2018
O Lou Taua E Le Faatapulaaina
Setema 2018

Na o Polokalama Faakomepiuta

O Lou Taua E Le Faatapulaaina

Saunia e Maryssa Dennis

E tusa lava po o a tala a le lalolagi, ua silafia e le Tama Faalelagi lou taua moni.

alii talavou matua o loo tu i le tumutumu o se mauga

O i tatou o tagata e faavavau faatasi ma se tupuaga faalelagi. Ae o loo osofaia pea i tatou e faatosinaga faalelalolagi lea e mafua ai ona galo ia i tatou po o ai moni lava i tatou. E mafai faapefea ona tatou iloa pe o le a lo tatou taua moni? O nisi nei o manatu ia manatua.

  1. O lou taua e le fuafuaina e faatosinaga mai fafo.

    E tusa ma lona moni, o le tagata e i ai oe i totonu o le mea sili lena ona taulia. E manao Satani ia e talitonu o lou taua e sau mai ni mafuaaga i fafo e pei o le foliga vaaia faaletino, atamai, taleni, soifua maloloina, tulaga manuia, ma le lauiloa. Ae “e le vaai Ieova pei o le vaai o tagata; aua e vaai tagata i le tino, a e vaai Ieova i le loto” (1 Samuelu 16:7). E silafia e le Tama Faalelagi lou taua moni ona e malamalama o Ia i ou manaoga ma uiga o lou agaga.

  2. E matagofie lou tino—e tusa lava pe le tutusa ma tulaga faatonuina o le lalolagi.

    O se luitau mo le toatele o i tatou le mauaina o se lagona lelei e uiga i o tatou foliga vaaia. Ae ia mautinoa e matagofie lava lou tino, e tusa lava po o a ona foliga. Pe o le tane po o le fafine, sa foafoaina oe i le faatusa lava o le Atua (tagai i le Kenese 1:27). O le Tama Faalelagi o le Tufuga sili o le atulaulau—ma o oe o Lana galuega silisili o le faatufugaga! O lou tino o se vavega—e augavaivai ma malosi ma matagofie ma mamalu i le taimi lava e tasi. E matua tele mea e faafiafiaina ai i ona foliga ma ona matafaioi pe a e aoao e tagai i ai o se meaalofa ofoofogia lava.

  3. A e mulimuli i le Faaola, o le a susulu atu le matagofie o lou agaga.

    Sa “leai se matagofie” o Iesu Keriso lava Ia i mata o tagata (tagai i le Isaia 53:2). Ae sa mafai faapefea ona le matagofie le Faaola? O Lona matagofie sa tupu mai i Lona lelei ma le mama. Ma e faapena foi lou matagofie! O soo moni o Keriso e matagofie lava i latou ma e leai ma se sootaga ma o latou foliga vaaia. Pe a outou “maua ona foliga i o outou mata” (Alema 5:14), tou te tauaveina se malamalama e susulu atu mai totonu i fafo. Ma a iloaina e isi lou malamalama, o le a sili atu ona tosina i latou ia te oe. O le mea silisili i mea uma, o le mafai ona savali sa’o i luma o le Atua e te maua ai se talitonuga tele iloga.

  4. Ua i ai ia te oe se taua lemafuatia e tutusa lelei ma oe.

    Sa aoao atu e Korioa le Aneti-Keriso e faapea “e lelei a tagata taitoatasi ia i le olaga lenei e tusa ma le pulea e le tagata o ia lava” (Alema 30:17). I se isi faaupuga, o le auala e te puleaina ai oe lava ia e fuafua ai lou taua—o se mea e ao ona e galue ia maua pe faamaonia. Ae e le moni lena mea! E ui e tatau ona tatou tauivi i taimi uma e faaleleia i tatou lava, ae “ua tele lava le taua o agaga i le silafaga a le Atua” (MF&F 18:10) e tusa lava po o le a. E tusa lava pe e te faia ni mea sese, e le faaitiitia ai lava lou taua. E pei ona aoao mai Sister Joy D. Jones, le Peresitene Aoao o le Peraimeri, “Afai tatou te agasala, e faaitiitia lo tatou agavaa, ae le faaitiitia ai lava lo tatou taua!” (“O Le Taua Le Mafuatiaina,” Ensign po o le Liahona, Nov. 2017, 14).

E ui e tele ina laaloa ai lau vaai, ae o loo i ai se aloiafi o le paia i totonu ia te oe. O loo i ai iina e tusa lava pe e te lagonaina le lofituina i le le paia. Ma e mafai ona silafia e le Atua—i taimi uma. Afai e te faafaileleina lena aloiafi, e mafai ona Ia faia oe e avea ma se tagata sili atu nai lo le mea e mafai ona e talitonu i ai.