Leiloa i le Aai Faasaina
E alala le tusitala i Iuta, ISA.
Sa ou lagonaina muamua le Agaga, ae ou te lei lagonaina lava se mea fitoitonu—ae mautinoa lava e le o faatonuga i le mea e alu i ai.
Ata na tusia e Vlad Gusev
Sa ou i ai i le ogatotonu o le Aai Faasaina i Beijing i Saina. Sa nao ni nai minute na muamua atu, sa siomia ai au e uo ma faiaoga, ae sa faafuasei ona matuai tuua lava nao au.
Sa vave ona ou malamalama i le lamatia o le mea sa ou i ai. O se tagata Amerika e toatasi e 15 tausaga le matua sa matilatila ese ai lava i totonu o le maota mataaga pisi. Sa ou sau i Saina faatasi ma isi tamaiti o le matou vasega i le aoga maualuga mo se malaga a le aoga, ma sa tele taimi na lapataia ai i matou e faiaoga ma taiala e uiga i mea e ono lamatia ai le malaga taamilo i se atunuu ese pe afai matou te le faaeteete.
Sa ou savalivali solo i le eria, ma faavava atu i le motu o tagata tafafao—o tagata Saina faapea ma tagata mai fafo—ma sa ou tu tetee e taumafai ai e sue ia pea ofutino lanumumu ma paepae sa ofuina e tagata taitoatasi o le matou vaega. Ae sa leai ni mea na ou vaaia. I se auala, sa o ese atu ai la’u vaega e aunoa ma a’u, ma sa matuai ou le iloa po o le fea le itu na latou o i ai. Sa ou nofo i lalo ma autilotilo atu i faitotoa e o mai ai i totonu ma o ai i fafo. Ua mavae minute e sefulu, sosoo ai ma le 30, faapea ma le 45 minute. Sa leai se tasi mai la’u vaega na aliali mai.
Sa mau se tagata i lo’u lima. Sa ou tepa ae ma vaaia ai se fafine puupuu ma ni mata pei e tau faavalevalea ma ni atigilima uumi. Sa ia tosoina lo’u lima. “Mulimuli mai ia te a’u,” sa ia fai mai ai i se Igilisi le sa’osa’o. “Teine aulelei, mulimuli mai ia te a’u.”
Sa ou lagonaina se lagona le mautonu i lo’u loto. “Alu i tua,” sa ou ee ai, ma se’i ese mai lo’u lima. A’o le’i ona toe tosoina atu, sa ou momo’e saosaoa atu i se faitotoa e alu ai i fafo ma ulu atu i se isi vaega o le aai.
Sa ou momo’e mo sina taimi seia oo ina atili ai ona ou se nai lo le taimi muamua. Sa ou saofai ifo i se faasitepu na latalata ane, ma taumamao ese mai i vaega o tagata, ma amata ona ou tagi. Sa ou iloa ni nai upu faaSaina ae mautinoa lava sa le lava e maua ai ni faasinoga e toe foi atu i le matou faletalimalo, i se vaimea i le isi itu o le aai tele o Beijing. Ma i le vaega lenei, sa ou le mautonu po o fea sa i ai se faitotoa e alu ai i fafo.
Ma le maligi o ou loimata, sa amata ai ona ou tatalo. Sa ou ioeina lava sa ou faavalevalea ma le aluese mai le vaega, e ui lava sa mo sina taimi, ma ou augani ai i le Tama Faalelagi e fesoasoani ia ou toe maua lou auala i le matou vaega.
Sa ou tu i luga ma toe savali i tua i le itu lautele sa ou sau ai. Ou te lei maua se faaaliga i le taimi lava lena—ma sa ou le mautinoa pe o le a faapei le leo po o le lagona o lena faaaliga e tusa lava pe ou te mauaina. Sa ou lagonaina muamua le Agaga, o se lagona mafanafana i le uma ai o se auaunaga i se tasi po o le faalogoina o se tautalaga i le lotu, ae ou te lei lagonaina lava se mea fitoitonu, e mautinoa lava e le o faatonuga i le mea e alu i ai. Sa amata ona ou savali i luma ma le le mautinoa, ma faaauau le tatalo i lo’u loto.
Sa iu ina ou tau atu i se magalua o le auala. Sa amata ona alu i le taumatau ae ou faalogoina loa le musumusu o se leo, “Nofo.”
O le leo sa matuai malu lava lea sa toeitiiti a ou le amanaiaina atoa e faapea o se tasi o ou lava mafaufauga. Peitai sa i ai se mautinoa lea e mautinoa lava ou te lei lagonaina i lena taimi. “Saofai i luga o le nofoaumi lena,” sa fai mai ai le leo. Sa ou ea ae ma vaaia ai se nofoaumi i le ogatotonu o le auala magalua. Sa ou alu ma saofai ai. E nao le tolu minute mulimuli ane, ae onoono ae loa se ofutino lanu paepae ma lanu mumu na ou masani ai i totonu o le mano o tagata ma talotalo mai ia te au. O le matou taiala malaga lea mo le aso.
Sa ou oso ese mai le nofoaumi sa ou saofai ai. Sa matuai ou fiafia lava, lea sa toeitiiti lava a ou opoina le fafine.
Sa fai mai o ia, “ua atoa le itula o matou sueina oe!”. “O fea sa e i ai?”
Ao ia taitaiina atu au i le matou vaega, sa ou faamatala atu ia te ia le mea sa ou i ai, e amata mai i lou motuese mai le vaega ae faaiu i lau filifiliga e saofai i lalo nai lo o le alu i le taumatau i le magalua i le auala.
“Matuai e laki lava,” o lana tala lea. “Ana fai e te alu i le taumatau i le afega lena, semanu e ave ai oe i le itu faafeagai mai isi tagata uma o le vaega. E tele tele le aai, semanu e le mafai ona ou mauaina oe.”
Sa ou tuua Saina i nai vaiaso mulimuli ane, na mafai ona ou le toe leiloa i le taimi o le malaga, ae e tele ni taimi na ou toe mafaufau ai i le taimi na ou faalogoina ai le musumusu mai o le leo o le Agaga ia te au. Sa le o le ituaiga o uunaiga sa ou mauaina muamua, ae o le mea sa silafia e le Alii sa manaomiaina ina ia taofi ai lou alu atu i le auala sese. Sa ou iloaina foi le matuai faigofie na semanu e oo i ai le le amanaiaina pe ana ou le faalogo.
Talu mai lena aso, ua tele taimi ua ou faalogo ai i le Agaga i le tele o auala eseese, o lapataia au i mea e lamatia ai faaletino ma faaleagaga. O nisi taimi na ou vaai ai i taunuuga o le mulimuli po o le le usitaia o lena leo e pei ona sa ou faia i lena aso muamua i le Aai Faasaina. Ua faatele atu, ona ou le vaai i taunuuga. Ae ua ou aoaoina, a ou faalotomaualaloina au lava ma ou naunau e faalogo, o le a fesoasoani mai le Alii ia ou iloa uunaiga a le Agaga ma o le a Ia taitai atu au i le mea e tatau ona ou i ai. O le faatasi ai ma Ia, e le mafai ai ona tuua nao a’u.