E Le Afaina Lava Po o le A!
I le amataga o le tausaga lenei, sa sau ai la’u paga faitautusi ma tusitusi i le vasega ma se lagona faanoanoa. Sa i ai ni ana mea sese i ana galuega i le matematika. Sa fai mai o ia, “Ua ou le aoga.”
Sa ou popole i lau uo, o lea sa ou faamatala atu ai ia te ia mea uma e uiga ia Iesu ma Lona alofa ia i tatou. Sa ou ta’u atu ia te ia o le uiga o lena mea, e le faapea tatou te le aoga! Ona ou usuina lea o le “O au o se atalii o le Atua” ia te ia. Sa fiafia i ai o ia ma fesili mai po o fea na ou aoaoina ai nei mea. Sa ou faamatala atu ia te ia, e o lo matou aiga i le lotu i vaiaso uma ma e tele mea ou te aoaoina e uiga ia Iesu i le Peraimeri.
O le po lena, sa ia ta’uina ai i lona tina ia le ma talanoaga. Sa fesili atu o ia i lona tina pe mafai ona latou o mai faatasi ma lo’u aiga i le lotu. Sa fai mai lona tina, ioe!
Sa nofo la’u uo i ou talaane i le sauniga o le faamanatuga i lena lava Aso Sa! O lea ua toetoe o vaiaso uma ma e auai faatasi ai i le lotu. O loo aoaoina e ia ma ona matua ni mea e tele atu e uiga i le talalelei a Iesu Keriso mai faifetautalai ma isi aiga o le matou uarota.
Ou te lagona le fiafia tele ona sa mafai ona ou mulimuli i le faataitaiga a le Faaola ma faamafanafana i se uo ua faanoanoa. E tusa lava pe filifili lona aiga e papatiso pe leai, o le itu e sili ona lelei, o lea ua ia iloa e alolofa le Atua ma Iesu ia te ia, e le afaina lava po o le a!