Faasoaina atu o le Talalelei e ala i le Faasoaina atu o Oe Lava
O le auala sili lava e faasoa atu ai le talalelei o le ola ai.
Mo nisi o i tatou, o le faasoaina atu o le talalelei o se mea masani. Peitai mo le toatele o i tatou, e le faigofie. O le mea moni, atonu tatou te fefefe e faasoa atu ni mea patino i ni uo, aiga, po o ni tuaoi e talatalanoa ai e uiga i le talalelei, e tusa lava pe tatou te iloa le taua tele o le faia o lena mea.
Ma le isi, o nisi taimi pe a tatou mafaufau e uiga i le galuega faafaifeautalai, e matele la tatou taulai atu i metotia, gaoioiga, po o le taunuuga, nai lo le taulai atu i le auala e fesoasoani ai i le tagata. O le faafitauli, o soo se taumafaiga lava e le o taulai atu i le tagata o le a mafai ona lagonaina i na taumafaiga le fai faamalosi ma le le faamaoni.
Atonu e i ai se auala e sili atu.
O lena auala o le a atili liua mai ai i le talalelei—o ni tagata taitoatasi—ma ia avea faataitaiga o o tatou olaga ma a tatou talatalanoaga faaleuo e tatalaina ai le auala. O le faateleina lava o lo tatou liua, o le faateleina foi lena o lo tatou fiafia i la tatou tapuaiga, ma amata ai ona tatou lagonaina le faateleina o le naunau atu i isi ina ia fiafia i faamanuiaga o le talalelei. Afai ae tupu lena mea, o le a avea ma mea masani le faasoa atu.
O le mea moni, atonu tatou te le o iloa o loo tatou faasoaina atu le talalelei. A o tatou siitiaina le tulaga o le avea ai o i tatou ma soo faamaoni, o lona aafiaga i a tatou faatinoga, gagana, ma e oo foi lava i o tatou foliga o le a faigata ona le amanaiaina. “O le a iloa lelei e isi tagata a outou galuega lelei,” sa faamatala ai e Elder Russell M. Nelson o le Korama a Aposetolo e Toasefululua. “E mafai ona susulu mai le malamalama o le Alii mai o outou mata. Faatasi ai ma lena susulu ua tatau ai ona e saunia e tali ni fesili.”1
Molimau Ola
O loo faamatalaina i le Tala’i La’u Talalelei: O Se Taiala mo le Galuega Faafaifeautalai: “Ua uma ona faaali mai e le Faaola le ala. Ua Ia faatuina le faataitaiga atoatoa, ma ua Ia poloaiina i tatou ina ia avea e faapei o Ia (tagai i le 3 Nifae 27:27).”2 A o aoao tagata o le ekalesia e uiga ia Keriso ma saili e tuu Ona uiga faaleatua i o latou olaga e ala i le mana o Lana Togiola, o le a avea atili i latou faapei o Keriso ma taitai atu ai foi isi ia te Ia.3
Sa tau mai e se tasi o tagata faatoa liliu mai mai Uosigitone, ISA, faapea o le faaaluina o le taimi e faatasi ai ma tagata o le ekalesia sa na o le pau lena o le mea sa ia faia na amata ai ona fiafia i le talalelei. “O le fiafia sa latou aumaia ma ou faalogoga a o matou faatasi ai sa le mafai ona faafitia,” sa ia faasoa mai ai. “Latou te lei talai mai ia te au e uiga i le Atua. Sa i ai lava i o latou ituaiga tagata: o latou ituaiga o olaga, a latou filifiliga, a latou faatinoga ma uiga faaalia. Pe a ou vaavaai atu ia i latou, ou te faapea ifo ia te au lava ia, ‘O le auala lena ou te fia ola ai. O le tulaga lena ou te fia i ai i lenei olaga.’”
A o tatou maua atili le mafanafana o aafiaga o le talalelei i o tatou olaga, o le a faigofie ona talatalanoa i na aafiaga aua ua i ai mea tatou te talanoa ai ma ona ua mafai ona tatou faasoa atu mea sa faia e lena savali mo i tatou.
Sa iloaina e Miriam Criscuolo mai Italia lena mea, e ui lava ina ua uma ona la faavaeina se faigauo anoa ma se tuaoi, ae na te le iloaina lava le auala e talanoa ai e uiga i le talalelei. “Sa ma faaaluina faatasi le tele o taimi, peitai ou te lei mauaina le lototoa e talanoa atu ai i la’u uo fou e uiga i le talalelei, e ui sa ou iloa o lo’u tiute lea ua le faia,” sa ia faasoa mai ai.
Peitai ina ua avea ma masani le talanoa e uiga i le talalelei, na amata ona tutupu mai ni mea. Na manatua e Miriama, “O la’u tama teine lea sa ia faaali maia se galuega faatino a le Peraimeri sa faaosofia ai le fia iloa o la’u uo. ‘O le a le Peraimeri?’ o lana fesili mai lea. Mai lena fesili na fanau mai ai le fiaselau o isi fesili. Sa ou iloaina ua tele tausaga o saili la’u uo mo se mea faapenei. Sa ou tauina atu ia te ia o le filemu o le mafaufau sa ia sailia e maua i la tatou Ekalesia.
“Sa ia auai mulimuli ane i le Ekalesia. Sa avea o ia ma se tali i a’u talosaga e uiga i le sailia o se auala e faia ai le galuega faafaifeautalai ma faaali atu ai i la’u fanau le ala e faia ai.”
Ia Avea ma Uo Muamua
E pei o Miriama, o nisi taimi tatou te lagona ai faapea o se tiute fai faamalosi le faasoa atu o le talalelei ma iloa ai o lenei lagona o le tiute e mafai ai ona tupu mai ni talanoaga fai faamalosi ma le le toafimalie. O le isi mea, e mafai ona lofituina i tatou e le lagona faapea o se tiutetauave, ma faaitiitia ai lo tatou gafatia e faamatala atu ma le lelei ia mataupu faavae o le talalelei.
Atonu o le a maua ni avanoa faamanuiaina faafaifeautalai pe afai o le a avea tagata o le ekalesia ma uo lelei ma le faamaoni i isi. E pei ona ta’ua e Elder M. Russell Ballard o le Korama a Aposetolo e Toasefululua, “Afai tatou te faailoa atu lo tatou auai i le Ekalesia mai lava i le amataga, … o le a taliaina e uo ma e masani o se vaega lena o o tatou olaga.”4
O le faaaofia ai o le talalelei i faigauo o i ai nei nai lo le faavaeina o faigauo i le faasoaina atu o le talalelei e mafai ona faateleina ai le tulaga manuia faafaifeautalai. O Eliana Verges de Lerda, o se tagata o le Ekalesia i Atenitina, sa ia feiloai i lana uo o Anapela a o taufai ono uma o laua tausaga. Sa faatupulaia le la faigauo a o la aooga faatasi. I aluga o lena taimi, e le’i nanaina lava e Eliana le tulaga moni o le avea o ia ma se tagata o le Ekalesia.
“Sa ou lagona le toafilemu pe a ou talanoa atu ia Anapela e uiga i le talalelei, e ui e le tutusa o maua talitonuga,” sa ia fai mai ai.
Ina ua ta’i 14 tausaga o teineiti, sa ioe Anapela e faalogo i faifeautalai, peitai na te lei filifili e papatiso.
Sa faanoanoa Eliana, peitai e lei taofia ai o ia mai le faaauau pea o le la faigauo; e lei taofia ai foi ia talanoaga e uiga i le talalelei. O nai tausaga mulimuli ane, sa valaaulia ai e Eliana ia Anapela la te auai i le seminare. I le taimi o le lesona, sa matuai malosi lava le lagonaina e Anapela o le Agaga. A o sauni Eliana e alu i le malumalu i nai aso mulimuli ane, sa fai atu Anapela ia te ia, “ou te folafola atu ta te o faatasi i se isi taimi e sosoo ai.” Sa papatiso Anapela i sina taimi puupuu mulimuli ane.
O le liua o Anapela e lei faia i ni aso; na tele tausaga na alu ai. Sa mafai lea faagasologa aua sa avea muamua Eliana ma ana uo—e tusa pe sa i ai pe lei i ai foi se naunau o Anapela e talia le talalelei.
Faalogo ma le Alofa
E tele lava ina amatalia ni faigauo e pei o Eliana ma Anapela pe a iloa e tagata e tutusa mea latou te fiafia i ai, tulaga faatonuina, po o nisi mea e masani ai. E faamalolosia nei faigauo pe a faasoa atu e tagata taitoatasi o latou aafiaga, lagona, ma le alofa. Ma e moni o le alofa, o se vaega tutotonu lea o le talalelei toefuataiina.
Tatou te mafai, i le avea ai ma ni tagata o le Ekalesia, ona faailoa atu le alofa faa-Keriso e ala i le faaaluina o le taimi tatou te mafuta ai ma a tatou uo—e ala i gaoioiga, auaunaga, ma talanoaga. O le mea moni, o le toatele o tagata e na o le pau lena o le ituaiga uo o loo sailia.
I le faamatalaina ai o a tatou fegalegaleaiga ma isi, ua fautua mai ai Elder Jeffrey R. Holland o le Korama a Aposetolo e Toasefululua faapea: “E sili atu ona taua le faalogo nai lo le tautala. O nei tagata e le o ni mea faitino e leai ni ola ua natia i ni fuainumera o papatisoga. O i latou o fanau a le Atua, o o tatou uso ma tuafafine, ma o loo latou moomia le mea o loo ia i tatou. Ia e faamaoni. Ia aapa atu ma le faamaoni. Ia fesili i na uo po o le a le mea e sili ona taua ia te i latou. … Ona faalogo lea. … Ou te folafola atu ia te outou e i ai lava se mea o le a latou ta’uina mai o le a faatumutumuina ai pea se upumoni o le talalelei e uiga i se mea e mafai ona e molimau atu ai ma se mea e mafai ona ofoina atili atu.”5
E le manaomia lo tatou osofaia o a tatou uo i le talalelei. Pau lava le mea e manaomia o le avea ma ni uo lelei ma aua nei fefefe e faasoa atu ia manatu faavae o le talalelei pe a tulai mai ni avanoa. E faaaoga e Satani le fefe e taumafai e taofia ai tagata o le ekalesia mai le faasoaina atu o se molimau. O lenei lagona malosi e mafai ona taofia ai le alualu i luma. Sa tau mai e Peresitene Uchtdorf: “O nisi e sili atu ia i latou le tosoina o se taavaletosolima e sopoia ai le laufanua, nai lo le ta’ua o le mataupu o le faatuatua ma tapuaiga i a latou uo. … Latou te popole i manatu o tagata e uiga ia i latou pe ina nei faaleagaina ai foi a latou fegalegaleaiga.” Sa ia faaauau, “E le tatau ona faapena, aua ua ia i tatou se savali fiafia e faasoa atu, ma ua i ai foi sa tatou savali o le olioli.”6
Sa aoao mai le perofeta o Mamona, “E lafo ese i fafo e le alofa ua atoatoa le fefe uma” (Moronae 8:16). A tatou ola atoatoa i le talalelei, o le a mafai ona tatou aveesea le fefe e ala i le suitulaga ai o le alofa mama—le alofa le pona o Keriso—e agai i a tatou uo, aiga, ma tuaoi. O lenei alofa o le a faateleina ai la tatou aga masani o le faasoa atu o le talalelei.7
Faasoaina Atu o le Talalelei i se tulaga Masani
E manaomia e le fanau a le Tama Faalelagi le vaaiga o loo ofoina atu e le talalelei. Mo tagata o le ekalesia o e o mulimuli i le mamanu o le talalelei, o loo avea o latou olaga ma se molimau o le alofa o Keriso. Pe a taulai atu ia tagata o le ekalesia i le avea ma le naunautai faapei o Iesu Keriso, fausiaina o faigauo anoa, ma le atiina ae o le alofa mama, o le a avea le faasoa atu o le talalelei ma se taunuuga masani o tagata ua avea ai i latou. A o latou galulue e faasoa atu pe o ai i latou, o le a maua e tagata o le ekalesia le mafanafana ma le taitaiga i le fetalaiga a le Faaola i Ona soo: “Ua ou faatoga mo oe, ina nei mavae lou faatuatua: a o oe foi, pe a liua mai oe, ona e faamalosi ai lea i ou uso” (Luka 22:32).
Ata na tusia e David Stoker