Faaaliga i le Perofeta o Iosefa Samita—ma ia te Oe

Saunia e Ryan Carr

Mekasini a le Ekalesia

Ua faaali mai e le Mataupu Faavae ma Feagaiga le ala na taialaina ai e faaaliga ia le Perofeta o Iosefa Samita ma tuu atu ia te ia se mamanu mo le ala e mafai ai e musumusuga ona taiala lona olaga.

Mafaufau i mea ofoofogia uma lava sa ausia e Iosefa Samita: faaliliuga o le Tusi a Mamona, faatulagaina o le Ekalesia, mauaina o le perisitua, fausia o malumalu, aoaoina atu o le talalelei toefuataiina, auina atu o faifeautalai. Ae o le mea e sili atu ona ofoofogia ai, sa ia faia na mea a’o talavou lava o ia.

Na faapefea ona ia iloa ona fai o na mea? O le mea e lelei ai, na te lei taumateina—sa taialaina o ia e faaaliga. E ala atu i nei faaaliga, o le tele o na faaaliga ua aofia nei i le Mataupu Faavae ma Feagaiga, sa aoaoina o ia e le Alii i aoaoga faavae, taiala o ia i le faatulagaina o le Ekalesia, ma tali i fesili taua. O nisi nei o nai faataitaiga.

O Fesili na Taliina i Faaaliga

O ai o i ai le pule e papatiso ai? I le aso 15 o Me, 1829, sa tatalo ai Iosefa Samita ma Oliva Kaotui e uiga i le papatisoga. Sa faaali mai Ioane le Papatiso ma tuuina mai ia i laua le Perisitua Arona ma poloaiina i laua e papatiso e le tasi le isi. (Tagai MF&F 13.)
E LELEI le faaaogaina o le tapaa? O le lamuina ma le ulaula tapaa sa o ni faiga masani i vaitaimi o Iosefa Samita. I le 1833 sa tatalo ai o ia mo le taitaiga i lea autu ma maua ai le faaaliga ua lauiloa nei o le Upu o le Poto, lea o loo faapea mai, o le “tapaa e le mo le tino” (tagai MF&F 89).
Aisea tatou te faia ai galuega faalemalumalu mo e ua maliliu? I lalo o le taitaiga a le Perofeta o Iosefa Samita, sa fausia ai e tagata o le Ekalesia le Malumalu o Katelani ma sosoo ai ma le Malumalu o Navu, ina ia mafai ai ona latou faia papatisoga ma isi sauniga o le malumalu. Ua faamalamalama mai e le Mataupu Faavae ma Feagaiga 128 e faapea, “o i tatou e aunoa ma i latou [o e ua oti] e le mafai ona faaatoatoaina; pe mafai foi ona faaatoatoaina i latou e aunoa ma i tatou” (fuaiupu 18).

E mafai ona e maua le taitaiga a le Alii i lou olaga ma tali i au fesili e ala i faaaliga faaletagata lava ia. O nisi o taimi, o na tali o le a oo mai mai tusitusiga paia pe mai musumusuga e te lagonaina i lou loto ma lou mafaufau. Ae o nisi o taimi e te agai i luma i le faatuatua, ma le le iloa tonu pe o le a faapefea le iuga o ia mea, ae o lou taumafai lava i le mea sili e te mafaia ina ia e usiusitai.

E masani lava ona umi se taimi e maua ai musumusuga ma taitaiga e te manaomia. E pei lava o le Perofeta o Iosefa, e mafai ona e iloa le finagalo o le Alii i “lea fasifuaitau ma lea fasifuaitau, o le mataupu i lea mataupu” (MF&F 98:12). E pei ona sa faia e le Perofeta, ia amata i le tatalo. Ole atu i le Tama Faalelagi mo musumusuga mai le Agaga Paia. Suesue i tusitusiga paia ma aoaoga a perofeta o aso nei. Fai lau faaiuga ona e ole atu lea pe ua tonu (tagai MF&F 9).

Aoaoina i le Aluga o Taimi

Tagai i le faafanua lenei, ma o le a vaai ai i le mea sa i ai Iosefa i le taimi sa ia mauaina ai nei faaaliga mai le Alii. Sa oo mai faaaliga i le taimi ma le nofoaga sa manaomia ai e Iosefa Samita i latou, e tusa ai ma le finagalo o le Alii.

Sa maua e Iosefa ni faaaliga e 46 i Katelani, Ohaio, ae sa lei faapea na tatau ona nofo ai pea o ia iina ia faaauau ai ona taialaina e le Alii. Sa ia mauaina foi ni faaaliga i Penisilevania, Niu Ioka, Misuri ma Ilinoi.

O nei faaaliga sa oo mai i se periota o ni tausaga se tele. Ai lava se manaia pe ana faaali mai e le Alii ia mea uma sa manaomia ona silafia e Iosefa Samita e uiga i le, mo se faataitaiga, o le perisitua, i se faaaliga e tasi? Nai lo o lena, sa tuuina mai e le Alii i le Perofeta ia faaaliga e uiga i le perisitua i le 1829, 1830, 1832, 1835, 1841, ma isi (tagai, mo se faataitaiga, MF&F 13; 20; 84; 107; 124).

O le a tuputupu ai foi lou malamalama o le talalelei i le aluga o taimi. A o e aoao i le talalelei faatasi ai ma le fesoasoani a le Agaga Paia—e ala i tusitusiga paia, konafesi aoao, sauniga a le Ekalesia, seminare, ma isi—o le a faapea ona tuputupu ae lou malamalama i le aluga o taimi, e pei foi ona sa tupu ia Iosefa Samita.