Tatalo o le Alualu i Luma o le Tagata Lava ia
Na aoaoina au e ou matua i lo’u olaga atoa e tatalo, ae a o ou tuputupu ae, na o le po lava e fai ai au tatalo patino. Na ou manatu ua lava lena—seia oo ina ua ou ulufale i Tamaitai Talavou.
Ina ua tuuina mai ia te au le tamaitusi o le Alualu i Luma o le Tagata Lava ia, na ou faitauina sini uma lava. Sa i ai se sini se tasi na ou gauai moni atu i ai: o se galuega faatino o le tulaga faatauaina o le faatuatua na fai mai e ao ona faia au tatalo i le taeao e faapena foi ma le po. “Aisea e fai ai i le taeao?” Sa ou fesili ai ia te au lava ia. “O le a le faigofie lena mea mo au.”
Sa faagasolo le taimi, ma na ou le faataunuuina lena sini. Ae na ou naunau e fai, ma e ui lava sa faigata, ae na ou faalagolago i le Alii.
Na foliga mai na tutusa lava mea uma i le taimi muamua. Ae na i ai se mea i totonu ia te au na amata ona sui. Na foliga mai na sili atu ona ou lagonaina le mautinoa i mea uma na ou faia. O a matou misa laiti ma lou aiga na le toe tupu. Pe a ou ala po mo le lotu, na ou le lagonaina le vaivai. Nai lo lena, sa i ai ia te au le manao tele e alu.
Sa i ai se aso faapitoa na ou mafaufau ai ua le lava se taimi e fai ai mea uma na tatau ona ou faia. Ina ua ou ala ae i lena aso, na ou tatalo—e ui lava sa leai se talitonuga tele—o le a i ai se mea e sui. Sa ou ofo i le mea na tupu: Na mafai ona ou faataunuuina mea uma na tatau ona ou faia! Na ou lagonaina le maasiasi i le le faatuatuaina atoa o le Alii ae na matua fiafia lava na Ia tali mai i lau tatalo.
O lenei la ua fai au tatalo i taeao ma afiafi uma, ma ua suia moni ai lava lou olaga.
Ou te iloa e faafofoga mai le Tama Faalelagi ia i tatou ma tali mai i a tatou tatalo. Pau lava le mea tatou te manaomia o le faatuatua ia te Ia. O le a Ia le tuulafoaiina lava i tatou. O loo i ai o Ia iina. Pau lava le mea o lo tatou o atu ia te Ia. Ou te iloa o le folafolaga “tuitui atu, ona toina ai lea ia te outou” e moni (Mataio 7:7). Pau lava le mea o lo tatou tootutuli i lalo, tatalo, ma faatuatuaina Lana taimi, ae le o lo tatou taimi. Ou te faafetai ia te Ia mo le polokalama o le Alualu i Luma o le Tagata Lava ia ma le meaalofa ofoofogia o le tatalo.