Amepasa o le Faamoemoe: Galulue Faatasi e Puipui le Pule i le Ola

Saunia e Maryssa Dennis

Mekasini a le Ekalesia

E mafai ona e faamalosia au molimau e ala i le faasalalauina atu o le malamalama ma le faamoemoe o Iesu Keriso.

I le lalolagi o faiga faaupufai, o amepasa e fai ma sui o o latou atunuu i se isi vaega o tagata. Ae e mafai ona avea oe ma se amepasa e aunoa ma le tau manaomia o se tusifolau! I se lalolagi lea e foliga mai i nisi o taimi ua leaga tele, e mafai ona avea ai oe ma se amepasa o le faamoemoe ma le malamalama. Tau lava o le fesili ia Jackson L. (agavale, i ofuvae enaena), mai Iuta, ISA, o se sui auai o le Vaega o le HOPE a le latou aoga—o se polokalama a le tupulaga mo le tupulaga e puipuia ai le pule i le ola. E ala atu i se faalapotopotoga e taua o le Hope4Utah, ua ia aoao ai ia iloa faailo lapatai, avea ma se uo, ma aumai le faamoemoe i lana aoga.

Matou te manaomia OE

Fai mai Jackson, “O le i ai i le Vaega o le FAAMOEMOE ua matuai pupula ai o’u mata.” “E i ai tagata o vasega, uo, ma tagata o aiga o e o loo tauivi.”

Ua aoaoina e Jackson, e ui e le nafa o ia ma faaiuga e fai e ana uo, ae e i ai mea e mafai ona ia faia e fesoasoani ai ia latou sao mai i se faalavelave. Ua faaalia i suesuega e faapea, e toa 7 mai le toa 10 o le tupulaga o e e faanoanoa pe e mafaufau i le pule i le ola, o le a tauina atu i se uo ona faatoa tau ai lea i se tagata matua.¹ O le uiga o lena mea, o loo e i ai i se tulaga malosi lava e fesoasoani ai i au uo.

E pei ona saunoa Sister Carol F. McConkie, sa avea ma se Fesoasoani Muamua i le Au Peresitene Aoao a Tamaitai Talavou, e faapea: “Ua i ai sa tatou tiutetauave o le feagaiga e vaai e le tasi le isi, ia uulima o le tasi ma le isi ma savavali faatasi i lenei auala. I se isi faaupuga, ia tuu i lalo le telefoni ae tilotilo ma vaai po o ai o manaomia lau fesoasoani.”²

E le tau manaomia ona avea oe ma se vaega o se faalapotopotoga aloaia e faia ai se eseesega i le aoga po o i au uo. O ni motugaafa nei e mafai ona aoga i soo se taimi, ma i soo se mea.

O Le A le Mea e Fai

Ina ia avea ma se amepasa o le faamoemoe, taumafai ia iloa, aapa atu, ma lipoti atu.

Iloa ia faailo o lapataiga o loo manaomia e se tasi le fesoasoani.³ Ia vaavaai mo i latou o e o:

Lagona le faanoanoa po o le leai o se faamoemoe.
Amio faalemafaufau.
Aloese mai uo ma gaoioiga e fai.
Foai ese atu o meatotino taua.
Taulimaina tulaga o le faanoanoa e pei o le oti, suiga ogaoga o le olaga, faasaunoa, ma isi mea.
Suia aga masani o le moe, ai po o le tumama.
O le talanoa e uiga po o le faia o ni fuafuaga mo le pule i le ola—o le faia o faamatalaga faapea, “Maimau pe ana aua nei ou fanau mai” po o le “O le a sili atu i tagata uma pe a ou leai.”

Aapa atu. O le avea ma amepasa e faatatau uma i le fesootai atu. Sue se taimi e mafai ai ona oulua talanoa faamaoni ai ma lau uo. Atonu e te popole faapea, o le lagaina ae o le faatamaiaga o le tagata lava ia po o le pule i le ola o le a atili leaga ai, ae ua o se talafatu lena mea. A ia te oe le lototele e tautala atu ai, ua e tuuina atu moni i le tagata se maeafaaola ma faailoa atu i ai e te alofa ia i latou.

“Aua le fefe e fesili atu i se uo po o latou faia se tauiviga,” o le tala lea a Dr. Greg Hudnall, o se tagata tomai faapitoa i le puipui i le pule i le ola ma le tagata faavae o le Hope4Utah. “Ia tuusao [le fesili], ae aua le lauga atu pe faamasino atu.” Ua ia fautuaina le faaaoga o se savali “Ou”, lea e oo atu o se savali alofa ma le popole nai lo o se lauga. Mo se faataitaiga: “Sa ou maitauina i le vasega ananei sa e tauivi lava. O loo o’u mafaufau po o a mai oe. Pe o e mafaufau e faatiga oe lava?”

Tatalo mo le Agaga e fesoasoani ia e iloa mea e te fai atu ai. Afai o loo tauivi au uo ma manatu o le pule i le ola po o isi luitau ogaoga e pei o le faanoanoa, po o le atuatuvale, ia aua le tau o le ta’u atu ia i latou ia vave tuu ese ia lagona! Na aoao mai Elder Dale G. Renlund o le Korama a Aposetolo e Toasefululua e faapea, “O le ala tatou te talanoa ai i se tagata o loo maloloina ma atonu o loo aafia i se faanoanoaga e le tumau, e ese mai i le auala tatou te talanoa atu ai i se tagata o i ai se gasegase faalemafaufau.” Ua ia fautuaina mai le fai atu o se faamatalaga e pei o le, “E le o tuua nao oe. O loo matou i ai faatasi ma oe. O le a matou fesoasoani atu ia te oe i lenei tulaga.”

Ma ia manatua ia faalogo moni nai lo o le tau fuafuaina po o le a le isi au tala e fai atu. E pei ona fai mai Elder Renlund, “O le talanoa ma faamatala mai e le tagata o ona lagona, ma faamalosiau i latou e talanoa, atonu e sili atu le taua nai lo o le tuuina atu o se fautuaga.”⁴
Lipoti. Pe a e iloaina o loo tauivi se uo, atonu e faaosoosoina oe e taofi nei popolega ia te oe lava. Atonu foi e fai atu lau uo e aua nei e ta’uina i se isi. Ae o amepasa e tautatala e faailoa atu! Ofo atu tou te o e talanoa i se tagata matua faatuatuaina, e pei o se matua, faufautua a le aoga, po o se taitai o le ekalesia. Ia faasino atu i latou i le laina telefoni fesoasoani a le atunuu mo le pule i le ola po o le telefoni mo tesi mo faalavelave. Afai ua latou taufaamatau ane e faatiga i latou lava po o isi, ia ave i latou i se falemai pe valaau i auaunaga mo mea e tutupu faafuasei, ma nonofo ma i latou seia oo ina latou maua le fesoasoani faapolofesa. Afai e le o i ai se tulaga i le taimi lea e ono lamatia ai, ia vaavaai mo auala faifaipea e faaaofia ma lagolagoina ai i latou. Fai mai Dr. Hudnall, “Ia fatufatu ni avanoa mo i latou e avea ai ma se vaega o se mea. Taumafai e valaaulia i latou tou te faia faatasi ni gaoioiga e tiotio ai, e pei o le tamoega, tietiega uila, po o feausiga.” E lelei gaoioiga faaletino ona o le feminoiai e mafai ona faaleleia ai uiga fesuisuiai.

Aua le Taufaatauvaaina Lou Malosi

Ia vaai faalemafaufau mo se minute i le ese o le a i ai le lalolagi pe afai e tofu tagata uma ma se uo e lagolagosua. E le mafai ona tatou faasaoina le lalolagi atoa, ae e mafai ona avea i tatou o se uo ia i latou o e manaomia se uo.

Ua uunaia i tatou e Sister McConkie ina ia “naunau e faalautele lau li’o o uo” ma “talia isi, e tusa lava pe foliga e ese nai lo o oe.” Sa ia faailoa mai, o le faauoina o se tasi e mafai ona faia ai se eseesega i le va o lo latou agai i luma ma le faamoemoe po o le faia o se mea e faataumaoia, e pei o le pule i le ola. “Ia avea [oe] ma eseesega,” sa ia faamalosiau mai ai. “Ua ia te oe lena malosiaga tele mo le lelei.”

E ala i le aapa atu, ua e mulimuli ai i le faataitaiga a le punavai tupito o le faamoemoe: o Iesu Keriso.

Fai mai Jackson, “Ua fai mai le faufautua a le matou vaega o le FAAMOEMOE, o i matou o ‘amepasa o le faamoemoe.’” “Ou te fiafia i lena mea, aua e le gata o i tatou o amepasa o le faamoemoe, ae o ni amepasa o Iesu Keriso. O le iuga lava, o Ia o lo tatou faamoemoe.”

A tatou faaali atu le alofa FaaKeriso i isi, e mafai ona tatou fesoasoani ia i latou ia maua le faamoemoe ma le faamalologa.

“Ou te iloa ana faapea e iinei Iesu Keriso i le lalolagi, o le a Ia aapa atu i isi e pei lava ona tatou faia,” o le tala lea a Jackson. “E aumaia ai ia te au le mafanafana i le iloa, o loo ou faia e pei o le a Ia faia.”