Aoao e Faitautusi
“Na fanaua e matua lelei, o lea na aoaoina ai au teisi i le poto uma o lou tama” (1 Nifae 1:1).
Ina ua ono ou tausaga, na ou tauivi e aoao le faitautusi. Na fai mai lou faiaoga e manaomia lou toe nofo i le vasega muamua. Na popole lou tama ina ua faalogo i lenei mea. Ma o po uma lava pe a maea le ‘aiga o le afiafi, ma te faataitai ai le faitautusi ma ia. Na faia e Tama se taaloga faitautusi ina ia faatumau ai lou fiafia. Na vave ona ou iloaina upu pe a ou vaai i ai, ma na tauia a’u e Tama i le faaviivii ma le faamalosiau. Na ma faaaluina le tele o itula e faitau faatasi ai, ma na faaleleia lo’u tomai.
Na filifili lou faiaoga e sii au i le vasega lua. Na mitamita lou Tama ia te au. Na fiafia pea o ia i lou alualu i luma i le aoga. Na ia faatauina mo au ni tusi na ia iloa o le a ou fiafia i ai mo le Kerisimasi.
Na maliu lou Tama i le kanesa, i ni nai masina talu ona maea lau aoga maualuga. E lei ola o ia e vaai ia te au o faauu mai le kolisi po o le aoga faafomai, ae na lava le umi o lona ola e iloa ai na ou aoao e fiafia e faitautusi. Na ia maua ai le faamalieina sili.
E lei avea matou ma lou aiga ma ni tagata o le Ekalesia. O se tasi aso a o ou i ai i le aoga faafomai, na ou aumaia ai se tusi mai le faletusi e ta’ua O le Galuega Taua ma le Ofoofogia. Na tusia e se Aposetolo e igoa ia Elder LeGrand Richards. O le tusi atoa lava sa faatatau i le Ekalesia a Iesu Keriso o le Au Paia o Aso e Gata Ai. Na ou faitauina le tusi ma toe faitau. Na ou suesue ma tatalo e uiga i le tusi. Na saunia au e le tusi e auai i le Ekalesia i ni nai masina mulimuli ane.
Ina ua maea ona papatisoina au, na ou iloa e mafai ona ou alu i le malumalu ma papatisoina mo lo’u tama. Na ia faia se eseesega tele i lo’u olaga. Ua iu ina mafai ona ou faia se mea faapitoa e faafetai ai ia te ia mo mea uma na ia faia mo au.
O loo ou fiafia pea e faitautusi. O le meaalofa na tuuina mai e lou tama ua faamanuiaina ai lou olaga i aso uma a o ou faitauina tusitusiga paia ma upu a perofeta.
Ata na tusia e Jared Beckstrand