Tausia o Lou Olaga ia Paleni
Mai se saunoaga i le konafesi aoao ia Aperila 1987.
O nei fautuaga e valu e mafai ona fesoasoani ia te oe e feagai ai ma luitau e tele o le olaga e aunoa ma le lagonaina o le lofituina.
O le onosaia o luitau faigata ma eseese o aso uma o le olaga, lea e le o se galuega faigofie, e mafai ona faaleagaina le paleni ma le filemu o loo tatou sailia. E tele tagata lelei o loo matua taumafai e faatumau le paleni, ae peitai latou te lagonaina i nisi taimi le lofituina ma le faatoilaloina.
E i ai ni nai au fautuaga ou te faamoemoe o le a aoga ia te outou o loo popole i le tau faapaleniina o manaoga o le olaga. O nei fautuaga e faigofie lava; o o latou manatu faavae e faigofie lava ona le iloaina pe afai e te le faaeteete. O le a e manaomiaina se tautinoga malosi ma se loto pulea patino ina ia faaofi ai nei fautuaga i lou olaga.
1. Faamautuina o Mea e Faamuamua
Mafaufau i lou olaga ma faatulaga au mea e faamuamua. Saili soo sina taimi filemu e mafaufau loloto ai e uiga i le mea o loo e alu i ai ma le mea e te manaomia e fai e oo ai iina. O Iesu, lo tatou faataitaiga, sa masani ona “maliu o ia i le mea tuufua, [ma] tatalo ai” (Luka 5:16). Tatou te manaomia le faia pea o lea lava mea e tasi e faafouina ai i tatou faaleagaga e pei ona faia e le Faaola.
Tusi i lalo galuega e te manao e faataunuu i aso taitasi. Ia faamuamua i lou mafaufau feagaiga paia na e osia ma le Alii a o e tusia i lalo au fuafuaga mo aso taitasi.
2. Faatu ni Sini e Te Mafaia
Ia faatu ni sini pupuu e mafai ona e ausia. Faatu ni sini e paleni lelei—e le tele naua e le itiiti foi ma e le maualuluga tele pe maualalo tele foi. Tusi i lalo au sini e te mafaia ma galue i ai e tusa ai ma lo latou taua. Tatalo mo le taitaiga faalelagi i le faatuina o au sini.
3. Paketi ma le Atamai
E feagai tagata uma ma luitau tautupe i le olaga. E ala atu i le paketiina ma le atamai, puleaina o mea moni e te manaomiaina ma fuaina ma le faaeteete i mea e tele e te manao ai i le olaga. Na fai atu le perofeta o Iakopo i lona nuu: “O le mea lea, aua le faaaluina tupe mo mea ua leai se aoga, po o a outou galuega mo mea e le ma’ona ai” (2 Nifae 9:51).
Manatua ia totogi i taimi uma se sefuluai atoa.
4. Fausia ni Sootaga
Ia vavalalata ma ou matua, aiga, ma uo. O le a latou fesoasoani ia te oe ia paleni lou olaga. Fausia ni sootaga ma lou aiga ma uo e ala i fesootaiga saoloto ma faamaoni.
O sootaga lelei faaleaiga e mafai ona faatumauina e ala atu i le fesootaiga malu, alofa, ma manatu alofa. Ia manatua o se tepa atu, faaivi o le mata, lue o le ulu, po o se pai atu o le a sili atu nai lo upu. O se agamalie ma le faalogo lelei o ni vaega taua foi o le fesootaiga lelei.
Suesue i Tusitusiga Paia
Sailiili i Tusitusiga Paia latou te ofoina mai se tasi o punaoa aupito sili o loo ia i tatou e fesootai ai pea ma le Agaga o le Alii. O se tasi o ala na ou maua ai lou iloa mautinoa o Iesu o le Keriso na auala mai lea i lou suesue i tusitusiga paia. Na valaauina e Peresitene Ezra Taft Benson (1899–1994) ma Gordon B. Hinckley (1910–2008) i tagata o le Ekalesia ia avea le suesue i le Tusi a Mamona o se mausa i aso taitasi ma o se sailiga i le olaga atoa.
O le fautuaga a le Aposetolo o Paulo ia Timoteo o se fautuaga lelei mo i tatou taitoatasi. Na ia tusia, “O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:16).
Ata na tusia e Cary Henrie
6. Ia Tausia Lelei Oe Lava ia
E toatele tagata, e aofia ai ma au, e faigata ona maua se taimi e lava ai se malolo, faamalositino, ma toafimalie. E tatau ona tatou faatulagaina le taimi ia tatou kalena o aso taitasi mo nei gaoioiga pe afai e ao ona tatou fiafia i se olaga maloloina ma paleni. O foliga vaaia lelei faaletino e faaleleia ai lo tatou malualii ma le faaaloalo o le tagata mo ia lava.
Ola i le Talalelei
Ua aoao soo mai perofeta e tatau i aiga ona aoao e le tasi le isi i le talalelei, afai e mafai, i se afiafi faaleaiga i vaiaso taitasi. O lenei faiga masani faaleaiga, afai tatou te le matua faaeteete, e mafai ona see malie ese atu mai ia i tatou. E le tatau ona tatou maumaua lenei avanoa faapitoa e “aoao i le tasi mataupu faavae o le malo” (MF&F 88:77), lena o le a taitaia aiga i le ola faavavau.
O loo galue pea Satani e faaumatia a tatou molimau, ae o le a leai sona mana e faaosooso pe faalavelave ia i tatou e sili atu i lo tatou malosi e tetee atu pe afai o loo tatou suesue i le talalelei ma ola i ona poloaiga.
8. Tatalo Soo
O lau fautuaga mulimuli ia tatalo soo o ni tagata taitoatasi ma o ni aiga. E mafai ona e iloa faaiuga sao e fai i aso taitasi e ala atu i le tatalo e le aunoa, ma le faamaoni.
Na aotele e le perofeta o Alema le taua o le tatalo i upu nei: “Ia outou faamaualalalo outou lava i luma o le Alii, ma valaau atu i lona suafa paia, ma mataala ma tatalo e le aunoa, ina ia le faaosoosoina outou i luga atu o le mea e mafai ona outou lavatia, ma faapea ona taitaiina ai outou e le Agaga Paia, ma lotomaualalalo ai, agamalu, agamalolo, onosai, tumu i le alofa ma le tali-tiga atoa” (Alema 13:28). Pe afai o loo ou maua le agaga, ou te iloaina o le a sili atu ona faigofie ona ou faapaleniina mea uma i lou olaga.
Ia Taulai Atu Pea ma Fai Le Mea Sili e Te Mafaia
O nisi fautuaga e mafai ona faaopoopo i nei fautuaga. Ae peitai, ou te talitonu afai tatou te taulai atu i ni nai faamoemoega autu, o le a mautinoa lo tatou mafaia ona pulea le tele o manaoga e aumaia e le olaga ia i tatou. Manatua, o le tele naua o se mea e tasi i le olaga e mafai ona le paleni ai lo tatou olaga. A o le taimi lava lea e tasi, o le laitiiti tele o mea taua e mafai ai foi ona tupu ai le mea lava lea e tasi. Na fautua mai le Tupu o Peniamina “[ia] faia nei mea uma i le poto ma le faatulagaga lelei” (Mosaea 4:27).
E masani lava o le leai o se faasinomaga manino ma ni sini e mafai ona maimau ai lo tatou taimi ma le malosi ma saofaga ai i le le paleni i o tatou olaga. O se olaga ua le paleni e pei lava o le pa’u o le taavale ua le paleni. O le a avea ma mea e alu salutulutu ai le taavale ma le le saogalemu. O pa’u taavale e paleni atoatoa e mafai ona maua ai se malaga sololelei ma le toafimalie. Ua faapena foi le olaga.O le malaga i le olaga faaletino e mafai ona sili atu le sololelei mo i tatou pe a tatou taumafai e tumau i le paleni. O la tatou sini autu lava o le tatau lea ona saili atu i le “tino ola pea ma le ola faavavau” (Mose 1:39). I le avea ai o lenei mau ma a tatou sini, aisea la tatou te le aveesea ai mai o tatou olaga mea na e malomaloā ma faaumatia ai o tatou mafaufauga, lagona, ma malosiaga ia e le o saofaga i lo tatou ausiaina o lena sini?
E lei leva talu ai nei, na fai mai ai se tasi o lau fanau, “Tama, o nisi taimi ou te mafaufau ai pe mafai ea ona ou faia.” O le tali na ou tuuina atu ia te ia e tutusa ma lea o le a ou tuuina atu ia te outou. Tau lava o le faia o le mea sili e te mafaia i aso taitasi. Fai mea autu ma, ae e te lei iloaina, o le a faatumuina lou olaga i le malamalama faaleagaga lea o le a faamautuina atu ia te oe e alofa lou Tama Faalelagi ia te oe. Afai e iloa e se tagata lenei mea, o le a tumu le olaga i faamoemoega ma [ona] uiga, ma faigofie ai ona faatumauina le paleni.