Faatuatua, Faamoemoe, ma le Alofa Tunoa, Vaega 2
O Se Tatalo sa Taliina
E alala le tusitala i New Jersey, ISA.
O Grace o se teineitiiti e 11 ona tausaga sa nofo i Holani i le taimi o le Taua Lona II o le Lalolagi. O lona tama sa aveeseina atu o se pagota o le taua.
Ina ua uma ona aveese atu Tama, sa tausi e Tina ia Grace, ma ona tuagane e toalua ma ni ona tausoga e toalua. Sa tele gutu e fafaga ae sa le lava ni meaai e fafaga ai. Sa nao ni nai falaoamata, fualaau faisua, ma pateta laiti lava a le latou aiga.
I se tasi aso sa tatagi ai le logo o le faitotoa. Na mulimuli atu Grace ia Tina e vaai po o ai. Ina ua tatalaina e Tina le faitotoa, sa tu mai iina i le faitotoa se alii ofisa talavou o le Nazi. Sa amata ona tatavale le fatu o Grace, ma sa ia taofia lana manava. O le a le mea sa manao i ai o ia?
“E toa fia ni tagata o loo nonofo i totonu o le fale lenei?” sa ia fesili ai ma le pau.
Sa faapea atu Tina, “E na’o a’u, la’u fanau e toatolu ma nai o’u tei tama e toalua.”
“E leai sou toalua iinei?” na fesili ai le alii ofisa.
“Leai,” o le tali atu lea a Tina. “Na aveesea atu o ia.”
Sa autilo solo le alii ofisa i le fale. “O i ai sau leitio? Matou te le mananao tou te faalogologo i polokalama mai o tatou fili i Egelani ma Amerika.”
Sa aumai e Tina le leitio ma tuu atu i le alii ofisa.
“O se fale tele lenei,” sa ia fai mai ai, ma toe autilo solo ai. “Ua tele tele mo nao ni nai tagata o loo nonofo ai iinei. E tatau ona outou o ese taeao. O le a matou pule i le fale lenei.” Sa masau lana liliu ma savali ese loa.
Sa le talitonu Grace i le mea sa ia faalogoina. Sa ia vaai atu i mata o Tina ua puputetele i le te’i. Ona tapuni lea e tina le faitotoa ma alu atu sa’o i tua o le fale.
Sa mulimuli lemu atu i ai Grace, ma lona fatu ua tatagase. Mata e toe sau mo’i lava le fitafita e ave lo latou fale, e pei ona ia avea la latou leitio? O lea se mea o le a latou faia? O fea o le a latou o i ai? O le a faapefea ona iloa e Tama le mea e toe maua i ai i latou?
Sa tu Grace i fafo o le faitotoa o Tina ma autilo atu i totonu. Sa tootuli Tina, e tatalo. Sa toe foi filemu Grace i le potu malolo seia oo ina toe alu atu Tina.
“Tina ea, o le a le mea o le a tatou faia?” Sa fesili atu ai Grace.
Sa mapuea Tina. “Na pau le mea e mafai ona tatou faia o le tatalo ma faatuatua i le Alii o le a Ia puipuia i tatou.”
Sa lei toe foi mai le alii ofisa talavou o le Nazi i le aso na sosoo ai po o le isi aso. Sa lei toe foi mai lava! Sa mafai e Grace ma lona aiga ona taofi pea i lo latou fale.
Sa iloa e Grace sa fesoasoani mai le Atua i lona aiga. E ui lava ina sa lei uma le taua, ae sa Ia tausia pea lava i latou.
E toe faaauau …