Ua Saunoa Taitai o le Ekalesia i Faauuga i Hawaii, Idaho, Iuta
Na malaga taitai o le Ekalesia i aoga a le Ekalesia i Hawaii, Idaho, ma Iuta, ISA, ia Aperila e tuuina atu ni upu apoapoai i le au faauu.
Sa tuuina atu se fautuaga i tamaiti aoga o le Iunivesite o Polika Iaga–Idaho i le aso 7 o Aperila, 2012, e Elder M. Russell Ballard o le Korama a Aposetolo e Toasefululua faapea, ia “sui le fefe i le faatuatua.”
“Ou te talitonu ua tatou tutu nei i le amataga o se vaitaimi fou o le faatupulaia, uluola, ma le tamaoaiga,” na ia saunoa ai. “Ou te uunaia outou ina ia faia se tautinoga ia te oe lava ia ma le Tama Faalelagi ina ia tuuto atu lou ola ma faapaiaina ou taimi ma taleni i le fausiaina o le Ekalesia a Iesu Keriso ma ia tulimatai atu i le toe Afio Mai Faalua o le Faaola.”
Na asia e Elder D. Todd Christofferson o le Korama a Aposetolo e Toasefululua le Kolisi Faapisinisi a le AAG i le Aai o Sate Leki, Iuta, i le aso 13 o Aperila, 2012, e tuuina atu le saunoaga faapitoa i tamaiti faauu mai setete uma e 50 o le IS ma atunuu e 67.
Na ia faamamafa atu le manaoga mo tamaiti aoga ina ia auauna atu i o latou olaga atoa. “O le auauna atu o le a avea ma puipuiga i le manatu faapito ma le manatu e te maua mea uma lava lea e faaleagaina ai pea lava pea ia atunuu i le salafa o le lalolagi. … O lau auaunaga o le a faamanuiaina ai isi, ae o le a puipuia ai foi oe,” na ia saunoa ai.
O le aso na sosoo ai, na tuuina atu ai e Elaine S. Dalton, o le peresitene aoao o Tamaitai Talavou, nei upu apoapoai i tamaiti aoga i le BYU–Hawaii: “Manatua po o ai oe.” Galue malosi. “Saunia oe lava mo le fili.” “Miti mo mea tetele.” “O tagata manumalo e le o taimi uma e tini muamua ai.”
“Momo’e i lau malafoni o le faatuatua ma le olaga,” sa ia saunoa ai. “Aua le lotovaivai ona o a’ega, ae vaai mo le avanoa i taimi faigata. Alu ma se vae mautu ma se malamalama mausali e le tuua lava na o oe. … Ou te talitonu moni lava e mafai e se alii talavou po o se tamaitai talavou amiomama e toatasi o loo taitaia e le Agaga ona suia le lalolagi.”
O le aso 19 o Aperila, 2012, na faalogo ai tamaiti faauu o le BYU i Provo, Iuta, ia Elder Dallin H. Oaks o le Korama a Aposetolo e Toasefululua, o saunoa e uiga i luitau o le lalolagi ae sa ia tau atu i le au faauu ina ia taulai atu ma le faatuatua i le lumanai.
“E ui lava e oti foi tagata i le matatau, e tatau ona e matau. Na i ai lava taimi faigata,” o le saunoaga lea a Elder Oaks. “O i matou, o tupulaga a o outou tuaa, ua manumalo mai luitau, ma e faapena foi outou. … O loo i ai so tatou Faaola, ma ua ia aoaoina i tatou i mea e ao ona tatou faia.”
Na faalogologo ia tamaiti faauu o le Iunivesite o Polika Iaga i Provo, Iuta, ISA, ia Elder Dallin H. Oaks o le Korama a Aposetolo e Toasefululua i le aso 19 Aperila, 2012.
Ata mai le Faaaloaloga a le BYU–Provo