1 Ma sa oo i le amataga o le lona lima o tausaga o la latou nofoa’iga sa amata ai ona i ai o se finauga i totonu o le nuu; ona sa i ai se tasi tagata, sa igoa ia Amiliki, o ia o se tagata faitogafiti tele, ioe, o se tagata poto tele e tusa ai ma le poto o le lalolagi, ma o ia o sē o le faatulagaga a le tagata lea na fasiotia Kitiona i le pelu, lea na fasiotia e tusa ai ma le tulafono—

2 O lenei o le Amiliki lenei na ia ta’ita’i ese, i lona faitogafiti, le toatele o tagata, ia mulimuli atu ia te ia; sa matuā toatele lava i latou sa amata ona latou malolosi tele; ma sa amata ona latou taumafai e faatuina Amiliki e avea ma tupu i le nuu.

3 O lenei sa popole tagata o le ekalesia i lenei mea, ma faapea foi i latou uma o e sa lē ta’ita’ieseina i faatauanauga a Amiliki; ona sa latou iloa, e tusa ma la latou tulafono, o mea faapea e ao ina faatutūina i le leo o le nuu.

4 O lea, afai e mafai ona maua e Amiliki le leo o le nuu, o ia, o se tagata amioleaga, o le a aveese e ia mai ia te i latou a latou aiā ma avanoa o le ekalesia; ona o lona faamoemoe ia faaumatia le ekalesia a le Atua.

5 Ma sa oo ina faapotopoto faatasi e tagata i latou lava i le laueleele atoa, i vaega eseese, i le finau tele ma fefinaua’iga maoae o le tasi ma le isi, e taitasi le tagata e tusa ma lona manatu, pe mo Amiliki pe tetee ia te ia.

6 Ma sa faapea ona latou faapotopoto faatasi i latou lava e tuu atu o latou leo e faatatau i le mataupu; ma sa folasia atu o latou leo i luma o faamasino.

7 Ma sa oo ina sa tetee le leo o le nuu ia Amiliki, ma lē faia ai o ia ma tupu i le nuu.

8 O lenei sa avea lenei mea ma pogai o le olioli tele i loto o i latou o e sa tetee ia te ia; peitai sa faa e Amiliki i latou o e na mananao ia te ia, ia feita ia te i latou o e na lē mananao ia te ia.

9 Ma sa oo ina latou faapotopoto faatasi i latou lava, ma tofia Amiliki e avea ma o latou tupu.

10 O lenei ina ua avea Amiliki ma tupu i luga o i latou, sa ia faatonuina i latou ia latou sii atu auupega o taua e faasaga i o latou uso; ma sa faia e ia lenei mea, ina ia mafai ai ona pule o ia ia te i latou.

11 O lenei sa faailoga ese tagata o Amiliki i le igoa o Amiliki, sa ta’ua o sa Amilikī; ma o e na totoe sa ta’ua o sa Nifaē, po o tagata o le Atua.

12 O lea, sa iloa e tagata o sa Nifaē le faamoemoega o sa Amilikī, ma o lea sa latou sauni ai e fetaia’i ma i latou; ioe, sa latou faaauupegaina ai i latou lava i pelu, ma simetea, ma aufana, ma ufanafana, ma maa, ma maatā, ma ituaiga uma o auupega eseese, o taua.

13 Ma sa faapea ona latou saunia e fetaia’i ma sa Amilikī i le taimi latou te o mai ai. Ma sa tofia ni kapeteni, ma kapeteni maualuluga, ma kapeteni sili, e tusa ai ma lo latou faitau aofai.

14 Ma sa oo ina faaauupega e Amiliki ona tagata i ituaiga uma o auupega eseese o taua; ma sa ia tofia foi ni pule ma ni ta’ita’i i luga o ona tagata, e ta’ita’i i latou i le taua e faasaga i o latou uso.

15 Ma sa oo ina o a’e sa Amilikī i le maupu’epu’e o Aminisu, sa i le itu i sasae o le vaitafe o Saitonu, lea sa tafe i tafatafa ane o le laueleele o Sara’emila, ma o iina na amata ai ona latou tau ma sa Nifaē.

16 O lenei o Alema, ona o ia o le faamasino sili ma le kovana o le nuu o Nifae, o lea na alu a’e ai o ia faatasi ma ona tagata, ioe, faatasi ma ana kapeteni, ma kapeteni sili, ioe, i le ulu o ana autau, e faasaga ia sa Amilikī i le taua.

17 Ma sa amata ona latou fasioti o sa Amilikī i luga o le maupu’epu’e i le itu i sasae o Saitonu. Ma sa tau sa Amilikī ma sa Nifaē ma le malosi tele, sa oo ina pa’u’ū le toatele o sa Nifaē i luma o sa Amilikī.

18 Ae ui i lea sa faamalosia e le Alii le lima o sa Nifaē, sa oo ina latou fasioti sa Amilikī i se faasiga tele, sa oo ina amata ona latou sosola ese mai i o latou luma.

19 Ma sa oo ina tuliloa e sa Nifaē sa Amilikī i le aso atoa lena, ma fasioti i latou i se fasiga tele, sa oo ina fasiotia ai sa Amilikī e sefulu lua afe lima selau tolu sefulu ma le lua; ma o sa Nifaē na fasiotia e ono afe lima selau ono sefulu ma le lua tagata.

20 Ma sa oo ina ua lē mafai e Alema ona toe tuliloa o sa Amilikī, sa faia e ia ina ia faatutū e ona tagata o latou faleie i le vanu o Kitiona, le vanu lea sa faaigoa i le igoa o Kitiona, o lē na fasiotia i le pelu e le lima o Ne’oa; ma o le vanu lenei sa faatutu ai e sa Nifaē o latou faleie mo le po.

21 Ma sa auina atu e Alema tagata faalilolilo e mulimuli i e na totoe o sa Amilikī, ina ia mafai ona iloa e ia e uiga i a latou fuafuaga ma a latou taupulepulega, ina ia mafai ona ia leoleoina o ia lava e faasaga ia te i latou, ina ia mafai ona ia faasaoina ona tagata mai le faaumatiaina.

22 O lenei o i latou o e na ia auina atu e vaavaai le tolauapiga a sa Amilikī, sa igoa o Serama, ma Aminoa, ma Maneti, ma Limea; o i latou nei o e na o ese atu ma o latou tagata e vaavaai le tolauapiga a sa Amilikī.

23 Ma sa oo i le aso na sosoo ai na latou toe foi mai ai i le tolauapiga a sa Nifaē ma le faanatinati tele, ma le ofo tele, ma ua taia i le mata’u tele, fai mai:

24 Faauta, sa matou mulimuli i le tolauapiga a sa Amilikī, ma sa matou ofo tele lava, i lo matou vaaia, i le laueleele o Minona, i luga a’e o le laueleele o Sara’emila, i le ala i le laueleele o Nifae, se autau toatele lava a sa Lamanā; ma faauta, ua aufaatasi atu sa Amilikī ia te i latou;

25 Ma ua i ai nei i latou i luga o o tatou uso i le laueleele lena; ma ua latou sosola mai i o latou luma ma a latou lafu, ma a latou avā, ma a latou fanau, aga’i mai i lo tatou aai; ma vaganā ai ua tatou faavavevave atu, o le a latou maua lo tatou aai e fai mo i latou, ma o le a fasiotia o tatou tamā, ma a tatou avā, ma a tatou fanau.

26 Ma sa oo ina ave e tagata o Nifae o latou faleie, ma o ese atu mai le vanu o Kitiona aga’i atu i lo latou aai, le aai lea o Sara’emila.

27 Ma faauta, a’o latou sopoia le vaitafe o Saitonu, sa o mai i o latou luga sa Lamanā ma sa Amilikī, e toetoe ina tusa lo latou toatele, e pei ona i ai, ma oneone o le sami, e faaumatia i latou.

28 Ae ui i lea, ona sa faamalolosia sa Nifaē e le aao o le Alii, ona sa latou tatalo malosi atu ia te ia, ia lavea’i e ia i latou mai lima o o latou fili, o lea na faafofoga mai ai le Alii i a latou tagi, ma faamalolosia i latou, ma sa pa’u’ū ai sa Lamanā ma sa Amilikī i o latou luma.

29 Ma sa oo ina tau Alema ma Amiliki i le pelu, faafesaga’i lava; ma sa la tau malolosi tele, o le tasi i le isi.

30 Ma sa oo ona o Alema, o ia o se tagata o le Atua, ma ona sa uunaia o ia i le faatuatua tele, o lea na tagi atu ai o ia, e faapea: Le Alii e, ia e alofa mutimutivale mai ma faasaoina lo’u ola, ina ia mafai ona avea a’u ma meafaigaluega i ou aao e lavea’i ma faasaoina lenei nuu.

31 O lenei ina ua uma ona fai atu e Alema o nei upu, sa toe tau o ia ma Amiliki; ma sa faamalosia o ia, sa oo ai ina fasiotia e ia Amiliki i le pelu.

32 Ma sa tau foi o ia ma le tupu o sa Lamanā; peitai sa sola ese le tupu o sa Lamanā mai luma o Alema, ma ia auina mai ana leoleo e tau ma Alema.

33 Peitai, sa tau Alema ma ana leoleo ma leoleo a le tupu o sa Lamanā, seia oo ina ia fasiotia ma tutuli i latou i tua.

34 Ma sa faapea ona ia tafi o le eleele, po o le auvai, sa i le itu i sisifo o le vaitafe o Saitonu, i le lafoina o tino o sa Lamanā na fasiotia, i vai o Saitonu, ina ia mafai ona maua e ona tagata se avanoa e sopo atu ai ma tau ma sa Lamanā ma sa Amilikī, i le itu i sisifo o le vaitafe o Saitonu.

35 Ma sa oo ina ua latou sopoia uma le vaitafe o Saitonu, sa oo ina amata ona sosola o sa Lamanā ma sa Amilikī mai o latou luma, e ui ina sa matuai toatele lava i latou sa lē mafai ona faitauina i latou.

36 Ma sa latou sosola mai luma o sa Nifaē agai i le vao sa i le itu i sisifo ma matu, e mamao i tala atu o tuaoi o le laueleele, ma sa tuliloa i latou e sa Nifaē ma lo latou malosi, ma fasioti i latou.

37 Ioe, sa faafetaia’ia i latou i itu uma, ma fasiotia ma tutulia, seia oo ina faataapeapeina i latou i le itu i sisifo, ma le itu i matu, seia oo ina latou tau atu i le vao, lea sa ta’ua o Heremauga; ma o le vaega lena o le vao sa tumu i manu aivao ma feai.

38 Ma sa oo ina toatele na feoti i le vao i o latou manu’aga, ma ’aina e na manu feai ma taie foi o le ’ea; ma sa maua o latou ivi, ua faaputuina i luga o le eleele.