Na o Polokalama Faakomepiuta
O Le Aofaiga Sa’o o le “Lava”
“O le mea na ia fai mai ai e moni: Sa fai si o’u fitipuu, sa le mafai ona ou siva. Pe o le a lava ea lo’u lelei?
“O se faanoanoaga lou puupuu tele e ao ai ona e tu i le pito i luma,” sa fai mai ai la’u faiaoga. “O oe le tagata sili ona leaga le siva i le vasega.”
O upu nei sa fai mai ia te a’u i luma o la’u vasega atoa o le aufaipese i le a’oga maualuga. Sa fai mai ma le fia malie, ma sa ou tali atu i se tama’i ata sa fosi, ae o le mea moni, sa ou ma. Sa a’o mai e lo’u faiaoga ni sitepu faigofie o le siva mo i matou e mulimuli ai e faatino faatasi ma se tasi o a matou faatinoga o le konaseti. Ae paga lea, sa ou faavasivasi i taimi uma, o lea sa faigata ai ia te a’u ona fai ia sa’o sitepu. Ma o ana upu na olopalaina ai si tama’i mumu o se talitonuga sa i ai ia te a’u lava ia. O le mea na ia fai mai ai e moni: Sa fai si o’u fitipuu, ma sa le mafai ona ou siva. Sa ou tuufesili pe o le a lava ea lo’u lelei.
O lena aafiaga sa na o se tasi lena o le tele o taimi sa ou lagona ai sa le’i “lava [lo’u] lelei.” I na taimi, sa na o le pau le mea na ou taulai atu i ai o mea sa ou le maua po o mea sa ou le mafai ona fai, nai lo mea sa ou maua ma mea sa ou mafai ona fai. O se tasi lea o auala a Satani o loo ia faaaogaina e faasagatau mai ai ia te a’u ma le tele na’ua o isi.
Ina ua ta’u mai e lo’u faiaoga o le aufaipese sa matua le lelei la’u siva, sa matua ou lotovaivai lava. Sa ou taumafai i taimi uma e faamaonia atu a’u lava ia e ala i le taumafai ina ia lelei i mea na matua lelei tele ai isi. Ma sa ou toilalo i taimi uma. Sa le mafai ona taofi lo’u mafaufau e faapea e na o le pau la’u taleni o se polofesa i le faavevela nofoa. Sa ou lagona e peisea’i na galo i le Atua ona foai mai ia te a’u le aofaiga sa’o o le “lava,” e pei ona Ia foai atu i isi tagata uma.
I se tasi aso i le seminare, sa fai ai e lo’u faiaoga se lesona e uiga i foafoaga a le Atua. Sa ia faaali mai ai ia i matou ni ata ofoofogia o le vanimonimo. Ou te manatua le sioa atu ma le maofa i aniva uma, o fetu, ma paneta na faaalia—e tulagaese lava i latou taitoatasi, faalilolilo, ma matagofie i o latou lava tulaga.
Ma o iina la sa ou iloaina ai se mea.
Mai i foafoaga uma ofoofogia ma le maofa na faia e le Atua, sa Ia faaaluina se taimi e foafoa ai a’u. O se tagata ola masani, e faaletaua tele, sa le’i iloaina le tulagaese sa i ai moni o ia. O se tagata ola ua tulagaese lava o ia mai isi tagata uma. O se tagata ola ua tuuina mai i ai lana lava ia fuafuaga patino. O se tagata ola ua i ai le gafatia le faatuaoia ma se taunuuga paia.
O A’u.
O le taimi lea na i’u ai ina ou talitonu ma le loto atoa i le “taua [tele] o agaga i le silafaga a le Atua” (MF&F 18:10). Sa ou iloa ai e mafaufau moni o Ia i mea uma ia te a’u, ma ua sa’o tonu le aofaiga o le “lava” ua ia te a’u i Ona fofoga.
I le faaiuga, ou te le’i iloa lava siva lelei. Ou te faapea atu ma le faamaoni e aunoa ma le maasiasi o a’u moni o se tagata e matua leaga lava le siva. Ae e le afaina! Ona i le aluga o tausaga, na ou iloa ai le tele o taleni ma malosiaga i totonu ia te a’u sa ou le iloaina na ia te a’u. Sa faaali mai i le aluga o taimi a o ou faalagolago atu i le Alii ma maua le faatuatua o loo Ia silafia ua lava lo’u lelei. Ioe, e faalotovaivaia i tatou uma mai lea taimi i lea taimi, ae a tatou faia se laa i tua ma iloa moni le taua o i tatou lava, o o tatou malosiaga ofoofogia, o tatou tomai tulagaese, ma le aao o le Alii o loo taitaia o tatou olaga, o le a sili atu ona mafai ona tatou onosaia lenei olaga i le faatuatua, faamoemoe, ma le talitonuga tulagaese.