Saogalemu mai le Afa

Saunia e Elder Joaquin E. Costa

O Le Fitugafulu

“A o le faalogo mai ia te au, e nofo o ia ma le fifilemu, e filemu o ia e le fefe i se mea leaga” (Faataoto 1:33).

Na ou ola ae i Atenitina. Sa le o a’u o se tagata o le Ekalesia a o o’u laitiiti. Ae sa teu e lo’u aiga i luga o le matou fata se Tusi Paia. Sa lapoa ma sa i ai ni ata mananaia. Sa le masani ona matou faitauina faatasi. Ae sa ou fiafia lava e susue ona itulau ma tilotilo i ata ma tala.

O le tala e sili ona ou fiafia i ai o le tala ia Noa. E ese lo’u fiafia e tilotilo ia Noa, le lolo, ma meaola. Sa ou fiafia i le vaa ona o le saogalemu ai o Noa ma lona aiga mai le afa.

Mulimuli ane, sa ou papatiso ai i le Ekalesia, faaipoipoina, ma i ai lo’u lava aiga. I se tasi o po o le afiafi faaleaiga, sa ma talanoa ai ma lo’u toalua, o Renee e uiga i le tele o auala e faapei ai le vaa o Noa o le matou fale. E tuuina mai e ia mea taitasi le saogalemu mai afa taufaamatau o le lalolagi.

E i ai se mea sa ou aoaoina e uiga ia Noa. Na ia maua le perisitua ae sa na o le 10 ona tausaga. A o tuputupu ae o ia, sa ia vaaia amioleaga uma i le lalolagi. Ae sa tumau pea lona agavaa. Sa ia fauina le vaa e laveai ai lona aiga. Sa fesoasoani le Tama Faalelagi e faasaogalemu i latou.

O nisi taimi tatou te vaaia ai le tutupu o mea taufaafefe i lo tatou lalolagi. Ae e mafai ona tatou maua le saogalemu mai le afa. E mafai ona tatou saunia e pei ona sa faia e Noa. E mafai ona tatou filifili e usitai i le Atua. E mafai ona tatou faia o tatou fale o se nofoaga saogalemu faaleagaga.

Afai tatou te faatuatua i le Tama Faalelagi, e le tatau ona tatou fefefe. Ona o Ia, e mafai ai ona tatou lagona le toafilemu, e tusa lava po o a afa e oo mai i o tatou ala.