Sa Asiasi Iesu i Tagata sa Nifae

Saunia e Diane L. Mangum

Na ufitia le laueleele o sa Nifae i le pogisa mafiafia mo aso e tolu. Na leai sina susulu o le la po o se emo mai o se malamalama o se fetu. Na matuai pogisa lava e oo lava i se moli gao ua le mumu.

Na faalogo sa Nifae matatau i le faititili ma afa matautia ma lagona le eleele ua luluina e mafuie. O le taimi lea ua fetagisi tagata ma uio i le pogisa. Na latou mafaufau maimau pe ana latou mulimuli i aoaoga a le perofeta o Nifae ma salamo!

Na faafuasei ona faalogoina se leo i le laueleele uma: “Faauta, o au o Iesu Keriso le Atalii o le Atua. O au na foafoaina le lagi ma le lalolagi, ma mea uma o i ai. O au na ou i ai faatasi ma le Tama mai le amataga.”

Na fetalai atu Iesu na afio mai o Ia i le lalolagi e faaolaina le lalolagi mai le agasala. Na Ia tuuina i lalo Lona soifua ma ua toetu nei. Na Ia valaaulia tagata uma ia salamo ma ia faaolaina.

Na matuai ofo sa Nifae e faalogo i le siufofoga o Iesu ma na latou nonofo filemu mo le tele o itula, ma mafaufau loloto i mea na latou faalogo i ai.

Na toe malama le taeao, ma na amata ona olioli tagata. E toatele tagata na potopoto faataamilo i le malumalu i le laueleele o Nuumau e talanoa e uiga i mea ofoofogia na tutupu. Ona latou faalogoina lea o se leo filemu mai le lagi. Na mu o latou loto ona o le leo, ae latou te lei malamalama i ai.

Na toe oo mai le leo, ae latou te lei malamalama lava i upu.

O le taimi lona tolu na oo mai ai le leo, ma faapea mai, “Faauta i lou Atalii Pele, o le ua ou fiafia lava i ai, o le ua ou faamamaluina ai lou igoa—ia outou faalogo ia te ia.”

Na tetepa ae tagata i luga ma vaaia Iesu ua afio ifo i lalo mai le lagi seia oo ifo o Ia ma tu i le totonugalemu o i latou. Na pauu sa Nifae i le eleele. Na latou manatua upu a perofeta—o le a asiasi atu Iesu Keriso ia i latou pe a maea ona faasatauroina ma toetu mai o ia.

Na faatagaina e Iesu tagata uma e tagotago atu i Ona lima ma vae ma tagotago i tulaga na tutu’i ai o Ia i le satauro i Ierusalema. Ina ua vaai ma tago atu i latou lava, na latou iloa o Ia o le Faaola toetu. Na latou alalaga, “Osana!” ma tapuai ia te Ia.

Na valaau Iesu i le perofeta o Nifae e sau ia te Ia. Na Ia tuuina atu ia Nifae ma isi alii amiotonu e 11 le pule e aoao ma papatiso ai pe a toe foi atu o Ia i le lagi. O le 12 lenei na avea ma soo o le Ekalesia a Iesu Keriso i le Lalolagi Fou.