Ou te Manatu O Le A Ou Pei o A’u Lava

Saunia e Jutta Baum Busche

E Uiga ia Sister Busche

O Jutta Baum (f. 1935) sa ola ae i Dortmund, Siamani. Sa faaipoipo o ia ia Enzio Busche i le 1955, ma sa papatisoina i laua i le aso 19 o Ianuari, 1958, i se vaitaele mo tagata lautele i Dortmund.

Ia Oketopa 1977, sa la auai ai i se konafesi i Berlin ina ia mafai e Enzio, o se sui lisone a le Ekalesia, ona faaliliu mo Peresitene Spencer W. Kimball (1895–1985). I le maea ai o le konafesi, sa saunoa faalilolilo atu ai Peresitene Kimball ia Enzio ma valaauina o ia e auauna atu i le Korama Muamua a le Au Fitugafulu—o se tofiga tumau o le a manaomia ai ona siitia le au Busches.

O le la tofiga muamua lava sa faia i Munich, Siamani, lea sa taitai ai Enzio i le misiona mo le lua tausaga; ona la siitia atu ai lea i Iuta i le 1980. Sa tele lava ina femalagaai i laua, e asiasi i tagata o le Ekalesia i le lalolagi atoa, ma sa saunoa atu Jutta i konafesi faalisone faatasi ma lana tane.

Faatasi ai ma le faapaiaga o le Malumalu o Frankfurt Siamani i le 1987, sa avea ai i laua ma peresitene ma le faatina. Sa lei avea muamua lava ia Sister Busche ma se tagata faigaluega o le malumalu, o lea sa fautuaina ai o ia e Peresitene Gordon B. Hinckely (1910–2008) i se semina o aoaoga faamasani, “O le mea aupito taua lava o le i ai lea o le alofa ma le alofa ma le alofa.” Sa ia teufatuina lana fautuaga. Sa ia talosagaina le au faigaluega o le malumalu ia avea ma mea ia sili ona faamuamua le fesoasoani i tagata ulu ia lagona le Agaga o le Atua.

O se vaega lenei o le lauga na tuuina atu e Sister Busche i le Konafesi a Tamaitai i le Iunivesite o Polika Iaga i le 1989.

Ou te manatua lelei lava ia fetuutuunaiga sa ma faia ina ua ma o atu e nonofo i Iuta. O lo’u valaauga muamua lava i le matou uarota o le auauna atu lea o se faiaoga i le Aualofa. Sa ou mataituina ma le toto’a ia isi faiaoga ma sa matuai faagaeetia a’u i a latou taumafaiga mo le atoatoa i a latou aoaoga. E oo lava i le faiga o o latou lauao ma laei na matuai mama ma lelei, sa faaalia ai lo latou taumafai mo le atoatoa. Sa ou faamemelo i le alu lelei ma le manino o le latou [tautatala] i le gagana Peretania. E mafai faapefea e a’u, ma la’u Igilisi le lelei, ona tauva ma i latou ma avea ma o latou faiaoga? Sa ou naunau e aoao ma sa ou fiafia lava ina ua ou faalogo sa i ai se vasega sauniuni a le siteki mo faiaoga o le Aualofa.

Ina ua ou auai i le fonotaga faamasani mo le taimi muamua lava, sa faatumulia au i ni faamoemoega maualuluga. Ou te lei saunia mo le fesili sa fesiligia ai au e uiga i le po o le a le ituaiga o teuga o le laulau o le a ou faaaogaina pe a fai la’u lesona. Sa matuai ou lagona le leai o sou faamoemoe! Sa ou le iloaina po o le a le mea e tau o le teuga i le ogatotonu po o le a lona faamoemoega e i ai i le tuuina atu o se lesona. Sa amata e lagona le lelei e uiga ia te a’u lava ona faavaivaia ai lo’u lototele. …

Sa faaauau pea ona ou lagona le faatauvaa a o ou vaavaai atu i uso i lau uarota ma vaaia i latou o totoina ni faatoaga ma tuuapa ia fua o faatoaga. Sa latou faamalositino i aso uma e ala i le tamoemoe. Sa latou suisui ma fai faatauga i aitema e pau tau. … Sa latou aveina atu taumafataga o le afiafi i tina fou ma e mamai i o latou pitonuu. Sa latou tausia se matua matua, o nisi taimi e toalua. … Sa latou faamaoni i le faiga o galuega o le malumalu, ma sa latou popole i le tusitusi soo ia latou apitalaaga.

O le lofituina ai i faataitaiga o le atoatoa na siomia atoa ai au, sa faateleina ai au taumafaiga ia pei o ou uso, ma sa ou lagona le ita ia te au lava faapea foi ma le tausalaina pe a ou le tamo’e i taeao uma, tao a’u lava falaoa, su’i o’u lava lavalava, pe alu i le iunivesite. Sa ou lagonaina e tatau ona ou pei o tamaitai ia sa ou nofo faatasi ai, ma sa ou lagonaina sa ou toilalo ona sa le mafai ona faigofie ona faamasani au lava i sitaili o o latou olaga.

Semanu na aoga ia te au i le taimi lea ia le tala e uiga i se tamaitiiti e ono tausaga le matua, o le, ina ua fesili i ai se tasi o lona aiga, “O le a se mea e te fia avea ai?” sa tali atu, “Ou te manatu o le a ou pei o au lava. Sa ou taumafai lava ia pei o se isi tagata. Sa ou toilalo i taimi uma lava!” E pei o lenei tamaitiiti, ina ua mavae le toilalo faafia ina ia pei o se isi tagata, sa iu ina ou aoaoina e tatau ona ou pei o au lava. Peitai, o lena mea e masani ona le faigofie, ona o o tatou manao ia ofi ai, ia tauva ma faamalie, pe tau lava o le ia faamaonia, e taitai atu ai i tatou e faataitai i isi ma le faatauaina ai o tatou lava siosiomaga, a tatou lava taleni, ma o tatou lava avega ma luitau. … Sa tatau ona ou aoao e faatoilalo lou lagona o le popole e faapea, afai ou te le mulimuli i ai, o lona uiga e lei lava lo’u lelei.

… Pe a ou taumafai e kopi i ou uso maoae pe a ou aoaoina lau vasega ma se teuga ogatotonu faapitoa ma isi metotia faafaiaoga sa ou le masani ai, sa ou toilalo ona e talanoa mai lava le Agaga ia te au i le faaSiamani, ae le o le faaPeretania. Ae pe a ou alu ifo i ou tulivae e ole atu mo le fesoasoani, sa ou aoao ai e faalagolago i le Agaga e taiala au, na saogalemu i le malamalama o au o se afafine o le Atua. Sa tatau ona ou aoao ma talitonu sa le manaomia ona ou faatauva i isi ia alofaina ma taliaina ai e lou Tama Faalelagi.

… O a tatou taumafaiga e le tatau ona faapea ia faafiafia pe ia faataitai ae ia suia e le Agaga. …

O le tele o avega e noatia ai i tatou i le lalolagi. O le faamaoni moni e faasaoloto ai i tatou e iloa le finagalo o le Atua mo o tatou olaga. …

… E ui atonu tatou te aofia atoatoa i le faafetauia o o tatou luitau i aso uma ma avanoa mo le tuputupu ae, e le mafai ona tatou ola i le aso e tasi po o le minute tasi e aunoa ma le nofouta i le mana o loo i totonu o i tatou.