O Faamanuiaga o le Taulai atu i le Malumalu

Saunia e Joshua J. Perkey

Mekasini a le Ekalesia

E leai se isi galuega e sili atu nai lo le fausiaina o se aiga e faavavau—ma e faataunuuina lena galuega i le maota o le Alii.

E i ai nai mea i le olaga e sili atu ona tatou faanoanoa ai nai lo le maliu o se tasi e pele. Sa lofituina olaga o Epikopo Richard Rodriguez ma lona faletua o, Ruta, e sea ituaiga o faanoanoaga. Ae peitai o le i ai o mata e vaai ai ma taliga e faalogo ai ma e ala atu i sauniga paia o le malumalu, na la faafetaiaia lenei luitau i le faatuatua, lea na taitaia i laua e latalata atili atu i le Faaola, i le fiafia, ma le filemu.

Taulimaina o Faanoanoaga

Sa feiloai ia Richard ma Ruta a o faigaluega i se kamupani gaosi simā i Azogues, o se nuu laitiiti i le atu Mauga o Andes e le mamao mai Cuenca, Ecuador. O Richard o se tagata na liliu mai i le Ekalesia, sa latou liliu mai ma lona tina ma lona uso i nai tausaga na muamua atu. I lena taimi, e lei auai ia Ruta i le ekalesia.

“Ina ua ou feiloai ia Ruta, sa le mafai ona ou tuua o ia,” sa ia fai mai ai a o ataata.

Sa faaipoipo i la’ua i le 1996. I nai masina mulimuli ane, na maliu ai le tama o Ruta.

“O lona maliu na mafua ai se faavauvau matautia i lou olaga,” sa faamatala mai e Ruta. “E le mafai ona aveesea mai lou mafaufau le maliu o se tasi e pele ia te oe. E te lagonaina pea le faanoanoa.”

I le 2001, sa maliu ai le tina o Richard. Sa toe aumaia foi e lenei mea le faanoanoa tele. Peitai i le aluga o tausaga, ua amata ona malosi le malamalama ma le molimau a Richard i le talalelei, ma sa saunia e lena mea se vaaiga toafimalie.

“Ona o le talalelei,” sa ia fai mai ai, “sa ou malamalama teisi ai i le tulaga o lo’u tina. Sa ou faasoa atu ia Ruta le Alema 40:11 ma faamalamalama atu i ai le mea e tupu i le agaga pe a tuua le tino. Sa avea lena mea ma se faamafanafanaga sili mo i maua uma.”

Faatauaina o le Faitalia

Ae peitai, e lei i ai pea se naunau o Ruta i le Ekalesia, e ui sa ia fiafia i tagata o le Ekalesia faapea ma faifeautalai. “Ou te lei maua se lagona e tatau ona sui la’u lotu,” sa ia fai mai ai.

Na filifili Richard e na te le faamalosia lea tulaga. “O taimi uma lava ma te talanoa ai i le Ekalesia, e faaiu leaga lava se talanoaga,” sa ia fai mai. “Ma pe a ou faamalosia o ia, e le lelei le taunuuga. Ma o lea sa tuu ai loa. Ou te lei fia manao e fai lena mea ia te ia.”

I le tautoulu o le 2001, sa valaaulia ai e faifeautalai ia Ruta i se sauniga o le papatisoga. O lana filifiliga e talia le valaaulia na suia ai mea uma.

I le taimi o le sauniga sa faasoa atu ai e le tamaitai sa papatiso lana molimau. “Sa ia talanoa e uiga i vavega na tutupu i lona olaga talu ona ia iloaina le Ekalesia—vavega o le soifua maloloina, soifua manuia, ma le malosi,” sa toe manatua ai e Ruta. “Sa nofo lava lenei tamaitai na o ia ae sa i ai ia te ia lenei molimau.”

Sa mafaufau Ruta pe faapefea e se tamaitai o le sa feagai ma ia ituaiga tofotofoga faigata ona maua lea ituaiga faatuatua. O lena fesili ma le taliaina o le valaauga e auai i le sauniga o le papatisoga na ootia ai le loto o Ruta ma saunia ai o ia ina ia maua se molimau mai le Agaga.

“O le taimi lena sa ou faia ai loa le faaiuga ina ia papatiso. Mulimuli ane, ina ua na o i maua ma Richard, sa ou fai atu, ‘Richard, o le a sou manatu pe a ou papatiso ia Tesema?’ Ma o le mea lena. Ua leva ona ou masani i le Ekalesia ma le talalelei. Ae sa manaomia pea ona ou faalogo i lesona mai faifeautalai.”

“E saunia e le Atua ia loto o tagata,” o le faaopoopo mai lea a Richard. “E mafai e i tatou lava ona faia nisi mea. Sa ou faia ni mea se tele, peitai ana le saunia lava Ruta e le tupu lenei mea.”

Na ioe Ruta: “Sa tele ni o’u luitau e foia ina ua ma faaipoipo. Ina ua uma ona foia na luitau, sa ou iloaina ai i lena taimi e le manaomia ona ou toe faatali mo se isi vavega i lo’u olaga. O le taimi lena sa ou saunia ai e papatiso.”

Fetaiai ma Luitau i le Faatuatua

O le papatisoga o Ruta ia Tesema 2001 na faailogaina ai se suiga i le mea e taulai atu i ai lo latou aiga. Na oo mai faatasi ma lena suiga le malosi faaleagaga ma faamanuiaga lea na taialaina i latou e oo mai i lenei aso.

“Sa ma faamau i le malumalu i le aso 28 o Iuni, 2003,” o le tala lea a Richard. “Ona o lena mea, ua tele faamanuiaga ua oo mai i o matou olaga. Sa faamau le ma fanau matutua e toalua ia i maua, a o le ma fanau e toalua na sosoo ai na fananau mai i totonu o le feagaiga. O se faamanuiaga le ma fanau.”

Sa faamatalaina e Richard faapea o le auauna atu ma le faamaoni i le Ekalesia ua aumaia ai le lotogatasi i totonu o lo matou aiga: “O loo ma amo faatasi ma le lotogatasi ma lou toalua. Sa ma fetaiai ma luitau ma tofotofoga, ae ua mafai ona ma manumalo faatasi mai ai. E tutusa mea ma te talitonu ai. O le faamauina i le malumalu, ua ma iloa ai afai ma te tumau ma le faamaoni, o le a fesoasoani mai le Alii ia i maua.”

O Le Taulai atu i le Malumalu e Suia ai le Uarota

Ina ua papatiso Ruta, sa na o le 25 tagata o le ekalesia sa nonofo ai i le taimi lena sa avea ma Paranesi o Azogues. Ua avea nei ma se uarota, e tele lava a le 75 pe sili atu foi tagata o le au paia e auai i le sauniga faamanatuga.

“Tou te faamalolosia tagata taitoatasi pe a outou faamalolosia ia aiga,” o le tala lea a Ruta. “A o tausia e tagata o le ekalesia ia poloaiga ma faalogo i mea uma o aoao mai ai i tatou e taitai, ua tatou faamalolosia o tatou aiga ma le uarota. O aiga taitasi e pei o se vaega o le sima lea e taofia faatasi le uarota ina ia mafai ona tuputupu ae.”

A o avea ma se epikopo, sa uunaia ai e Richard ia taumafaiga e faamalolosia ia aiga e ala i le osia ma le tausiaina o feagaiga o le malumalu ma le tapuai soo i le malumalu. O se tasi o faataitaiga lea na faaalia ai lenei faamamafa, o malaga ia faalemalumalu a le uarota i le Malumalu o Guayaquil Ecuador, pe a ma le lima itula le mamao.

“Sa matou auai o se uarota i le tele o taimi sa matou mafaia ai,” o le tala lea a Ruta. “O la matou sini o le faamauina lea o aiga uma i totonu o le malumalu.”

“O le auai atu i le malumalu ina ia faamauina na fesoasoani lea i le tuputupu ae faaleagaga o aiga,” o le faaopoopo mai lea a Richard. “Ua uma ona faamauina i tausaga talu ai nei ni nai aiga. Ma ua latou saunia i le taimi nei igoa o o latou lava aiga ma faatino ia sauniga mo o latou tuaa. O i latou o e ua atiina ae se tautinoga sili o le talalelei a Iesu Keriso ma ua mauaina le fiafia sili. Ua suia e le malumalu le vaaiga mamao a tagata o le ekalesia.”

O Le Taulai Atu i le Malumalu ua Suia ai Tagata Taitoatasi

E ala atu i aafiaga paia ma le patino, ua maua ai e le aiga o Rodriguez se molimau mamana ma le faapitoa e uiga i feagaiga o le malumalu ma le faatinoina o galuega sui mo augatuaa.

“Ua uma ona matou faatinoina le galuega mo uso ma tuafafine o lo’u tama,” sa fai mai ai Ruta. “Sa matou lagonaina e tatau ona matou faia e i matou lava le galuega mo o matou aiga. Ou te iloa o le galuega e fai ma sui lea matou te faia e moni. Ou te lagonaina le filemu sili i le galuega o loo matou faia mo o matou tuaa. O loo avea lenei mea ma se galuega sili ona faapitoa.”

Sa molimau mai Richard, “Ou te fiafia e fai galuega o le malumalu mo i latou o loo faatalitali mai. O le galuega lenei mo lo tatou olaga atoa. O le mea lenei tatou te mananao e fai.”

O le auai atu i le malumalu ua suia ai lo latou aiga. “Ina ua faamauina i matou i totonu o le malumalu, na tele ni mea na matuai suia,” o le tala lea a Ruta. “Sa faatupulaia lo matou malosi faaleagaga.”

E ioeina e Richard: “Mo lo matou aiga, ua faateleina ai le lotogatasi faaleaiga, i le iloaina o le sootaga faaleaiga, o le taunuuga lava lea o le amataga ma le gataaga o mea uma, ma ua aumaia ai ia i matou le malosi e agai ai i luma. E i ai lava pea ia luitau i le olaga. Ae faatasi ai ma le taulaiga lea e aumai e le malumalu ia i tatou, ua mafai ai ona tatou fetaiai ma le lumanai i se auala e ese ai. O le mafai ona faasoa atu o nei faamanuiaga—ma aemaise lava ina ia fesoasoani ai i isi aiga ina ia faia foi faapena—ua aumaia ai le olioli tele i o tatou olaga. Ua ou lagona ai se tuuto sili atu i lo matou aiga.”

Na lagona e Richard o le faaiuga a le aiga e saunia e o i le malumalu, maua sauniga, ia faamau, ona toe foi atu lea e faatino ia galuega sui mo o latou tuaa ua avea ma se tasi o o latou faamanuiaga sili. “Afai tatou te faaaogaina le faatuatua ma talia le talalelei toefuataiina a Iesu Keriso aemaise lava pe a tatou o i le malumalu ina ia maua sauniga faamau ma sauniga faaola e ala i le perisitua, o le a suia olaga,” sa ia fai mai ai. “Ua le toe tutusa lava le tagata lea na maua ia feagaiga o le malumalu.”

Luga: Richard ma Ruth Rodriguez ma le la fanau (mai le agavale): Maria Judith, Jorge, Richard Jr., ma Freddy. Sa faamauina i latou i le Malumalu o Guayaquil Ecuador (taumatau).

Ata o le aiga na pueina e Joshua J. Perkey