o lona olaga ma tausia le la fanau e toatolu.
“Sa faamanuiaina a’u i se tina ofoofogia,” sa toe ta’ua e Peresitene Oaks. “Na mautinoa lava o ia o se tasi o le toatele o tamaitai tautupu o e na ola i aso e gata ai.”4
I le avea ai ma se tausaga muamua i le BYU, sa feiloai ai Peresitene Oaks ia June Dixon. Sa la faaipoipo i le 1952 ma sa faamanuiaina e avea ma matua o se fanau e toaono. “Ou te lei galue i se tulaga maualuga faifai pea pe ana lei oo mai June i lo’u olaga,” o le saunoaga lea a Peresitene Oaks. “Ona o ia e tele mea na ou ausia i lo’u olaga.”5 O le aso 21 Iulai, 1998, na maliu ai June i le kanesa.
Na talanoa June ma Dallin e uiga i le lumanai o le la aiga ao lei maliu o ia. Sa la ioeina o le toe faaipoipo o le a avea ma se faamanuiaga ia te ia ma le la aiga. O le aso 25 Aokuso, 2000, sa faaipoipo atu ai Elder Oaks ia Kristen M. McMain.
Ua faamatalaina e Kristen Oaks lona olaga ma Peresitene Oaks i se fuaiupu faigofie e tasi: “Ua tuufaatasia i maua i le galuega a le Alii, ma ua anoanoai faamanuiaga ua ma maua mai ai.” E fatuina e Kristen ni faatasitasiga faaleaiga i le faatele e mafai ai ona e aumaia ai le tele o le olioli i le aiga atoa. E avea pea June ma se vaega o le talanoaga.
Ata na pueina ma tagata o le ekalesia i Asia mai le Deseret News; ata na pueina ma lona faletua, o Kristen, i le RootsTech e Jeffrey D. Allred, Deseret News
Ao aoao atu ma molimau atu ia Peresitene Oaks e uiga i upumoni o loo i ai i le “O Le Aiga: O Se Folafolaga i le Lalolagi,” na te muai silafiaina le taua o le avea ai ma se tane ma se tama. Ua ia aoaoina ni lesona taua e uiga i tiutetauave e fefaasoaai e tane ma ava “e alofa ma tausi e le tasi le isi ma a la fanau”—ma i “nei matafaioi paia, e ao i [tane ma] tama ma [ava ma] tina ona fesoasoani le tasi i le isi o se paaga tutusa.”6 O le tumau pea ma i le mea sili na te mafaia, sa soifua Peresitene Oaks i lona soifua faaleaiga i ala a le Alii.
O Le Tuuto Atu o le Olaga Atoa
O le aso 6 Aperila, 2018, na lagolago ai Peresitene Russell M. Nelson o se Peresitene o le Ekalesia a Iesu Keriso o le Au Paia o Aso e Gata Ai, faatasi ai ma Peresitene Dallin H. Oaks o se Fesoasoani Muamua i le Au Peresitene Sili ma Peresitene Henry B. Eyring o se Fesoasoani Lua.
Ua oo mai Peresitene Oaks i lona tofiga fou i le korama pulefaamalumalu O Le Ekalesia a Iesu Keriso o le Au Paia o Aso e Gata Ai ma le “tuuto filemu ma le mausali o le olaga atoa”7—o se olaga ua tuuto atu i le Faaola ma Lana Ekalesia toefuataiina. O aoaoga patino faalesoo ma mamana a Peresitene Oaks, ma le tumau ai o lana faataitaiga amiotonu o le a uunaia ai ma le lelei ia tagata i le lalolagi atoa ma fesoasoani ia i latou ia mulimuli i ala a le Alii.