O Lo’u Valaauga Muamua i le Ekalesia

Sa matou auai ma lo’u aiga i le paranesi a le Ekalesia i Frankfurt, Siamani. Sa faamanuiaina i matou i le toatele o tagata lelei sa auai i la matou tamai paranesi. O se tasi o i latou o lo matou peresitene o le paranesi o, Uso Landschulz. …

I se tasi Aso Sa, sa fesili mai ai Peresitene Landschulz pe mafai ona ma talanoa. …

Sa [ia] valaaulia au i totonu o se tamai potuaoga—e leai se ofisa o le peresitene o le paranesi i lo matou falesa—ma o iina sa ia tuuina mai ai ia te au se valaauga ina ia ou galue o se peresitene o le korama a tiakono.

“O se tofiga taua lenei,” sa ia fai mai ai, ona ia faifaimalie lea ma faamalamalama mai le mafuaaga e taua ai. Sa ia faamalamalama mai le mea o loo la faamoemoe mai ai ma le Alii ia te au ma le auala e mafai ai ona ou maua le fesoasoani.

Ou te le manatua le tele o mea sa ia fai mai ai, ae ou te manatuaina o’u lagona. Sa faatumulia lo’u loto e se Agaga e paia ma faalelagi a o ia saunoa mai. Sa ou lagonaina o le Ekalesia lenei a le Faaola. Ma sa ou lagonaina o le valaauga lea sa ia tuuina mai sa musuia e le Agaga Paia. Ou te manatuaina lo’u savali mai i fafo o lena tamai potua’oga ma le lagona ua fai si ou umī atu nai lo le taimi muamua. …

… sa ou lagona le faamamaluina, ma sa ou manao e auauna atu i le mea e gata mai ai lou tomai ma aua nei faatoilaloina lo’u peresitene o le paranesi po o le Alii.

Ua ou iloa nei sa mafai lava ona tau ina tuu mai e le peresitene o le paranesi le valaauga e aunoa ma se mafaufau tele i ai ina ua ia valaauina au i lenei tofiga. Sa mafai lava ona tau ina ta’u mai ia te au i le alasavali po o le taimi o se sauniga perisitua, o au o le peresitene fou o le korama a tiakono.

Ae, sa ia faaaluina le taimi faatasi ma au ma fesoasoani mai ia te au ia ou malamalama e le gata i le o le a o lo’u tofiga ae, o le mea e sili ona taua, o le aisea. …

… O se faataitaiga lea ia te au o le mana musuia o le taitaiga faaleperisitua lea e fagua ai le agaga ma musuia ai ia faatinoga.

Peresitene Dieter F. Uchtdorf, Fesoasoani Lua i le Au Peresitene Sili, “O Le Aisea o le Auaunaga Faaleperisitua,” Liahona, Me 2012, 58.

O Fesili e Manatunatu Loloto i ai:

E faapefea e le taliaina o valaauga o le Ekalesia ona faamalosia oe ma i latou o loo e auauna atu i ai i?
O le a se mea e mafai ona e faia e saunia ai oe lava i le taliaina o se valaauga o le Ekalesia, e tusa lava pe o e pisi?

Mafaufau e tusi ou mafaufauga i lau api talaaga pe talanoaina foi ma isi.