O Le Auala e Ola ai Soo o Keriso i Taimi o Taua ma Fetauaiga
E fesoasoani ia i tatou ia mataupu faavae mai le Tusi a Mamona ina ia tatou ola ai ma le faatuatua ma le faamoemoe i taimi faigata.
Ua tatou ola i se vaitaimi o loo malosi ai taua ma fetauaiga. O loo lipotia mai e talafou le tutupu o nei mea mataga i aso uma. Sa saunoa mai le perofeta a le Alii o, Peresitene Thomas S. Monson, “Ua tatou o mai i le lalolagi i taimi faigata.”1 Ua ia toe faamaonia le saunoaga a Peresitene Gordon B. Hinckley (1910–2008): “Ua tatou ola i se vaitau ua faia ai e ē faasaua mea matautia ma le mataga. Ua tatou ola i se vaitau o taua.”2
A o mafaufau loloto ai, e le o se mea e tatau ona faateia ai. Ua aoao mai e tusitusiga paia faapea i aso mulimuli o le a alu atu Satani e “tau le taua” (Faaaliga 12:17) ma ē faamaoni ma o le a “aveesea ai le filemu mai le lalolagi” (MF&F 1:35).
Na muai silafia e le Atua o tatou aso ma valaau atu ai i le Perofeta o Iosefa Samita ina ia aumai le Tusi a Mamona e fesoasoani ia i tatou (tagai i le MF&F 1:17, 29; 45:26). Mai le 239 mataupu o le Tusi a Mamona, e 174 (73 pasene) e faatatau lava i taua, sauaga, fasioti tagata, taupulepulega faapolokiki, faapotopotoga faalilolilo, taufaamatau, vaega faalilolilo faaleaiga, ma isi tulaga faatupu faalavelave.
Aisea na faamaumau ai e le au tusitala o le Tusi a Mamona le tele o taua na tutupu? O le tali a Peresitene Ezra Taft Benson (1899–1994), “Tatou te iloa mai le Tusi a Mamona le auala e ola ai soo o Keriso i taimi o taua.”3 O nisi nei o tala e mafai ona avea ma taiala mo i tatou a o tatou ola ai i taimi faigata.
O Le Usiusitai e Valaaulia ai le Laveaiga
O le tele o taimi i le Tusi a Mamona, e laveai e le Alii Ona soo pe a latou usiusitai i Ana poloaiga.4 Sa aoao mai Nifae, “O le alofa mutimutivale agamalu o le Alii i luga o i latou uma o e ua ia filifilia, ona o lo latou faatuatua, e faamalolosi tele ai i latou e oo lava i le mana e laveaiina ai” (1 Nifae 1:20). Sa faamaumauina e Nifae le auala na laveai ai e le Alii lona tama mai tagata na taumafai e fasiotia o ia, laveaiina lona aiga mai le faafanoga o Ierusalema, laveaiina mai o ia mai taumafaiga a ona uso ma Lapana e fasioti o ia, ma le laveaiina mai o ia ina ua liliu atu Lamana ma Lemuelu i le faasaua (tagai i le 1 Nifae 2:1–3; 3:28–30; 4; 7:16–19; 18:9–23).
Sa tau atu e Alema i lona atalii o Sepulona, “Ou te manao ia e manatua, afai e te tuu atu lou faalagolago i le Atua seia faapea ona tele, o le a ia laveaiina oe i fafo mai ou tofotofoga, ma ou faalavelave, ma ou puapuaga” (Alema 38:5). Na matauina foi e Mamona faapea “o i latou o e sa faamaoni i le tausiga o poloaiga a le Alii sa laveaiina i taimi uma” (Alema 50:22). Sa toe faamaonia mai e Elder Russell M. Nelson o le Korama a Aposetolo e Toasefululua lenei mataupu faavae ina ua ia fai mai: “O le usiusitai e mafai ai ona tafe mai faamanuiaga a le Atua e aunoa ma le tau taofiofia. O le a Ia faamanuiaina Ana fanau usiusitai i le saoloto mai le saisaitia ma le faanoanoa.”5
O loo faailoa mai foi i le Tusi a Mamona e oo lava i nai tagata amiotonu e mafai ona faamautinoa ai le filemu ma le saogalemu o se aai atoa (tagai i le Helamana 13:12–14).
E Mafai ona Avea le Taua ma se Valaau ina ia Salamo
Pe a tatou faagaloina le Atua, e Na te valaau mai ia i tatou. O le taimi muamua e Na te faaaoga ai ia auala alofa mutimutivale e pei o musumusuga patino ma perofeta. Peitai afai tatou te le tali atu, o le a Ia faateleina Ana taumafaiga. E i ai taimi, o le a Ia faatagaina ai taua ma fetauaiga e avea ma Ana taumafaiga mulimuli ina ia fesoasoani ai ia i tatou e toe foi atu ia te Ia.6
Na fai mai Mamona, “Ma ua faapea ona tatou vaai ai vagana ai ua aoaiina e le Alii ona tagata i puapuaga e tele, ioe, vagana ai ua asiasi mai o ia ia te i latou i le oti ma le faafefe, ma le oge ma faamai uiga eseese uma, latou te le manatua o ia” (Helamana 12:3). E mafai ona avea taua o se faamanatu mai ina ia salamo ma toe foi atu i le Atua.
E Saunia e le Atua ia Toomaga i taimi o Taua
Pe a manaomia ona mafatia ia soo o le Atua i aafiaga o taua, e saunia e le Atua toomaga mo i latou. Ina ua ave faatagataotaua ia Alema ma e na mulimuli ia te ia, sa vave ona latou liliu atu i le Alii (tagai i le Mosaea 23:27–28), ma sa vave ona Ia tali mai: “Ma o le a Ou faamamaina foi avega ua tuu i o outou tau’au, e oo ia te outou tou te le lagonaina i latou i luga o o outou tua, ao outou i ai lava i le pologa; … ina ia mafai ona outou iloa ma le mautinoa o A’u, o le Alii le Atua, e asiasi atu i o’u tagata i o latou puapuaga” (Mosaea 24:13–14).
Sa faamatala e Iakopo ē e loto mama o ona aso, “Ia outou tepa taulai atu i le Atua ma le mausali o le mafaufau, ma tatalo atu ia te ia ma le faatuatua tele, ma o le a ia faamafanafanaina outou i o outou puapuaga, ma o le a ia aioia a outou tagi, ma auina ifo faasalaga i luga o i latou o e latou te saili lo outou faafanoga” (Iakopo 3:1).
Ua faamautinoa mai e perofeta o nei ona po lenei upumoni. Sa aoao mai Elder Joseph B. Wirthlin (1917–2008) o le Korama a Aposetolo e Toasefululua, “E ui atonu e le faalavelave mai pea le [Atua] i le aluga o mea e tutupu, ae ua Ia folafolaina mai le filemu moni e oo lava i taimi o tofotofoga ma faigata.”7
Sa saunoa mai Peresitene Benson, “E tusa lava pe oo mai taimi e le saogalemu ai, … afai tatou te faalagolago atu i le Atua ma tausi ana poloaiga e le tatau ona tatou matatau.”8
Ua Valaauina Nisi e Tutu o ni Molimau e tetee atu i le Amioleaga
E ui e mafai ona laveaiina mai soo o Keriso mai taua, ae e i ai nisi o soo ua valaauina ina ia puapuagatia pe feoti foi ina ia avea ma ni molimau e faasaga i le amioleaga. O se faiga faasaua moni lenei e faigata ona taliaina pe malamalama foi i ai. Ua toe faamanatu mai ia i tatou e Elder Neal A. Maxwell (1926–2004) o le Korama a Aposetolo e Toasefululua faapea “e le faapea o le a puipuia atoatoa mai ē faamaoni mai mea e tutupu i lenei paneta.”9 Ua faailoa mai e Peresitene Hinckley faapea o nisi o i tatou “e mafai ona valaauina ina ia puapuagatia.”10
Na faasaoina i le Tusi a Mamona ni nai mea na tutupu o sauaga le alolofa ma mataga ina ia fesoasoani ia i tatou ia malamalama pe aisea e mafatia ai ma feoti i taua i nisi o taimi ia soo o le Alii, e aofia ai perofeta faapea foi ma fafine ma tamaiti ta’umamaina. Mo se faataitaiga, sa saisai e ositaulaga amioleaga a le Tupu o Noa le perofeta o Apinati “ma susunu lona tino i fusi laau, ioe, seia oti.” A o lei oti Apinati sa ia molimau atu, “Afai tou te fasiotia a’u, o le a outou faamasaaina se toto lē sala, ma o le a tu foi lea o se molimau faasaga ia te outou i le aso gataaga” (Mosaea 17:10, 13).
O se isi faiga faasaua fasioti tagata lea na tupu i totonu o le Tusi a Mamona, o le taimi lea na susunuina ai e loia ma faamasino amioleaga o le nuu o Amonaea ia fafine ma tamaiti o e na liliu mai faalelotu. Sa ave Alema ma Amoleka i le mea sa faamaturo ai tagata, ina ia vaai i lenei faaumatiaga le alofa.
“Ma ina ua vaai atu Amoleka i tiga o fafine ma fanau o e na susunu i le afi, sa tiga foi o ia; ma sa ia fai atu ia Alema: E mafai faapefea ona ta vaai atu i lenei vaaiga leaga matautia? O lea, ia ta faaloaloa atu o ta lima, ma faaaoga le mana o le Atua lea ua ia te i taua, ma laveai i latou mai apeafi mumu.”
Sa tali atu Alema, “Ua taofia au e le Agaga ia aua nei ou faaloaloa atu lo’u lima; aua faauta ua aveina ae i latou e le Alii ia te ia lava, i le mamalu; ma ua ia tuuina ia mafai ona latou faia lenei mea, pe ia mafai e tagata ona faia lenei mea ia te i latou, e tusa ma le maaa o o latou loto, ina ia tonu faamasinoga o le a ia faia i luga o i latou i lona toasa; ma o le a tutu mai toto o e ua mama o se molimau e faasaga ia te i latou i le aso gataaga” (Alema 14:10–11).
O Tagata Amiotonu O E Maliliu i Taua e Ulu Atu i le Malologa o le Alii
A o tatou faavauvau i le maliu o se tagata faamaoni e pele ia i tatou, o loo faamautinoa mai e le Tusi a Mamona faapea ua latou ulu atu i le malologa o le Alii ma o loo fiafia. Na tuuina mai faapitoa lava manatu o Moronae e uiga i lenei autu, “Ona e tuu e le Alii e amiotonu ia fasiotia, ina ia mafai ona oo mai o lona faamasinotonu ma lana faamasinoga i luga o e amioleaga; o lea e le tatau ai ona outou manatu faapea ua malaia e amiotonu ona ua fasiotia i latou; ae faauta, latou te ulu atu i le malologa o le Alii lo latou Atua” (Alema 60:13).
Ina ua mavae se taua lea na taatitia ai “tino o le tele o afe o tagata … ua palanai i faupuega i luga o le eleele,” e aofia ai nisi o le au soo faamaoni o Keriso, sa faamaumauina i le Tusi a Mamona faapea o tagata na sao mai “sa faanoanoa moni i le toesea o tagata o o latou aiga, peitai sa latou olioli ma fiafia i le faamoemoe, ma e oo lava i lo latou mautinoa, e tusa ma folafolaga a le Alii, e faatutu mai i latou e mau i le itu taumatau o le Atua, i se tulaga o le fiafia e le gata” (Alema 28:11–12).
O Le Alii o le Filemu
Na aumai le Tusi a Mamona ina ia faamanuiaina ai i latou o e o ola i taimi o taua ma fetauaiga. O mea na tutupu ma aoaoga o loo faamaumauina i totonu o lenei tusi o loo laualuga ai le faamoemoe, tuuina atu o le faamafanafanaga, ma saunia ni vaaiga faalelagi. Ua tatou aoaoina o le usiusitai i le Atua e laveaiina mai ai le toatele, o taua e mafai ona avea ma se valaau e toe foi atu ai i le Atua, ma e saunia e le Atua ia toomaga mo Ona soo o e manaomia ona mafatia. Ua tatou aoaoina foi o e amiotonu ua valaauina e maliliu i taimi o taua po o fetauaiga o le a tutu o ni molimau e faasagatau i tagata amioleaga ma o le a ulu atu nei soo i le malologa o le Alii.
Ma le mea mulimuli, ua aoaoina i tatou e le Tusi a Mamona i le auala e mafai ai e soo o Keriso ona maua le filemu i o latou loto, aiga, faapea ma malo. O se meafaigaluega sili ona taua e aumai ai i tatou ia Iesu Keriso, le Alii o le Filemu.
O nisi o soo, faapei o Apinati (o loo faaalia i luga faapea foi i lalo), sa tofia e puapuagatia pe oti ina ia tu o se molimau e faasaga i tagata amioleaga.
Luga: Sa onosaia lava e Nifae le saisaiina o ia mo aso e fa seia oo ina salamo Lamana ma Lemuelu ma tatalaina o ia (tagai i le 1 Nifae 18:9–21). Taumatau: E lei i ai ma se tasi o le autau o alii talavou e 2,000 a Helamana na fasiotia i le taua (tagai i le Alema 56:44–57).
Agavale: Sa Latou Faasaua Tele ia te A’u, saunia e Walter Rane, faaaloaloga a le Falemataaga o Talafaasolopito a le Ekalesia; taumatau: Sa Latou Faalagolago i le Atua, saunia e Walter Rane, faaaloaloga a le Falemataaga o Talafaasolopito a le Ekalesia
Sa vaai ia Eteru (luga) ma Moronae (itulau e 34) i le faaumatiaga o o laua nuu ona o le taua (tagai i le Eteru 13:13–14; Moronae 1:1–4).
Agavale pito i luga: Sa Faamaufaailogaina e Apinati Lana Molinau, saunia e Ronald Crosby, e le mafai ona kopiina; agavale pito i lalo: Ua Molimau Atu Apinati, saunia e Walter Rane, faaaloaloga a le Falemataaga o Talafaasolopito a le Ekalesia; taumatau: Na Ofoofogia ia Valoaga a Eteru, saunia e Walter Rane, faaaloaloga a le Falemataaga o Talafaasolopito a le Ekalesia
Sa Oo Foi Ina Tuua Na o A’u, saunia e Walter Rane, faaaloaloga a le Falemataaga o Talafaasolopito a le Ekalesia