Seia Tatou Toe Feiloai
O Le a Lo’u Tau?
O le tagata faatau e filifili pe talafeagai le tau o se aitema.
Ina ua mavae le fa tausaga e aunoa ma se televise ma le isi ono tausaga o ola pea i seti televise tuufaasolo mai isi, na ma filifili loa ma lou toalua e faatau se TV fou. Ona o le tau, na ma faatusatusa ai ma le faaeteete ia fausaga, ituaiga, o vaega o i ai, ma tau a o lei faia mulimuli se faatauga. O le mea malie, na ou savali ese e le gata na ave le TV ae faapea foi ma se malamalamaaga taua i le fuafuaina o le tau-faaletagata.
O o tatou aafiaga ua aoaoina ai i tatou o lo tatou tau e fuaina e ala i le faatusatusaga—e faasaga i o tatou uso ma tuafafine, uo i le vasega, tupulaga, ma tagata e faigaluega faatasi. Ae, e ui o le fuafuaina o le tau e ala i le faatusatusaga e talafeagai pe a faatau se TV, ae i le olaga, o i tatou o TV.
O le faatusatusaina o i tatou i isi ina ia fuafua ai lo tatou tau e tutusa lava le talafeagai ma le tilotilo atu o le tasi TV i le isi i le faleoloa ma moomoo maimau pe ana o ia e 40 inisi (102 sm) nai lo le 27 (69 sm). E le talafeagai lena mea, aua “o ai ea so outou na te mafaia i lona popole ona faateleina le umi o lona olaga i le kupita e tasi” (Mataio 6:27) po o le tasi le inisi i le lautele o le lau? Na lapatai mai le Aposetolo o Paulo o tagata “e fefuafuaai i latou ia te i latou, ma fefaatusatusaai i latou ia te i latou, e le popoto i latou” (2 Korinito 10:12).
E tatau foi ona tatou faaleamanaiaina i latou e faia le faatusatusaga mo i tatou ma tau mai ia i tatou lo latou manatu i lo tatou tau. E ui lava e pulea e le faatauoloa le tau o se TV, ae e le mafai ona fuafuaina e ia lona taua.
O le ki lenei: O le tagata faatau e vaai i le tau, iloilo le oloa, ma filifili pe talafeagai lona tau. Ma i lenei olaga, e na o le tasi lava le Tagata Faatau o taunuuga.
O lo tatou Faaola, o Iesu Keriso, na iloiloina “le oloa”—o tatou, i le tuufaatasiga faapea ai ma tagata taitoatasi. Na Ia silafia le loloto o le amioleaga lea o le a fesootai ma le aiga o tagata.1 Na Ia malamalama i le tau mataga, ma le le mafuatia o le a manaomia ona Ia totogiina, “o le mafatia lea na oo ai ia te [Ia] o le Atua lava lea, o le ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga” (MF&F 19:18).
Ma le iloaina o mea uma, na Ia filifili pea ou te agavaa mo le tau lea.
E tusa lava po o lea le le atoatoa ou te manatu ou te maualalo ai i le faatusatusa i isi, e tusa lava po o le a le itiiti o lo’u taua i le vaai a isi, na lagona lava e Iesu ou te agavaa mo le tau o le a Ia totogia.
O le osofaia o lo tatou taua-faaletagata o se tasi lea o mailei poto ae matautia a Satani. E taua mo au le talitonu o le Alo o le Atua na maliu e le gata mo agasala a le lalolagi ae na Ia maliu foi mo au agasala. Afai e mafai e le fili ona taitai au e talitonu i se isi mea, o lo’u masalosalo e ono taofia ai au mai le saili atu i le togiola alofa tunoa a le Faaola ma toe foi atu ai i Lona afioaga.
Afai ua e masalosalo i lou taua, alu i le Tagata Faatau e maua mai ai le iloiloga e tasi lava lena e taulia o le oloa. “E mafai ona tatou tatalo ma le talitonuga e mafai ona tatou lagonaina le alofa o le Faaola mo i tatou,” na saunoa mai ai Peresitene Henry B. Eyring, Fesoasoani Muamua i le Au Peresitene Sili. “… Sa lava Lona alofa mo i tatou … na Ia totogi ai le tau o a tatou agasala.”2
O le mauaina o le faatuatua i lena alofa e faatagaina ai le Togiola e suia o tatou olaga ma aveina atu Lana faatau i le aiga.
Ata o Keriso, saunia e Heinrich Hofmann, faaaloaloga a le C. Harrison Conroy Co.