Autalavou Matutua
Aua Le Tuua le Faaola
Saunia e Elder Kevin W. Pearson
O Le Fitugafulu
Mai se saunoaga i le faigalotu, “The Lens of Truth,” na tuuina atu i le Iunivesite o Polika Iaga–Idaho i le aso 7 o Mati, 2017.
Ua tatou ola i taimi vevesi. Peitai o le fesili e le o le pe o le a faapefea ona ola ai le Ekalesia; ae, pe o le a faapefea ona e ola ma ou ola ai?
Ata na tusia e J. Beth Jepson
O nai tausaga ua tea, sa ma feiloai ai ma sa’u uo mo se ma ’aiga i le aoauli. Ua tele ni tausaga ma te lei toe vaai i le tasi ma le isi. I le aso o ou aoga i le aoga maualuga ma popofou i le kolisi, sa avea o ia o se tasi o au uo sili ona lelei. O ia o se tasi o alii talavou na ou iloaina sa sili ona malosi ma sili ona tuuto.
Sa ma auai faatasi i le seminare, taaalo faatasi i taaloga, auai faatasi i le iunivesite, sauni faatasi mo ni misiona, ma sa o ni nai masina sa va ai le [ma] o ese atu i misiona. Ina ua uma a maua misiona, sa faaipoipo atu o ia i se tamaitai talenia ma maoae mai lau siteki.
A o mavae atu tausaga, sa faapea ona eseese auala sa agai i ai o ma’ua olaga. Sa ma siitia atu i nuu eseese ma iu ai ina ma le toe fesootai ma le tasi ma le isi. Ou te manatua lava lo’u te’i ina ua ou faalogo ua o ese i la’ua ma lona toalua mai le Ekalesia. Mai ia i latou uma lava sa ou iloaina i lou talavou, o ia le tagata mulimuli na ou mafaufau o le a aluese ma le Ekalesia.
I le [ma] ‘aiga i le aoauli, sa ma talatalanoa ai i mea e manatua o le ma faauoga lea sa faapitoa tele ia i ma’ua uma. Sa ma toe talie i nisi o aafiaga faavalevalea o o ma aso a o laiti. Sa ma talanoa e uiga i o maua aiga ma taumafai e sosoo le ava o taimi [na ma le fesootai ai].
Mulimuli ane, sa ou fesili atu ai i le fesili manino: “Timo, o le a le mea na tupu? Sa e matuai liua ma tuuto! Aisea na e aluese ai ma le Ekalesia? O le a le mafuaaga na e savali ese mai au feagaiga o le malumalu? Pe ua e aluese foi ma le Faaola? Sa ta folafola atu i le tasi ma le isi o le a ta faamaoni ma faatuatua seia oo i le iuga o o taua olaga!”
Sa tali mai o ia,“Kevin, ua ese la’u vaai i mea i le taimi lenei. Ua sui lou manatu e uiga i le Ekalesia ma ana aoaoga. Ou te le ita i le Ekalesia—ae ua ou le toe manaomiaina.”
A o faaiu le ma feiloaiga, sa ou faailoa atu lo’u alofa ma le agaga faafetai mo se faauoga ou te faatauaina pea. Ma, faatasi ai ma se lagona loloto, sa ou faailoa atu ai la’u molimau: “Timo, ua ou iloa ua moni nei mea. Ma ua e iloa foi, ua moni nei mea. Ua leva lava ona e iloa. Ua leai ma oe le manino lea sa ia te oe muamua. Ae e mafai ona e toe maua le susulu ma le malamalama o le Agaga Paia lea sa ia te oe muamua. Faamolemole toe foi mai.”
Sa ma feofoofotai a o ma faatofa, sa ia musumusu mai, “Ou te faamemelo i lou talitonu mausali ma le naunautai. Ae e mafai faapefea ona e matuai mautinoa?”
A o ou savali ese atu, sa ou tomanatu loloto i filifiliga sa ma faia, ma i o latou aafiaga i o maua olaga ma i olaga o le ma fanau ma fanau a fanau.
Au uo talavou e, faamolemole aua le faatagaina le mea na tupu i lau uo o Timo e tupu ia te outou. Pe o e tutumau, mausali, ma liua e pei ona e manatu o loo e i ai? Pe a e fetaiai ma luitau lemaalofia ma alagatatau o le olaga, o fea o le a faliu i ai mo le filemu ma le malamalama? Pe a oo ina pogisa ma faigata le olaga, pe o le a e mafaufau pea e tatalo i le taimi lava lea ma i taimi uma?1
A o faateleina faitioga e uiga i le Ekalesia, lona talafaasolopito, ona taitai, ma ona aoaoga, o fea o le a e tu ai? A o fetoai talitonuga ma faiga masani a se lalolagi ua faateteleina le amioleaga ma mataupu faavae o le talalelei toefuataiina, o le a se mea o le a e faia?
“Pe Tou Te Fia O Ese Foi?”
O nisi o auupega aupito lelei a Satani o le le magafagafa i mea faalavefau, taufaasese, ma faaleagaga. O ia mea taitasi e faaumatia faatuatua, faapunitia malamalama, ma faasese manatu. Faatasi ua latou faavae ai le luitau maoae o o tatou aso. E faaaoga e Satani ia mea e le gata ia faavaivaia ai Iosefa Samita, le Tusi a Mamona, aoaoga faavae o le Ekalesia, ma taitai o le Ekalesia, ae ia osofai ai foi le fuafuaga a le Faaola ma le Tama. O le mea lava lea ua leva ona i ai.
Pe a oo ia tulaga maemaea lemaalofia o faaosoosoga ma tofotofoga i le Vaega 5 o afa faaleagaga, pe mata o le a faalagolago pea i le Atua ma pipii i le upumoni? O le fesili mamana a le Faaola i le Toasefululua o loo faaaoga pea i aso nei:
“Pe tou te fia o ese foi?
“Ona tali mai lea o Simona Peteru ia te ia, Le Alii e, a matou o ea ia te ai? O ia te oe upu o le ola e faavavau.
“Ua matou talitonu, ma ua matou iloa o oe o le Keriso, o le Alo o le Atua soifua” (Ioane 6:67–69).
Ua ou manatua se saunoaga mamana mai ia Peresitene Heber C. Kimball (1801–68), Fesoasoani Muamua i le Au Peresitene Sili. Ua taunuu saogalemu le Au Paia i le Vanu o Sate Leki ma sa fai si o latou fiafia ia i latou lava. O le faatoilaloina ai ma le onosaia ai o mea e tele, sa tau faamaualuluga ma faasausili. Sa saunoa Peresitene Kimball:
“Ou te fai atu ia te outou, o le toatele o outou o le a vaai i le taimi o le a oo mai ai faalavelave uma, o tofotofoga, ma sauaga e mafai ona outou tatalia, ma avanoa e tele e faaalia ai lo outou faamaoni i le Atua ma lana galuega. Ina ia faafetaiaia faigata o le a oo mai, o le a tatau ia te outou ona i ai se malamalama mo outou lava i le moni o lenei galuega. … Afai e le o ia te oe le molimau, ia ola amiotonu ma valaau atu i le Alii ma ia le tuua seia oo ina e mauaina. Afai e te le faia o le a le mafai ona e taulimaina.
“… O le a oo mai le taimi o le a leai se tane po o se fafine e mafai ona toe ola i se malamalama nono. O le a tofu taitaiina tagata taitoatasi e le malamalama o i totonu ia te ia lava. Afai e le o ia te oe, e mafai faapefea ona e taulimaina?”2
Ua tatou ola i taimi vevesi. Peitai o le fesili e le o le, pe o le a faapefea ona ola ai le Ekalesia; ae, pe o le a faapefea ona e ola ma ou ola ai? “Ua faatuina le Tulaga o le Upumoni; e leai se lima eleelea e mafai ona taofia le galuega mai lona alualu i luma.”3 Pe e te alualu ma ou alualu faatasi ai i luma, na pau lena o le mea e le mailoa.
Auala e Sao ai Faaleagaga
Ou te fautuaina atu ni mea taua se ono e ao ona fai e i tatou taitoatasi e ola ai pea faaleagaga.
1. Ia alofa ma usitai muamua i le Atua. O le alofa ma le usitai i le Atua e mautinoa lava e muamua i le alofa ma le auauna atu i isi. E taua le faasologa. Na aoao mai Nifae, “Aua ua foai mai e le Alii le Atua le malamalama i le mafaufau; aua foi ua tautala mai o ia i tagata i o latou mafaufau e tusa ma la latou gagana” (2 Nifae 31:3). E alofa le Tama Faalelagi ia i tatou ma e naunau i taimi uma e tuuina mai le malamalama ia i tatou. Ae peitai, e ao ona tatou faamuamua o Ia i o tatou olaga.
2. Fai tatalo faaletagata lava ia. E matuai taua lava le tatalo. Na aoao mai le Perofeta o Iosefa Samita, “O le auala sili ona lelei e maua ai le upumoni ma le poto e le o le fesili i ai mai tusi [atonu na te faaopoopo i ai ma “itulau i le uepi”], ae ia alu atu i le Atua i le tatalo, ma ia maua mai le aoaoga mai le lagi.”4 O le a le mafai lava ona e le agavaa e tatalo! Afai e te manao i nisi tali, ia fai atu nisi fesili. Ia saili e le aunoa mo ma tatalo mo le faatosinaga a le Agaga Paia (tagai Moronae 10:5). O le malamalama lea e auina mai e le Tama lea e aumaia le malamalama.
3 “Saili i le aoaoina, e ala lava lea i le suesue ma le faatuatua foi” (MF&F 109:7). O le aoao o se tiute paia. O sui e saili le aoaoina; o mea faitino e faatalitali ina ia tau faagaoioi. O taitai maoae o tagata aoaoina maoae ia. E manaomia e le Ekalesia ni taitai maoae—o tamaitai ma alii e sailia le susulu ma le poto sili atu, malamalama ma le liua e loloto atu (tagai MF&F 93:36). O lenei mea e manaomia ai le tautino ma le tuuto. E le mafai ona e maua upumoni loloto i le sueina i se uiki po o le saili i uepisaite. Manatua, o le faatuatua e faamalosia e ala i le faalogo i molimau a i latou o loo i ai faatuatua, ae le o le faalogo i masalosaloga a i latou o e ua leai ni faatuatua.
4. Suesue i tusitusiga paia, ae maise lava le Tusi a Mamona, i aso uma. O le Tusi a Mamona sa tusia faapitoa lava e puipui ma faasaosao ai i tatou a o tatou fefolauai i tulaga o o tatou aso. E faatatau i lona mana, sa molimau mai Nifae e uiga i le ai uamea, “Ma sa ou fai atu ia te i latou o le afioga lea a le Atua; ma ai se e faalogo i le afioga a le Atua, ma pipiimau i ai, e lē fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga” (1 Nifae 15:24). Afai e amata ona e lagona le nunumi ma le feeseeseai, ia toe amata i le itulau muamua, ma faatofu oe lava i le Tusi a Mamona.
5. Ia taulai atu i le vaaiga aoao. O oe o se vaega o le faatinoga aupito maoae i luga o le fogaeleele: o le faapotopotoina o Isaraelu ma sauniuni ai mo le Afio Mai Faalua o Iesu Keriso. Ua i ai sau matafaioi taua e fai! Na e sau i le lalolagi ma tautino ia lototoa i lau molimau o le Faaola. O lou faasinomaga paia lena. Ia taulai atu i le vaaiga aoao: O le fuafuaga o le fiafia a le Tama Faalelagi. O tioata o le upumoni. O le siosiomaga mo fesili, faafitauli, ma atugaluga uma. “Aua e tautala mai le Agaga i le upumoni ma e le pepelo. O le mea lea, e fetalai mai o ia e uiga i mea e pei ona i ai moni lava, ma e uiga i mea e pei o le a i ai moni lava” (Iakopo 4:13).
6. O le mea sili o ia mea uma, ia faalagolago ia Iesu Keriso. O Ia lava “o le malamalama ma le ola o le lalolagi” (3 Nifae 11:11; tagai foi Ioane 8:12). Pe a oo ina siomia oe ma lofituina e le le mautonu, faigata, ma faaosoosoga, ia faalagolago ia te Ia. Pe a oo ina le ogatusa le olaga ma le mea sa e faamoemoeina, ma faatiga ma faalata oe e i latou sa e faatuatuaina, ia faaauau pea ona faalagolago atoa atu ia te Ia. Tau ina ia e tali atu e pei ona sa faia e Nifae anamua i vaitaimi sa tutusa lava le faigata: “E ui i lea, ua ou iloa le ua ou faalagolago i ai. … Le Alii e, ua ou faalagolago ia te oe, ma o le a ou faalagolago pea ia te oe e faavavau” (2 Nifae 4:19, 34).
Po o le a lava le mea e te faia, ia aua lava nei [e] tuua le Faaola! Ona o Lana Togiola, ua avea ai i tatou ma sui, e saoloto e galue ae le seiloga e tau faamalosia. O le a tatou tutu taitoatasi i luma o le Atua Silisili Ese ma tali atu mo le malamalama ma le upumoni ua tatou filifilia.
Ou te folafola atu ia te outou afai o le a outou mulimuli i nei mataupu faavae ma pipiimau i le upumoni, o le a le mate lava lo outou faatuatua. Ia faamanuia outou e le Atua ia filifili e le aunoa e tilotilo atu i tioata o le upumoni e ala i le mana o le Agaga Paia.