O Atatosi o le Faatuatua
Libuletswe Gofrey Mokgatle
Gauteng, Aferika i Saute
Sa tauaso Libuletswe ina ua 21 ona tausaga. Sa ia toe aoaoina le tele o mea, ae na te lei aoaoina le gagana Patupatu. Sa fia faitau o ia i tusitusiga paia, o lea sa tatalo ai i le Atua mo se fesoasoani.
Cody Bell, tagata pueata
I le 1991, sa ou matuai lagonaina le fia auauna i le Alii, ae ou te lei iloa pe o le a faapefea ona ou auauna atu. Sa ou tatalo e uiga i ai, ma mafaufau ai e auai i se lotu o le toe fanaufouina. A o ou mafaufau e faapea o le auala sao lenei, sa tuitui mai ni alii talavou se toalua i ni ofutino papae i lou faitotoa.
Sa tali e lou toalua le faitotoa ma fai mai sa faapea lava o ia o i laua o ni tamaiti aoga, ae sa la faailoa mai i laua lava o ni faifeautalai mai le, O Le Ekalesia a Iesu Keriso o le Au Paia o Aso e Gata Ai. Sa laua mananao e faasoa mai nisi o aoaoga o le talalelei ia te au. Sa ou taliaina.
Sa fai e faifeautalai se lesona mo au ma lou aiga, ona la tuua lea o le Tusi a Mamona ia i matou ma fai mai, e tatau ona matou faitau i ai. Sa ou fai atu ia i laua, o le a manaomia ona faitau mai e lou aiga ia te au ona ou te tauaso. Sa matou faatulagaina se isi aso e toe feiloai ai ma faifeautalai.
Ina ua la toe o mai, sa ou faapea atu i ai, “E lei faitaua mai lava e lou aiga le Tusi a Mamona ia te au. E pisi i latou, ma e leai so latou taimi mo au.”
Ona fai mai lea o faifeautalai ia te au, e fai e le Ekalesia ia kaseti faalogologo o le Tusi a Mamona. Sa la fesili mai pe o le a ou faalogologo i ai pe afai la te aumaia ia mea ia te au. Sa malie e fai lena mea. O le isi taimi na sosoo ai, sa la o mai ai ma se atigipusa o kaseti o le faitauga o le Tusi a Mamona ma aumai ia te au. Sa ou manatu e tatau ona ou totogia ia mea, ae sa laua aumaia fua mo au.
Sa amata ona ou faalogologo i kaseti, ma sa ou fiafia tele i ai. O le isi taimi na o mai ai faifeautalai i lou fale, sa o mai faatasi ai ma se isi alii. Sa sau o ia mai se nuu tuaoi e asi lona aiga. O ia o se tagata o le Ekalesia, ma sa ia tauanauina au ma te o ma ia i le lotu i le Aso Sa.
O le Aso Sa muamua lea na ou faalogo ai i le talalelei e pei ou te lei faalogo muamua ai lava. E le o se ekalesia lenei e te maua ai ni tagata se toatele, ae sa ou lagonaina se mea. Sa ou iloa ai, o viiga a le Ekalesia e ese mai viiga uma sa ou faalogologo i ai mai isi lotu. Sa i ai se mea sa fai mai ia te au e tatau ona ou alu pea i le lotu.
Sa ou alu i le lotu mo se taimi ma iu ai ina ou papatiso. O se taimi e lei mamao mulimuli ane, sa valaauina ai au e avea ma fesoasoani lua i le au peresitene o le Aoga Sa. Ina ua uma ona valaauina au, sa tuuina mai e se fautua maualuga se tusitaulima ia te au. Sa ou fai atu ia te ia, o au ou te tauaso ma e le mafai ona ou pupula e faitau ai. Sa fai mai o ia, e mafai ona ou aveina lenei tusitaulima ma fai atu i se tasi e faitauina mo au. Sa faapea mai o ia, “O le a e iloa ai ou tiutetauave o se fesoasoani lua i le Aoga Sa.”
Sa ou suea se tagata e faitauina mo au. Sa malie se tasi o faiteautalai na te faitauina le tusitaulima mo au ma pue le leo. A o ou faalogologo i lana faitauga sa pue, sa amata ona ou malamalama i ou tiutetauave. Sa faaauau ona ou auauna ai iina mo se taimi umi.
Ona valaauina lea o au e avea ma fesoasoani lua i le korama a le au toeaina. E oo foi iina sa i ai sau tusitaulima, ae sa le mafai ona ou faaaogaina. Sa tofu tagata uma o le Ekalesia ma tusi lesona e mafai ona latou faaaogaina, ma sa ou mafaufau pe mata o le a avea ma se avega mamafa mo au le faalagolago i isi tagata e faitau i taimi uma mo au ma pueina. Sa amata ona ou tatalo ma ole atu i lou Tama oi le Lagi e fesoasoani mai ia ou maua se mea e mafai ona ou faaaogaina ia malamalama lelei ai i le talalelei. Ao ou tatalo, sa ou lagonaina le fai mai o le Agaga ia te au, afai e i ai sou faatuatua, e mafai lava ona ou aveesea mauga.
I le taimi o se asiasiga faaleaiga, sa ou fai atu ai i se tuafafine sa ma asia, “E le mafai ona ou faitauina tusitusiga paia ona e le mafai ona ou pupula. Ou te fia alu i se aoga ina ia mafai ona ou aoao ai e faitau ma tusitusi i le gagana Patupatu.”
Sa faigaluega lona tuagane i se aoga mo tagata tauaso. Sa fesoasoani o ia ia te au i lau talosaga. O aso uma lava sa ou aoao ai i le gagana Patupatu. Sa oo foi ina ou ala i po e faataitai le faitau i le gagana Patupatu. Sa nao le fa masina ae mafai ona ou faitau ai.
Sa uma lau aoga ma ou fai atu i lou peresitene o le paranesi, ua mafai nei ona ou faitau i le gagana Patupatu. Sa ia tuuina mai ia te au se atigipusa sa i ai se tusi lesona mo le au perisitua ma tusitusiga paia uma i le gagana Patupatu. Ou te lei iloaina lava e i ai na mea i le Ekalesia. O le taimi lena na amata ai ona ou matuai malamalama ma fiafia i le talalelei.
Ua valaauina nei au i le au epikopo, ma ou te manatu ua tusa ma le 10 tausaga o ou auauna ai i lena valaauga. Ua mafai nei ona ou tulai i luma o isi tagata ma aoao atu e ala i le Agaga. Ona e tele se taimi e alu i le faitauina o lesona i le gagana Patupatu, ou te faataitaia ma aoao ai le lesona i le fale ina ia mafai ona ou aoao atu e aunoa ma se tusi lesona i ou luma.
Ou te iloa e moni tusitusiga paia. Ou te aoao mai ai i taimi uma ou te faitauina ai. E i ai lava i taimi uma se mea ou te maua mai ai.
Ou te fiafia e mulimuli i upumoni ou te aoao mai i tusitusiga paia. Mo se faataitaiga, “Afai e te tausia au poloaiga ma tumau e oo i le iuga, o le a e maua le ola e faavavau” (MF&F 14:7)
O Siphiwe Ndou (agavale), o se faifeautalai ua uma le misiona, o loo asiasi ia Libuletswe i le taimi o se afiafi faaleaiga a le uarota.
O le aoao e faitau i le gagana Patupatu ua matala ai le tele o avanoa mo Libuletswe. O le mea aupito taua ia te ia, o lona avanoa lea e suesue ai i le talalelei.
Naledi Modige (ogatotonu), o se tasi o le uarota, o loo talie faatasi ma Libuletswe ma lona faletua o, Makhosazana (agavale mamao), i le taimi o le afiafi faaleaiga. E fiafia tele le au Mokgatles e o atu tagata i lo latou maota.
E tuu atu e Libuletswe ma Makhosazana e nofototogi ia tagata i nisi o potu o le latou fale. E fiafia i laua i avanoa la te maua e talanoa ai i tagata nofototogi ia i laua.