Manatu mo Afiafi Faaleaiga
O lenei lomiga e aofia ai tusiga ma gaoioiga e mafai ona faaaoga mo afiafi faaleaiga. O nisi nei o faataitaiga.
“Atiina Ae o le Faatuatua ia Keriso,” itulau 12: I le faaiuga o le tusiga, na saunoa ai Elder Christofferson i le avea o le faatuatua o se mataupu faavae o le faagaoioi ma le mana. I le avea o se aiga, mafaufau i le talanoaina o nisi o luitau o feagai ma oe ma sini e mafai ona e faatuina e foia ai. Filifili se sini se tasi e galue ai i lenei vaiaso, ma manatua, faatasi ai ma le fesoasoani a Iesu Keriso, tatou te maua le mana e fai ai mea uma, e tusa ai ma Lona finagalo ma Lana taimi. I se afiafi faaleaiga o sosoo ai, atonu e te manao e talanoaina le alualu i luma o lou aiga i le sini na e faatuina.
“Faasoaina atu o le Talalelei e ala i le Faasoaina atu o Oe Lava,” itulau 16: Ao e faasoa atu tala mai tusiga, fesili atu i lou aiga e mafaufau i uo ma tagata o aiga e mafai ona faasoa i ai le talalelei. Talatalanoa pe faapefea ona avea ma se uo ma faalogologo atu ma le alofa ma pe a oo mai avanoa e tuuina atu ai le molimau, ua e saunia.
“Tatalo o le Alualu i Luma o le Tagata Lava ia,” itulau 58: Faitau le aafiaga a Amalia i le aoaoina e tatalo i le taeao faapea foi ma le po. Mafaufau e faitau le aoaoga a Amoleka i le Alema 34:17–27 i le auala e tatau ona tatou tatalo ai. Atonu e te manao e fesili atu i tagata o lou aiga po o a aoaoga ua tuuina mai e nei fuaiupu e uiga i le auala ma po o afea foi tatou te tatalo ai. Faaiu i le tuuina atu o lau molimau i le mana o le tatalo.
“Uo Faifeautalai,” itulau 60: A maea ona faitau le tusiga, mafaufau i le faia o se lisi o gaoioiga ma fonotaga ua lata mai a le Ekalesia e ono fiafia i ai uo a tagata taitoatasi o le aiga. Atonu e te manao e faataitai ma faatino auala e valaaulia ai uo i se tasi o gaoioiga. Talanoa e uiga i le avea ai ma se uo moni, ae maise lava ia i latou e le o ni tagata o le Ekalesia. Faaiu i le faia o se fuafuaga e faafesootai le uo ma tuuina atu i ai le valaaulia.
O i Matou o se Aiga Fiafia
O le afiafi faaleaiga sili ona matou fiafia i ai matou te manatuaina o le afiafi faaleaiga lea na faia i se taimi faigata lava. Ona o se suiga i le pulega o galuega, sa feagai ai lou toalua ma ni luitau tau i le galuega ma sa lagonaina le lotovaivai.
Na matou filifili o le afiafi faaleaiga i lena vaiaso o le a faamamaluina ai o ia. Na tusia e tagata uma o le aiga se tusi faafetai, e tau atu ai matou te alolofa ia te ia ma le mea matou te faamoemoeina mo ia. Ona matou faia lea o se tusi ata o le aiga i taimi faapitoa, e pei o aso faailogaina, faaipoipoga, faamauga, aso fanau, ma isi gaoioiga. Na matou tusia se faamatalaga i talaane o ata taitasi, ae faaiuina i le “Ma o i matou o se aiga fiafia.” I le faaiuga o le afiafi, na ma usuina ma lau tama teine se pese Peraimeri o loo i ai se fuaiupu faapena (tagai i le “O se Aiga Fiafia,” Tusipese a Tamaiti, 198).
Na matou lagonaina i le taimi o le afiafi faaleaiga le alofa o le Faaola mo i matou ma le alofa o le tasi i le isi.
Ou te faafetai mo le poloaiga musuia ia faia afiafi faaleaiga. O le usitai i ai ua faamalolosia ai i matou, ma saunia ai i matou e avea ma se aiga faavavau.
Kenia Duarte dos Santos, Pasila