Mataupu Faavae mo le Auaunaga

Fefautuaai atu e uiga i o Latou Manaoga

E te le tau faia nao oe lenei mea. O le fefautuaai e mafai ona tuuina atu ai le fesoasoani e te manaomia e fesoasoani ai i isi.

Ua valaaulia oe e le Atua e te auauna atu i se tagata e toatasi po o se aiga i lau uarota po o le paranesi e tusa ai ma o latou manaoga. Ae e faapefea ona e iloa po o a na manaoga? O le mataupu faavae o le fefautuaai, lea ua avea ma taulaiga i le Ekalesia, e taua lea.

A uma ona talanoaina autu atonu tatou te mafaufau e fefautuaai ai, o le a tatou talatalanoa:

1. Fefautuaai ma le Tama Faalelagi.

2. Fefautuaai ma le tagata ma le aiga ua atofaina atu.

3. Fefautuaai ma a tatou soa.

4. Ma le fefautuaai ma isi na tofia atu i le tagata po o le aiga lava lea e tasi.

E taua tele foi le fefautuaai ma o tatou taitai. O se tusiga i le lumanai o Mataupu Faavae o le Auaunaga i le Liahona o le a suesue ai fefautuaaiga ma taitai faapea foi ma le matafaioi o faatalatalanoaga e uiga i auaunaga i lena faagasologa.

O Mataupu Tatou te Fefautuaai e uiga i ai

O le malamalama i manaoga e taua tele i le auaunaga i le tasi ma le isi. Ae o a ituaiga mea e mafai ona i ai na manaoga, ma e i ai nisi mea nai lo o manaoga e tatau ona tatou sailia?

O manaoga e tele ituaiga mea e mafai ona oo mai ai. Atonu o feagai i latou o loo tatou auauna atu i ai ma luitau e faalelagona, faaletupe, faaletino, faaleaoaoga, ma isi mea faapena. O nisi o manaoga e sili atu ona maualuga le faamuamua e tatau ona ave i ai nai lo o isi. O nisi o le a tatou saunia e fesoasoani atu i ai; o isi e ono manaomia ai ona tatou ofo atu i tatou lava e fesoasoani i ai. I a tatou taumafaiga e fesoasoani e taulima ia manaoga faaletino, aua nei galo o lo tatou valaauga e auauna atu e aofia ai le fesoasoani i isi ia agai i luma i le ala o le [osia ma tausia o] feagaiga, saunia mo ma le mauaina o sauniga o le perisitua e taua mo le faaolataga.

E faaopoopo atu i le fefautuaaiga e uiga i manaoga o se tagata po o se aiga, e tatau ona tatou saili ia iloa o latou malosiaga. O a mea latou te le manaomia ai le fesoasoani? O a ni o latou tomai ma meaalofa o i ai e mafai ona faamanuiaina ai isi? E faapefea ona fetaui lelei i le fesoasoani e fausia le malo o le Atua? O malosiaga o se tagata atonu e taua le malamalama i ai e pei foi o ona manaoga.

ATA MAI LE STOCKADOBE.COM MA LE GETTY IMAGES

1. Fefautuaai ma le Tama Faalelagi

   O se tasi o talitonuga autu o le tatou faatuatuaga o le, e fetalai mai le Tama Faalelagi i Ana fanau (tagai Mataupu Faavae o le Faatuatua 1:9). A tatou maua se tofiga fou e auauna atu i se tasi, e tatau ona tatou fefautuaai ma le Tama Faalelagi i le tatalo, saili faaaliga ma le malamalamaaga i o latou manaoga ma malosiaga. O lena taualumaga o le fefautuaai e ala i le tatalo e tatau ona faaauau lava i le taimi atoa o le tatou tofiga e auauna atu.

2. Fefautuaai ma Tagata Taitoatasi ma Aiga

   O auala ma taimi e faalatalata atu ai i tagata taitoatasi ma aiga ua valaauina i tatou e auauna atu i ai e eseese lava e faalagolago lea i tulaga, ae o le fefautuaai tonu ma le tagata po o le aiga e taua lea mo le fausia o sootaga ma malamalama ai i o latou manaoga, e aofia ai auala latou te mananao e fesoasoani atu ai. O nisi fesili e ono tatau ona faatali seia oo ina atinaeina se mafutaga anoa. E ui e leai se auala sao e tasi e fai ai lena mea, mafaufau i mea nei:

   • Saili pe faapefea ma o afea latou te mananao e faafesootai atu ai i latou.

   • Aoao e uiga i mea latou te fiafia i ai ma siosiomaga e o mai ai.

   • O mai ma ni fautuaga mo auala e mafai ona e fesoasoani atu ai, ma fesili atu mo ni a latou fautuaga.

   A o tatou atinaeina le talitonuina, mafaufau e talanoa i manaoga o le tagata po o le aiga. Fai atu fesili pe a uunaia ai e le Agaga Paia.¹ Mo se faataitaiga:

   • O a ni luitau o feagai ma i latou?

   • O a ni sini a le latou aiga po o le tagata? Mo se faataitaiga, pe latou te mananao ia lelei i le faia e le aunoa o afiafi faaleaiga, po o le ia faateleina le ola tutoatasi?

   • E mafai faapefea ona tatou fesoasoani ia i latou ma a latou sini ma luitau?

   • O a ni sauniga o le talalelei o loo loma i o latou olaga. E faapefea ona tatou fesoasoani ia i latou ina ia saunia?

   Manatua e ofo atu le fesoasoani fitoitonu e pei o le, “O le a se mea, po o le a mafai ona matou aumaia ai se meatausami mo outou i le vaiaso lenei?” O se ofo e le manino e pei o le, “Tau mai pe afai e i ai se mea e mafai ona matou faia,” e le aoga tele.

3. Fefautuaai ma a Tatou Soa

   Ona atonu e le o taimi uma o le a oulua faatasi ai ma lau soa i le taimi e te lua fegalegaleai ai ma le tagata po o le aiga, e taua le faamaopoopo ma fefautuaai faatasi a o e saili mo musumusuga i le avea ai o se soa. O nisi nei o fesili e mafaufau i ai:

   • E faapefea ma o le a faafia ona oulua talanoa ma le tasi ma le isi i le avea ai o se soa?

   • E mafai faapefea e oulua taitoatasi ona faaaoga lua malosiaga taitoatasi e auauna atu ai i manaoga o le aiga po o le tagata.

   • O a ni mea ua e aoaoina, o a ni aafiaga ua e oo i ai, ma o a ni uunaiga ua e maua talu mai le taimi mulimuli na e talanoa atu ai e uiga i le tagata po o le aiga?

4. Fefautuaai faatasi ma Isi ua Atofaina

   Atonu e lelei mai lea taimi i lea taimi le talanoa i isi o e ua atofaina e auauna atu i le tagata po o le aiga lava lena e tasi ua atofa i ai oe.

Talanoa e Foia ai Luitau

Ua faaaoga e Elder Chi Hong (Sam) Wong o le Au Fitugafulu se tala mai le Mareko 2 i o tatou aso e faamatala ai le auala na mafai ai e le fefautuaai faatasi o ni tagata e toafa ona fuafua le auala e mafai ai e se alii sa ma’i i le supa, ina ia i ai i le nofoaga sa i ai Iesu.

Fai mai Elder Wong, “Atonu e tai faapenei.” “E toafa tagata sa faataunuuina se tofiga mai le latou epikopo e o e asiasi, i se fale, o se alii sa maua i le ma’i o le supa. … I se fono a le uarota lata mai nei, ina ua uma ona fefautuaai faatasi e uiga i manaoga i totonu o le uarota, sa tuuina atu e le epikopo ni tofiga ‘laveai’. Sa tofia nei tagata e toafa e fesoasoani i lenei alii. …

“[Ina ua latou taunuu atu i le maota lea sa i ai Iesu,] ua tumu saisai tele le potu. Sa le mafai ona latou ofi mai i le faitotoa. Ou te mautinoa sa latou taumafai mea uma na mafai ona latou mafaufau i ai, ae sa le mafai lava ona ofi atu i totonu. … Sa latou fefautuaai faatasi i le isi mea e fai—pe faapefea ona latou aumaia le tagata ia Iesu Keriso mo le faamalologa. … Sa latou faia se fuafuaga—e lei faigofie, ae sa latou faataunuuina.

“… ‘Ona latou tatala lea o le ufi o le fale sa i ai o ia: ua faasosofa i ai, ona latou tuutuu ifo ai lea o le moega o taoto ai le supa’ (Mareko 2:4). …

“… ‘Ua silafia e Iesu lo latou faatuatua, ona fetalai atu lea o ia i le supa, Lo’u atalii e, ua faamagaloina au agasala” (Mareko 2:5).”²

Valaaulia e Faatino

Na faamalosi mai Elder Dieter F. Uchtdorf o le Korama a Aposetolo e Toasefululua e faapea, “Ia fefautuaai faatasi, faaaoga uma punaoa o loo maua, saili atu i musumusuga a le Agaga Paia, ole atu i le Alii mo Lana faamautinoaga, ona afe lea i luga o lima o lou ofu, ma alu e galue.

“Ou te tuu atu ia te outou se folafolaga: afai tou te mulimuli i lenei mamanu, o le a outou mauaina taitaiga patino e faatatau i le o ai, o le a, o afea, ma pe o fea e faia ai i le ala a le Alii.”³

Faamatalaga

1. Tagai Tala’i La’u Talalelei: O Se Taiala mo le Galuega Faafaifeautalai (2004), 183.

2. Chi Hong (Sam) Wong, “Laveai i le Lotogatasi,” Liahona, Nov. 2014, 14–15.

3. Dieter F. Uchtdorf, “O Le Faia i le Ala a le Alii,” Liahona, Nov. 2011, 55.

O tusiga “O Mataupu Faavae o le Auaunaga” ua faamoemoeina e fesoasoani ia i tatou e aoao e fetausia’i ai le tasi ma le isi—ae le o le faasoaina atu o ni savali i taimi o asiasiga. A o tatou iloaina i latou tatou te auauna atu i ai, o le a uunaia i tatou e le Agaga Paia ia iloa po o le a le savali latou te ono manaomiaina e faaopoopo atu i la tatou tausiga ma le agaalofa.

O Le Mana o le Fefautuaai

Na saunoa mai Peresitene M. Russell Ballard o le Sui Peresitene o le Korama a Aposetolo e Toasefululua, “Afai e te manao e faaleleia atili se mea, e tatau lava ona outou fefautuaai e uiga i ai.” “Pe a tatou [faia], tatou te fausia ai le fegalegaleaiga faaleagaga o le faateleina lea o le aoga po o le ausiga o se taunuuga o faatinoga tuufaatasi po o le soofaatasi, o le taunuuga o lea mea e maoae atu nai lo o le aofaiga o vaega taitoatasi” (i le R. Scott Lloyd, “Counseling with Councils Is Lord’s System, Elder Ballard Declares,” Church News section of LDS.org, Jan. 11, 2017, news.lds.org; “Strength in Counsel,” Liahona, Ian. 1994, 77).

O le fausia o mafutaga o se vaega taua foi o le fefautuaai faatasi. Tagai foi i le tusiga Mataupu Faavae o le Auaunaga “Fausia o Sootaga Anoa,” i le lomiga o Aokuso 2018 o le Liahona, i le itulau e 6.