O Le Taua mo Lou Faitalia
E taua lou tau mo lou faitalia.
Ata mai le Getty Images
O le tausia o poloaiga a le Atua e aumai ai le saolotoga. I se tagata e lei mauaina se molimau i lena upumoni, o se faamatalaga faapena atonu e nenefu ai. Ma le isi, afai e alu atu se tasi o ou tuaoi ma avatu ia te oe se lisi o mea e tatau ona e faia (po o mea e le mafai ona e faia), atonu e faaitiitia e lena mea lou saolotoga patino.
Ae peitai, o le tausia o poloaiga a le Atua e faasaoloto moni ai oe—saoloto mai taunuuga le lelei o le agasala ma saoloto e olioli i faamanuiaga ia e oo mai mai le amiotonu.
Peitai, o le solia o poloaiga a le Atua, e taitai atu ai i le faatagataotauaina. O le tasi auala e mafaufau ai i le faatagataotauaina o le aveesea o le faitalia. E faigata ona fai le tele o filifiliga mo lou olaga pe afai o loo faatagataotauaina oe.
Ua tatou iloa mai tusitusiga paia, sa “saili [Satani] e faaumatia le faitalia a le tagata” (Mose 4:3) i le muai olaga. Ua tatou iloa foi, e le’i malo o ia i le taua, ma sa e i ai i le itu na manumalo!
O le itu e faafaigata ai, o loo taumafai pea Satani e faoa lou faitalia. Ae aua lava le fefe. E mafai foi ona e manumalo i le taua lenei.
Ola i le Faatagaotauaina
I le Tusi a Mamona, o loo aoao mai ai Iesu, “E ao ina outou mataala ma tatalo e le aunoa, nei faaosoosoina outou e le tiapolo, ma taitai ese atu ai outou faatagataotaua e ia” (3 Nifae 18:15).
O le faatagataotauaina e le tiapolo o se mea e fefe tele ai! Ae a e vaaifaalemafaufau i se malaia faapena, pe matele ina e mafaufau atu i tulaga o le faamasinoga mulimuli? O le mea moni e i ai se ituaiga o lenei faatagataotauaina e sili atu ona vave [oo mai]. Ma e masani foi ona maaleale teisi.
Na aoao mai Elder Quentin L. Cook o le Korama a Aposetolo e Toasefululua e faapea, “E mafai ona faapologaina tagata pe tuu i latou lava i le nofo pologa e le gata i vailaau lamatia ua fai ma vaisu ae faapena foi i filosofia lamatia ua fai ma vaisu lea ua o ese ai mai le ola amiotonu” (“O Tagitui a Ieremia: Ia Faaeteete i le Faapologaina,” konafesi aoao Oke. 2013).
O le faapologaina i valaau lamatia e pei o vailaau faasaina po o le nikotini e faigofie ona malamalama i ai. Ae e faapefea le oo ina faapologaina i se vaisu o le pepelo? O le nao se pepelo e tasi, e faigofie ai ona lavelavea i sa tatou lava mailei.
Ae e faapefea le oo ina faapologaina i le vave ona ita, po o se vaisu o le faitatala?
Ae faapefea le le faia o faatinoga amiotonu i aso taitasi (tatalo, suesue i tusitusiga paia, ma isi mea faapena.) lea ua talosaga mai e le Atua ia i tatou? Pe oo foi lena mea ina aveesea ai o le faitalia?
Ioe, o lea lava. O se auala e tasi lea e mafaufau ai i ai. O le a le mea e tupu i tagata taaalo po o fai musika pe afai e taofi atoa lava le faiga o koleniga/faataitaiga? Tali: e le umi ae le toe i ai le tomai e taaalo pe tata ai i o latou tulaga e sili ona lelei. E ui o lena mea e foliga mai e le o se aveesea o le faitalia, ae o le mea moni e aveesea ai. O le tagata taalo po o le fai musika e le galue i lona tomai, o le a le toe mafai ona faia ni filifiliga se tele i le ala e faaaoga ai lena tomai. O le faaitiitia o o latou tomai, ua itiiti ai mea e mafai ona latou faia nai lo o le taimi sa i ai muamua. Ua faaitiitia ai mea latou te filifili ai.
I se auala e talitutusa lava, e le mafai moni ona fai oe lava ma tagata e sili ona lelei e aunoa ma le mafutaga a le Agaga Paia. E te manaomia Lana fesoasoani i aso taitasi uma lava. O se tasi lea o meaalofa silisili e mafai ona e faamoemoe e maua i lenei olaga, ma o le ola amiotonu i aso uma o le auala lea e te maua ai lena meaalofa.
Sailia o le Saolotoga Moni
Na aoao mai le Aposetolo o Paulo, “O lenei ia outou tumau i le saolotoga ua faasaoloto mai ai Keriso ia te i tatou, ae aua nei toe taofia outou i le amo o le pologa” (Kalatia 5:1). I le Tusi a Mamona, o loo aoao mai ai le Tupu o Peniamina, “Ma o lalo o lenei ao ua faasaoloto ai outou, ma ua leai se isi lava ao e mafai ona faasaoloto ai outou. Ua leai foi se tasi igoa ua foaiina mai e oo mai ai le olataga; o le mea lea, ua ou manao ai ina ia outou ave i luga ia te outou le suafa o Keriso” (Mosaea 5:8).
O le saoloto moni e oo mai i le mulimuli ia Keriso. O lea, ina filifili ia e saoloto!