Itulau o le Lotoifale
Tuua e se Fetu Pupula o le Lakapi Lana Matata e Auauna Atu i se Misiona
O Young Tonumaipea, o se fetu pupula i le lakapi mo le Melbourne Storm, ua lafoai atu nei mea uma i luga o le malae ina ia auauna atu ai i se misiona i Siamani.
“Sa ou matua popole lava e ta’u atu i le kalapu, sa ou anapogi ma tatalo ae ou te lei alu atu i le faiaoga. O le i ai i se tulaga maualuga o lau taalo, na ou iloa ai e le faigofie peitai o le aso na ou fuafua ai ou te alu atu e talanoa ia te ia na ia savali mai ai agai mai ia te a’u i lalo o le faapaologa. Na ou iloa e le o se mea na tupu fua.”
O se alii e 25 tausaga le matua mai le Siteki o Melepone Craigieburn, na suia sa’o atu lava i le lakapi liki faapolofesa mai le aoga maualuga lea na ia taalo ai i le toetoe lava o taaloga uma sa i ai.
“Na ou taalo i soo se taaloga i le aoga, volipolo, tenisi i luga o le laulau, soka, AFL ma le lakapi, o le faamanuiaina ia o a’u i taaloga.”
E ui lava sa le talitonu nisi o le au tapuai a Young i lana faaiuga, ae ua matuai malamalama lava le kalapu. “O le mea moni na ou ofo lava i le lagolagosua o le kalapu; ou te lagona le faamanuiaina tele.”
I le 2011, na tuua ai e se uo lakapi o Lagi Setu, le Broncos e auauna atu i se misiona i Birmingham, Egelani.
“O Lagi o se faataitaiga sili ia te a’u, e ui lava ua ou ausia la’u miti e taalo lakapi, ae ua . . . mafai ona ou vaai i faamanuiaga i le olaga o Lagi lea na oo mai ona o lana misiona.”
“E ui lava foi ou te lei tuuto atu pe ana lei oo i le tausaga talu ai, ae sa i ai lava le misiona i tua o lo’u mafaufau i taimi uma, na muamua foi i le lakapi.”
Mo le mea na foliga mai o le a avea ma se ositaulaga maoae i le tulaga ua i ai lana taalo, fai mai Young o le auauna atu i se misiona o se mea sa’o lea e fai.
“Ou te lagona lou le agavaa i le mauaina o faamalo uma o loo ou mauaina i le filifili ai e alu i se misiona; aua i le avea ai ma e e umia le perisitua o se tiute lea e tatau ona tatou faataunuuina i le avea ai ma alii talavou.”
“O la’u fautuaga i soo se talavou po o YSA ia tumau faamaoni i mea ua e iloa. O taimi sili ona faigata i la’u matata o taimi ia na ou aluese ai mai aoaoga a le Tama Faalelagi. Pe a ou faia le mea sa’o, e lelei la’u taalo i taaloga.”
Ua mautinoa e le CEO a le Melbourne Storm, o Dave Donaghy, afai e toe fia foi mai Young pe a maea lana misiona e lua tausaga, “o loo lava pea le lelei o lana taalo.”
Fai mai Young, “Afai e i ai se mea ou te faanoanoa ai i lo’u olaga masalo o le le vave alu o la’u misiona i le taimi ua tuanai [o lo’u olaga].”
E le o mautinoa e Young po o le a le mea o le a tupu i le lumanai pe a ia toe foi mai i Siamani i le lua tausaga, “ae ou te faatuatua o le a sologa lelei ma manuia mea uma.”