I le Uma ai o le Afa o Maria

Brianne Anderson

Virginia, ISA

Sa matou siitia atu ma lo’u aiga i le motu o Tominika i le Kerepiane ia Aokuso 2016. Sa vave ona matou faamemelo i le matagofie o le motu, aganuu, ma tagata. Sa matou auai i le paranesi i le lotoifale ma aoao ai ni mea e tele mai le au paia iina.

I le Aso Gafua, 18 o Setema, 2017, sa taia ai e se afa e Vaega 5 [le malosi], o Maria, si o matou motu laitiiti. Sa ma vaavaai atu ma lo’u toalua a’o feato solo e le afa malosi ia fale ma taavale i le auala. Sa ui tonu ae lava le ma’ema’ea o le Afa o Maria i luga o le motu, ma sa matuai leaga le faatamaiaga. O le aso na sosoo ai ina ua uma le afa, sa matou savalia ai magaala ma maua ai, o le vaomatua lauusiusi ma le lauolaola o Tominika ua foliga nei o se fanua taalaelae.

O lena lava taeao, sa matou savavali atu i fale o nai tagata o si o matou paranesi. Sa nao le lua lava fale sa lei afaina ma na mafai ona nofoia. O le toaono o aiga e toavalu o le au paia o e sa nonofo i le itu i matu o le motu ua faaleagaina mea uma. O le valusefulu pasene o fale ma maota i Tominika sa ta’u mai ua le aoga ona nofoia. E ui lava i lenei pagatia, ae sa [faaalia lava] laufofoga ataata o le tele o aiga. Ina ua matou fesiligia po o a mai i latou, sa latou tali mai, “Ua faamanuiaina i matou i le feola pea.”

Ona sa faalogo ma usitai lo matou aiga i le fautuaga a le perofeta ia ola tutoatasi, sa i ai lava a matou meaai na teu. Sa mafai ona matou fafagaina le toatele o tuaoi, faifeautalai, ma tagata o le matou paranesi. I taumafataga taitasi, sa matou fafagaina ai le averesi o tagata e 20. A o faaaoga a matou meaai na teu e auauna atu ma tausia ai i latou na siomia i matou, sa faapea ona mama teisi ai a matou lava avega.

O lenei aafiaga sa ou manatua ai Alema ma lona nuu, o “sa oo ina faamamaina avega …; ioe, sa faamalosia i latou e le Alii ina ia mafai ona latou tauave ma le faigofie a latou avega” (Mosaea 24:15).

E ui lava o loo matou nonofo pea e aunoa ma le ola o paipa, eletise, ma mea e aumaia ai le lagolelei i lea aso ma lea aso, ae sa faamalosia i matou ia a’ea ma ia sii ae isi. I masina talu mai le Afa o Maria, ua faapea ona ou iloa ai, e ui ina taua le saunia faaletino, ae e tatau foi ona tatou saunia faaleagaga. A o tatou usitai ma fausia a tatou molimau i le faatuatua ia Iesu Keriso, o le a tatou maua se faavae mautu lea o le a le toilalo pe a pesi solo mai matagi ma afa o le olaga ia i tatou.