Tatou te Talanoa ia Keriso
Alofa i O’u Fili
Sa ou iloa le poloaiga a le Alii ina ia alofa atu i isi, e aofia ai o tatou fili, peitai a o vaai atu i le fitafita, ou te lei alofa ia te ia.
Sa ou ola ae i se atunuu e pulea e vaegaau a isi malo. E le’i lelei le tausiga o ou tagata e fitafita sa nofoia [lo matou atunuu]. O le toatele o tagata i lo matou taulaga sa ave faapagota, sauaina, tafanaina, po o le fasiotia foi e fitafita e aunoa ma se mafuaaga. I se tasi aso ina ua 16 ou tausaga, sa o mai ai fitafita i lo matou iunivesite ma fana le ulu o se tasi o tamaitiiti aoga. E lua itula e le’i faatagaina ai e nei fitafita e ave o ia i le falemai. Sa amatalia i lena aso se ita i lou loto mo na fitafita. Sa le mafai ona ou faamagaloina i latou mo le tiga sa latou faatupuina i ou tagata ma e le mafai ona ou faagaloina ia foliga o lena tamaitiiti aoga.
Ina ua ou auai i le Ekalesia i le 25 o ou tausaga, sa faigata ona ou alu i le lotu ona o nofoaga sa suesueina ai i matou, o tapu, ma isi mea sa faasa ai le feoai lea na tuuina mai ia i matou. Sa lamatia lou ola i lou solaese mai faanana ina ia mafai ona ou tagofia le faamanatuga ma matou faatasi ma le Au Paia o Aso e Gata Ai. Sa faigata le avea ai na o au o se tagata o le Ekalesia i lo’u aiga ma lo’u nuu. Sa ou fia faatasi ma tagata o le Ekalesia, ae peitai e toeitiiti lava o vaiaso uma e toe faafoi ai au e fitafita.
I se tasi Sapati a o ou taumafai e laasia le nofoaga e siaki ai i matou, sa fai mai ai se fitafita ia te au e le o faatagaina au e alu i fafo ma sa faatonuina au e alu i le fale. Sa ou tilotilo atu i le fitafita ma manatua le fetalaiga a le Faaola: “Alolofa atu i e ua ita mai ia te outou” (tagai i le Mataio 5:43–44).
Sa ou iloaina ai i lena taimi ou te le alofa i lena fitafita. O le inoino sa ou lagonaina a o ou talavou ua mouese atu ina ua ou auai i le Ekalesia, peitai ou te le alofa i e ita mai ia te au. Sa tuuina mai ia i tatou e le Faaola o Iesu Keriso lenei poloaiga, ae sa le mafai e lou loto ona alofa atu i na fitafita sa pulea lo matou atunuu. Sa mamafa ia te au lenei mea mo le tele o aso, aemaise ona sa ou sauni e alu i le malumalu i lena vaitaimi.
I se tasi aso sa ou vaai ai i le mau lenei: “Ia outou tatalo atu i le Tama ma le malosi atoa o le loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso” (Moronae 7:48). Sa ou lagona le talanoa patino mai o Mamona ia te a’u ma faaali mai le auala ina ia alofa atu ai.
Sa ou filifili e ole atu i le Tama Faalelagi mo se fesoasoani. Sa ou anapogi ma tatalo atu mo se fesoasoani ina ia ou alofa atu ai i e ita mai. Ou te lei faalogoina lava se suiga mo le tele o aso, peitai ou te le’i iloaina le suia malie e le Tama Faalelagi o lo’u loto. Pe a ma se tausaga mulimuli ane, a o ou taumafai e pasia se tasi o nofoaga o suesuega, sa tau mai e le fitafita ia te au e le o faatagaina au i totonu. O le taimi la lea sa ese ou lagona. A o ou tilotilo atu i mata o lena fitafita, sa ou lagonaina le alofa ofoofogia mo ia. Sa ou lagonaina le alofa tele o le Tama Faalelagi ia te ia, ma sa ou vaai atu ia te ia o se atalii o le Atua.
Ua ou iloaina nei, e pei o Nifae, e le aumaia e le Alii ia i tatou se poloaiga sei vagana ua Ia saunia se ala mo i tatou e faataunuu ai mea ua Ia poloaiina ai i tatou (tagai i le 1 Nifae 3:7). Ina ua poloaiina i tatou e Keriso tatou te alolofa atu i e ita mai ia i tatou, sa Ia silafia e mafai faatasi ai ma Lana fesoasoani. E mafai ona Ia aoaoina i tatou ina ia alolofa atu i isi pe afai tatou te faalagolago ia te Ia ma aoao mai i Ana faataitaiga maoae.
“E pei lava ona i ai i taimi uma, o Keriso lava o lo tatou faataitaiga. Sa Ia faaali mai le ala i Ana aoaoga faapea foi i Lona Olaga. Sa Ia faamagalo i e amioleaga, e le mafaufau, ma i latou o e sa saili e faatiga ma faamanua ia te Ia” (Dieter F. Uchtdorf, “O Le e Alofa Atu e Alofaina Mai,” Liahona, Me 2012, 76).
Suffer Ye Thus Far, saunia e Walter Rane, e le mafai ona kopiina