Maua e se Alii Talavou Lona Valaauga i Samoa

Janet Pinson

Na ola ae Taylor Avei i Farmington, Iuta, i se aiga malosi e tupuga mai Samoa.

Na usitaia e ona matua le tele o tu ma aga faalemotu aemaise lava ia na fesootai ma le faamalosia o aiga.

Ina ua maua lana valaauga e auauna atu i se misiona, e alu i le nuu moni o lona tama o Samoa.

Na faaaoga e Taylor le lua tausaga na sosoo ai e auauna atu ai i tagata o le atunuu ma aoao atu mataupu faavae o le talalelei toefuataiina a Iesu Keriso.

“I le taimi o la’u misiona,” na ia fai mai ai, “na o le alofa mama na ou lagonaina, ma sa ou faia folafolaga o le a i ai se taimi o le a ou toe foi mai ai ma toe auauna atu i tagata Samoa e faaali atu ai ia i latou lena lava alofa lea na tuuina mai ia te a’u i la’u misiona.”

Na oo mai lona avanoa ao ia auai i le polokalama suesue i atunuu i fafo mo le Togafitiga o le Rumatika e lagolagoina e le Iunivesite o Polika Iaga i Provo, Iuta ISA.

O tautotogo uma mo le lua vaiaso, e malaga ai alii ma tamaitai talavou i Samoa e fesoasoani i tamaiti o maua i le ma’i o le fatu rumatika.

“Matou te vaaia le faitau selau o tamaiti i tausaga taitasi, lea i le tele o taimi e mafai ona fesoasoani ia i latou e aloese mai fuafuaga uumi o togafitiga faafomai, taotoga faigata ma e atonu foi o le oti,” o le tala lea a Avei.

Na auai Taylor i se vaega na vaaia se teineitiiti i Amerika Samoa.

“Sa faatietie mai o ia [i se vaalele] mai Samoa i Sisifo ina ua maua tala e ona matua o loo i ai ni foma’i fatu mai le I.S. O loo suesueina ma siakiina tamaiti.”

“Sa ou maua le avanoa e faaliliu ai mo le matou fomai fatu ao ia matuai siakiina le teineitiiti e lima tausaga le matua lea na aafia i le mitral stenosis o se faamai o le faaitiitia/faamaloina o se vaega o uaua o le fatu, lea e taua i le pamuina o le toto i le tino,” na toe taua e Taylor.

“Sa mafai ona ou faalogo i le tata ma vaaia le faaleagaina o lona fatu e ala i masini e vaai ai le fatu. O le taimi o le faaliliuina i le va o le fomai fatu ma le tina matua popole na ou lagona ai e mafai ona avea lenei mea ma a’u matata o le olaga.”

Na faamanuiaina le teineitiiti i le mauaina o suesuega faaolatotoga ma suia ai le uaua [o lona fatu] i le Iunaite Setete.

O loo aofia foi Taylor i se potu suesue i le BYU. I lana galuega suesue ua ia maua ai le malamalamaaga sili atu i se matafaioi o kenera i Faama’i o le Alzheimer ma le Fatu Rumatika i tagata atumotu o le Pasefika.

I le galulue faatasi ai ma suesuega a le Iunivesite o Oxford, ua aoao ai e Taylor o tagata o le Pasefika e i ai moni lava se aafiaga faakenera i nisi o faama’i.

Na feiloai Taylor ma Dr. Vuyi Nkomo, o se fomai fatu mai le Mayo Clinic i le Iunaite Setete i luga o upegatafailagi.

“Ona o se avanoa e mulimulitai ai ia te ia mo se vaiaso, ua ou malamalama manino atili ai ua ou manao e faaauau se matata i le vaega faafomai,” o le tala lea a Avei.

“O a’u fuafuaga faalegaluega o le auai atu i se aoga faafomai ma ia avea ma fomai tipitipi. O loo o’u lilifa atu foi i ni faailoga e lua o le M.D. ma le PH.D lea a o le a tuufaatasia ai lo’u fiafia i galuega o le suesueina ma le siakiina o ma’i.”