Perofeta: O Se Faatusa o le Alofa o le Atua

Saunia e Elder Ulisses Soares

O Le Korama a Aposetolo e Toasefululua

Mai se saunoaga i le konafesi aoao ia Aperila 2018.

Ou te fia molimau atu ia te outou o Peresitene Russell M. Nelson o le perofeta a le Atua i le lalolagi. Ou te lei vaai lava i se isi e sili atu le agalelei ma le alofa nai lo ia. E ui ina ou lagonaina lo’u matua le agavaa lava e auauna atu o se tasi o le Korama a Aposetolo e Toasefululua, o ana upu ma le silasila agamalu i ona fofoga a o ia tuuina mai lenei tiutetauave na mafai ai ona ou lagonaina le opoina o a’u i le alofa o le Faaola.

Pe le o se faamanuiaga ea le i ai o perofeta, tagatavaai, ma talifaaaliga i le lalolagi i nei aso ua tatou ola ai, o e o saili ia iloa le finagalo o le Alii ma mulimuli ai? O se faamafanafanaga lava le iloa e le o tuua na o i tatou i le lalolagi, tusa lava po o a luitau o tatou feagai i le olaga. O le i ai o perofeta o se faailoga o le alofa o le Atua i Ana fanau. Latou te faailoa maia folafolaga ma le natura moni o le Atua ma Iesu Keriso i lo La’ua nuu.

Mai le taele o lo’u loto, ou te molimau atu e saunoa mai perofeta e ala i le mana o le Agaga Paia. Latou te molimau atu e uiga ia Keriso ma Lana misiona paia i le lalolagi. Latou te suitulaga i le mafaufau ma le finagalo o le Alii ma e tofia i latou e suitulaga ia te Ia ma aoao mai i tatou i mea e tatau ona tatou faia e toe foi atu ai e mau i le afioaga o le Atua ma Lona Alo, o Iesu Keriso. Ua faamanuiaina i tatou a o tatou faaaogaina lo tatou faatuatua ma mulimuli ia latou aoaoga. O le mulimuli ia te i latou, o le a sili atu ai ona fiafia o tatou olaga ma tuuitiitia le faigata, e faigofie atu foi ona onosaia o tatou faigata ma faafitauli, ma tatou fatuina se ofutau faaleagaga o le a puipuia ai i tatou mai osofaiga a le fili i o tatou taimi.

Ou te molimau atu ma le paia ua toetu mai Iesu Keriso, o loo soifua o Ia, ma o loo Ia taitaia Lana Ekalesia i le lalolagi e ala i Ana perofeta, tagatavaai, ma talifaaaliga. Ou te molimau atu o Ia o le Faaola ma le Togiola o le lalolagi ma e ala mai ia te Ia e mafai ai ona laveaiina ma faaeaina i tatou i le afioaga a lo tatou Atua pele. Ou te alofa ia te Ia; ou te faamemelo ia te Ia. Ou te manao e mulimuli ia te Ia ma faia Lona finagalo ma avea atili e faapei o Ia.