Faifeau Faamisiona Matutua: O Le Tali Atu i le Valaau a le Perofeta
O loo talanoa mai faifeau faamisiona matutua i le salafa o le lalolagi e faatatau i taui sili o le faatoilaloina o faafitauli i le auauna atu i ni misiona.
Sa saofafai ia Chanta ma Sounthara Luangrath i lo la fale i Kalefonia, ISA, ma mafaufau po o le a se mea e tatau ona la faia. Sa la saunia le la fanau e toafa e auauna atu i ni misiona, ma ua la iloa nei ua oo i lo la taimi. Ua tele atu le la faaiuga nai lo le mea sa la mafaufauina: o le a la matuai misia lava ia fanau a le la fanau! Sa la popole foi e uiga i nai faafitauli tau le soifua maloloina. Ma pe faapefea lo la fale ma meaafale pe a la malaga ese?
O popolega a le au Luangraths e uiga i le auauna atu i se misiona e le o se mea fou ia i laua. O le mea moni, sa faailoa mai e Elder Robert D. Hales o le Korama a Aposetolo e Toasefululua ni vaega se fa o faafitauli i le galuega a le au faamisiona matutua; fefe, popolega faaleaiga, mauaina o le avanoa sa’o e faamisiona ai, ma mea tautupe.1
O le faatoilaloina o nei faafitauli e manaomia ai le faatuatua tele, o se uiga ua faaalia e le au Luangraths ina ua la faalogo i le valaau a Peresitene Thomas S. Monson mo nisi faifeautalai i le konafesi aoao ia Oketopa 2010. “Sa ma lagonaina le malosi tele o le Agaga,” sa la tomanatu ai. “Sa ma mananao e mulimuli i le perofeta, o lea sa ave ai i totonu o ma pepa mo le misiona.”
Sa valaauina le au Luangraths e avea o ni faifeau faamisiona mo fesoasoaniga agaalofa i Lao, o le laueleele sa la fananau ai, ola ae ai, ma faaipoipo ai. Sa mouese atu o laua popolega a o la sauni e auauna atu: sa lagolagoina i laua e o la aiga, sa la foiaina o laua faafitauli tau le soifua maloloina, ma faaavanoa lo la fale mo le lisiina atu. Sa laua lagona le mautinoa a o la faia le mea ua poloai mai ai le Faaola: “Ina alu ia, … ave le satauro, a e mulimuli mai ia te au” (Mareko 10:21).
O tagata matutua e mafai ona auauna atu i ni misiona i le tele o auala ma i le tele o nofoaga. E pei ona faailoa mai e tala nei, e tusa lava pe o auauna atu atoa pe faavaitaimi, o se ulugalii pe nofofua, i o latou lava atunuu po o se atunuu ese, e mafai lava e tagata matutua ona faatoilaloina ma le faamaoni ia ni faafitauli o loo faalavelave i o latou ala.
Fetaiai ma le Fefe
“O le fefe i mea e le iloaina po o le fefe faapea e leai so tatou tomai moomia o tusitusiga paia po o le gagana e mafai ona oo mai ai se lagona faaluafesasi mo le auauna atu. Ae peitai ua fetalai mai le Alii, ‘Ae afai ua outou saunia o le a outou le matatau’ (MF&F 38:30).O lou olaga o lau sauniuniga lea. … Tau lava o le o atu, o outou lava.”2
Elder Robert D. Hales o le Korama a Aposetolo e Toasefululua
O le fefe e mafai ona taofia ai le galuega faafaifeautalai. O nisi tagata e fefefe faapea e le lava ni o latou tomai ma le malamalama e manaomia e auauna atu ai. O nisi e popole i le nonofo ai i se atunuu ese o le lalolagi po o le galulue faatasi ma ni tagata latou te le iloaina.
O Sister Martha Marin mai Veracruz, Mekisiko, sa fetaiai ma nisi o mea sa fefe ai a o ia auauna atu o se faifeautalai faamisiona i le nofoaga autu o punaoa mo mea tau galuega i Puebla, Mekisiko. Sa matamuli e faaaoga ia komepiuta, o se vaega taua o le nofoaga autu mo mea tau galuega. Ae peitai o le fesoasoani ma le lagolagosua a lana soa ma isi o loo latou galulue faatasi, sa ia aoao ai ni tomai sa manaomia. “Sa liua lenei faafitauli e avea ma se faamanuiaga,” o lana tala lea. “Ou te iloa e le o tuuatoatasi au i lenei galuega.”
O Sister Sondra Jones mai Iuta, ISA, sa valaauina faatasi ma lona toalua o, Neldon la te auauna atu i le Atu Maresala. “Sa ou matuai fefe lava po o le a se mea o le a ou oo i ai. Ou te lei lagonaina muamua lava se matamuli e taumafai e aoao atu le talalelei,” o lana tala lea. Ina ua maea le lagonaina muamua o le leai o sona sao, sa ia filifili loa e taulai atu i ana taleni ma tomai. Sa amata ona ia aoao e alofa i tagata Maresala ma auauna atu ia i latou e ala i le otiina o lauulu ma aoaoina i latou e suisui.
Ina ua mavae masina e 18 sa ia fuafuaina pe a ma le 700 le aofai o tagata na ia otiina lauulu. O lona naunau e faasoa atu ana taleni na faatagaina ai o ia e auauna atu ma fausia ni fegalegaleaiga ma le fia selau o tagata, e aofia ai ma tagata o le Ekalesia, tagata sailiili, ma isi tagata o le nuu.
Foiaina o Popolega Faaleaiga
“O le a se faamanuiaga sili atu e mafai ona tuu atu e matua matutua i a latou fanau nai lo le fai atu e ala i galuega ma upu, ‘I le aiga lenei, tatou te o e faamisiona!’”3
Elder Jeffrey R. Holland o le Korama a Aposetolo e Toasefululua
O le manatu e tuua fanau o loo tauivi po o fanau a fanau o loo tuputupu ae e foliga mai e faigata tele mo le toatele o tagata. Ae peitai, o le a iloa e faifeautalai o le a faamalolosia o latou aiga i auala latou te lei faamoemoeina ona o a latou auaunaga.
O Raymond ma Gwen Petersen mai Wyoming, ISA, ua fa a laua misiona. O lo la malaga ese atu i le la misiona lona lua—i Samoa mo le taimi lona lua—sa avea lea ma se luitau i le amataga mo le la fanau, o e e lei malamalama pe aisea e manaomia ai e o latou matua ona toe auauna atu i se isi misiona.
Sa vave ona iloa e le aiga le tele o faamanuiaga na oo mai ona o le la auaunaga. “Sa faamanuiaina uma i latou!” o le tala lea a Sister Petersen. “O se tasi ulugalii sa lei maua lava se la fanau sa faamanuiaina i se pepe tama, o le isi sa faamaloloina faavavega mai le kanesa, o le isi sa vaaia le tele o le alualu i luma sa i ai i se tamaitiiti faalogogata, a o isi sa faamanuiaina a latou pisinisi.”
O a latou galuega faigata sa tuua ai se auala o le faatuatua tuufaasolo i o latou aiga. “E toafa fanau tama a a ma fanau o loo auauna atu faamisiona i le taimi nei ma sa latou tau maia ia i maua, sa avea i maua ma uunaiga mo i latou e o i ni misiona,” o le tala lea a Sister Petersen. “O le a se mea e sili atu le tauia nai lo lena mea?”
Mauaina o le Avanoa Sa’o e alu ai i se Misiona
“Ou te maofa pea i le fetaui lelei o le taitaiga a le Agaga Paia ma uiga ma manaoga o faifeautalai ma ulugalii taitasi i le tele o tulaga eseese o le galuega faafaifeautalai i le lalolagi atoa.”4
Elder Richard G. Scott o le Korama a Aposetolo e Toasefululua
E manaomia le auaunaga a faifeau faamisiona matutua i nofoaga autu mo mea tau galuega, ofisa o misiona, nofoaga autu mo talafaasolopito o aiga, malumalu, ma nofoaga autu mo tagata asiasi mai, faatasi ai ma isi nofoaga. E mafai ona talosaga tagata o loo fia galulue po o fea latou te fia faamisiona ai, ae o le faaiuga lava o le valaauga e sau mai le Alii, e ala mai Lana perofeta. E silafia e le Alii le avanoa o le misiona sa’o mo tamaitai nofofua taitasi po o ulugalii ua saunia.
O George ma Hine Chase mai Niu Sila na la iloaina le talafeagai lelei o lo la valaauga o le misiona mo i laua; sa la tetei ma le fiafia ina ua mafai ona fesoasoani le tele o a laua matata ma taleni faaleaiga i le faataunuuina o fesoasoaniga alofa i Papua Niu Kini.
O Elder Chase sa avea ma kamuta ma e mafai ona fesoasoani e fuafua ma faamaopoopo ia galuega faatino e pei o le fausiaina o vaieli. O Sister Chase sa galue mo le 18 tausaga i le puleaina o galuega faaofisa. “Sa matua aoga tele ou tomai faalepulega ma faakomepiuta,” sa ia fai mai ai. Sa la faaaogaina ma Elder Chase le tuufaatasiga o o laua tomai e faafoe ai se polokalama o aoaoga faalematata, e fesoasoani ai i tagata o le lotoifale ina ia aoao ni tomai e pei o le puleaina lelei o taimi, faatulagaina o mea, faaletaitai, tumama, ma fesootaiga.
Sa faaaogaina faatasi e le au Chase ia poto masani sa la maua mai o laua valaauga o le Ekalesia ma—o le mea sili o na mea uma—mai le avea ai o ni matua. A o galulue le au Chase e tufa atu ia sapalai o meaaoga ma faalelei ia tausiga o tamaiti pepe, sa fesoasoani lo laua poto masani faamatua la te talisapaia ai ia faafitauli o loo feagai ma aiga ma aoga i le lotoifale.
Taulimaina o Mea Tautupe
“Fefautuaai ma lou aiga lautele ma lou epikopo po o le peresitene o le paranesi. A malamalama ia auauna a le Alii i ou manaoga faaletino, o le a mafai ona e maua faamanuiaga e faavavau o le galuega faafaifeautalai.”5
Elder Robert D. Hales o le Korama a Aposetolo e Toasefululua
O le toatele o ulugalii e popole e le o lava a latou tupe e auauna atu ai i se misiona. Latou te mafaufau i le totogiina o mea e nonofo ai, falemai, ma fale ma mafaufau pe faapefea ona faatupe nei mea uma. Ua silafia e taitai o le Ekalesia nei popolega moni ma ua faia ai ni suiga i aiaiga faavae ina ia fesoasoani e faamāmā ia avega (tagai i le laina i autafa i le itu agavale). Ae, o le taulimaina o popolega o mea tautupe e manaomia ai le faatuatua, fuafuaina ma le faaeteete, ma nisi osigataulaga.
O Leonard ma Vera Chisango mai Zimbabwe na oo i ni luitau e ui lava sa faia ni fuafuaga aoga. Sa la saunia i lo la olaga faaipoipo atoa e auauna atu i ni misiona, ma sa la iloa e mafai e a laua penisione ma tupe teu ona tausia i laua i le la misiona muamua i le Malumalu o Johannesburg Aferika i Saute. Peitai a o la auauna atu, sa faafuasei lava ona pau maualalo le tamaoaiga, ma sa matuai faaitiitia ai a laua tupe maua.
Faatasi ai ma le fesoasoani a o laua aiga, sa nonofo ai pea le au Chisangos i le la misiona. Sa matua faamalieloto ia faamanuiaga o lena ositaulaga: sa faamanuiaina le pisinisi a lo la atalii, sa siitia le tulaga a lo la afafine i le galuega, ma sa aoao le la fanau e galulue faatasi e lagolago o latou matua.
O le toatele o faifeau faamisiona matutua e molimau atu faapea o faamanuiaga o le auauna atu e sili atu nai lo le tau faaletino. O Elder Peter Sackley, o se faifeau faamisiona Kanata o loo auauna atu faatasi ma lona toalua o, Kelly, i totonu o le Ofisa o le Eria o Hong Kong, sa ia aoteleina ia lagona o le toatele: “Ua ou aluese mai se galuega totogi i se galuega faamanuiaina.”
Faatoilaloina o Faafitauli e ala i le Fausiaina o le Faatuatua
“E toatele tagata lotomaualalo o le Au Paia o Aso e Gata Ai e popole e le o agavaa mo galuega faamisiona. Peitai, ua tuuina mai e le Alii i tagata ua faamoemoe e avea ma faifeautalai le faamautinoaga lenei: ‘O le faatuatua, faamoemoe, alofa mama ma le alofa, ma le manatu tasi i le mamalu o le Atua e agavaa ai o ia mo le galuega.’”6
Elder Russell M. Nelson o le Korama a Aposetolo e Toasefululua
Ina ia tali atu i faafitauli e fa i le auaunaga a faifeau faamisiona matutua, ua fautua mai ai e Elder Hales se vaifofo faigofie: “Ia faatuatua; o loo silafia e le Alii le mea o loo manaomia ai oe.”7 E faatoilalo e le faatuatua le fefe, faamalolosia ia aiga, fesoasoani i se faifeautalai matua ina ia maua le avanoa sa’o e auauna atu ai, ma fesoasoani e tuu atu se faamama avega i mea tautupe.
O le tele o tausaga ua mavae, sa tuputupu ae ai lea ituaiga faatuatua i totonu o se teineitiiti Polani e igoa ia, Stanislawa Habel. I tausaga mulimuli ane, sa taitaiina o ia e lona faatuatua e taliaina le talalelei toefuataiina ma, ina ua tagata matua, sa galue ai o se faifeautalai mo talafaasolopito o aiga i Iuta.
O le auaunaga a Sister Habel sa aoaoina ai o ia i se tamai mea lilo e le o iloa tele: “O le misiona e faatalavou atili ai tagata.” Sa ataata o ia ma fai mai, “Pe a e faagaloina ou faafitauli, ua e aoao ina ia maua le loto faafetai. Ua e aoao ina ia avea atili faapei o Keriso e ala atu i auaunaga i isi, ma o le sauniuniga lea e nonofo ai faatasi ma le Tama Faalelagi. E mafai e se misiona ona suia le olaga o se tagata matua.”
Ioe, e mafai, faapea foi ma olaga o e latou te auauna i ai ma le lotomaualalo.
O Chanta ma Sounthara Luangrath, o e na siitia atu i Kalefonia, ISA, sa la vaai atu ia Laos—o le laueleele sa la fananau ai ma ola ae ai ma o loo auauna atu ai nei o ni faifeau faamisiona.
Sa auauna atu faatasi Sondra Jones ma tamaitai o le Atu Maresala (agavale, faatasi ma lona toalua o, Neldon).
O Martha Marin (taumatau mamao) sa auauna atu faafaifeautalai faamisiona i le nofoaga autu o punaoa mo mea tau galuega i Puebla, Mekisiko.
O Raymond ma Gwen Petersen na auauna atu i ni misiona se lua i tagata Samoa o le Au Paia o Aso e Gata Ai.
O George ma Hine Chase na auauna atu faamisiona o ni faatonu o fesoasoaniga alofa i Papua Niu Kini.
O Peter ma Kelly Sackley na auauna atu faamisiona i le ofisa o le Eria i Hong Kong.
O Leonard ma Vera Chisango na auauna atu faamisiona i le Malumalu o Johannesburg Aferika i Saute (taumatau).
O loo fesoasoani ia Stanislawa Habel i tagata o asiasi atu i le Faletusi mo Talafaasolopito o aiga i le Aai o Sate Leki, Iuta.
Ata o le Malumalu o Johannesburg Aferika i Saute na pueina e Craig Dimond © IRI
Itu agavale i luga: O faifeau faamisiona matutua o loo auauna atu i le Aai o Sate Leki, Iuta, latou te fesoasoani i tagata sulufai mai atunuu eseese ina ia faamasani i o latou nofoaga fou, e aofia ai le aiga o Ntabwoba mai Rwanda, lea faatoa faamau talu ai nei i le malumalu.
Luga: Ata na pueina e Robert Casey