“Pe Na I Ai So’u Taimi e Auauna Atu ai i La’u Uo i le Vasega?,” Liahona, Iuni 2024.
O Leo o le Au Paia o Aso e Gata Ai
Pe Na I Ai So’u Taimi e Auauna Atu ai i La’u Uo i le Vasega?
Sa ou manatu e leai so’u taimi e fesoasoani ai, ae sa faamanuiaina a’u e le Alii mo la’u osigataulaga.
Ata na tusia e Lee Montgomery / IllustrationX
I le 1998, sa amata ai a’u aoaoga i le Iunivesite o Andes. Sa ou matua manao lava ia maua lo’u faailoga tikeri o le iunivesite ma se averesi lelei o o’u togi. Ae sa faigata a’u vasega o amioga faasolitulafono, ma sa faigata ia te a’u ona faamasani atu i galuega faale-iunivesite. Ma le isi, sa ou pisi e auauna atu o se fesoasoani i le au epikopo o la’u uarota ma faigaluega i le po e tausi lo’u aiga.
O le masalosalo ma le popole na faalemanuia ai o’u faamoemoega i lena tausaga muamua a o o’u mauaina togi e i lalo ifo o le averesi o le vasega. A o tau faaiuiu le tausaga aoga, sa faateleina la’u aioiga i le Atua i le tatalo mo se fesoasoani e malamalama ai i teori (manatu fatufatu), mataupu faavae, ma faiga faavae taitasi.
I lo’u tausaga lona lua, sa ou feiloai ai i se tasi o la’u vasega ou te lei maitauina muamua e igoa ia Argenis. Sa ou iloaina na te le’i vaai foi ia te a’u—pe na te le vaai mai lava foi ia te a’u ona sa tauaso o ia. I se tasi aso sa ia aga’i mai ia te au ma lona tootoo ma le tapeleti patupatu ma fesili mai mo se fesoasoani. Sa ia fai mai sa ia te a’u se leo lelei ma sa ia manaomia a’u e pu’eleo ia taiala suesue tusitusia ina ia mafai ona ia faalogo i ai.
Sa ia fesili atu i isi, ae sa latou mumusu. O i latou na fesoasoani ia te ia i le tausaga na muamua atu sa mumusu e toe fia fesoasoani ia te ia. I le va o a’u fuafuaga pisi ma togi le lelei, sa ou musu foi e fesoasoani.
Peitai, e ui lava e lei ioe aloaia i lana talosaga, ae sa vave lava ona ou faitauina ma toe faitauina ia taiala e pu’eleo ai a latou anotusi mo Argenis. I se taimi, sa avea i ma’ua ma uo, ma sa amata ona ou faasoa atu le talalelei a Iesu Keriso ia te ia. Sa ou tuuina atu foi ia te ia se Tusi a Mamona lolomi patupatu. Sa ia talisapaia la’u fesoasoani ae sa lei fiafia lava e aoao atili e uiga i le Ekalesia.
Peitai, a o faaauau pea ona ou faitau ma pu’eleoina ia taiala suesue, sa amata ona agai i luga o’u togi averesi o la’u vasega. E oo lava i a’u uo na maitauina ua avea a’u ma se tagata aoga sili atu ma tuputupu ae i lo’u malamalama.
E valu tausaga talu ona ou faauu, ae faauu foi la’u uo o Argenis. Sa lei fiafia o ia e aoao e uiga i le Ekalesia, ae sa ia fesoasoani mai ia te au ia ou malamalama “pe a outou auauna atu i o outou uso-a-tagata, ua na o lo outou auauna atu lava lea i lo outou Atua” (Mosaea 2:17). Sa ia fesoasoani foi ia te au ia iloa a o ou auauna atu i isi, e faamanuia a’u e le Atua ma faateleina lo’u tomai.