Ua Na’o Tusiga Faatekinolosi
O Le Mana o Pese a le Peraimeri
E alala le tusitala i Idaho, ISA.
O le aafiaga o la’u tama teine i se fale tausi soifua na fesoasoani ia te au e iloa ai le lautele e oo atu ai musika a le Peraimeri e mafai ona faamanuiaina ai le olaga o tagata uma.
Ina ua faatoa valaauina au o se taitai musika o le Peraimeri, sa ou fefe. E ui ina sa ou aoaoina le piano ma usu i aufaipese faavaega, ou te lei taitaia lava se pese i lou olaga. Mo le masina muamua o lo’u valaauga, sa ou fa’atu ai lava i lena vaega o le Aso Sa ona ou te lei lagonaina le agavaa.
O le taimi lena, sa faigaluega ai la’u tama teine e 21 tausaga le matua, o KennaDee, i se fale tausi soifua a le Veterans Affairs (VA). E fiafia KennaDee e pese, ma sa masani ona ia faia i le galuega. Sa ia usuina ni pese mai faaaliga/ata tifaga a o aai tagata i le aiga o le aoauli. Sa ia usuina foi pese aloaia a paranesi o le militeli sa latou auauna atu i ai ma talia ni talosaga i le taimi o le malologa (e aofia ai se viiga FaaKerisiano na te lei iloaina muamua ae sa aoaoina mo se tagata e nofo ai i le nofoaga).
O se tasi o tamaitai e nofo i le nofoaga sa ola i se olaga na tumu i sauaga faatautala. Sa ia te ia le agaga finau atu ma e na te le faatagaina le au tausimatua e fafaga, faataele, pe faa’ofu o ia. E tetee i le inuina o ana fualaau ma soo se ituaiga o suesuega mo lona tino. I se tasi aso, i le mulimuli ai i musumusuga, sa usuina ai e la’u tama teine ana pese Peraimeri mai le Tusipese a Tamaiti. Sa vave ona to’afilemu le tamaitai. Sa ia faaalia i ona mata se malamalama o le iloaina. Sa iloa e le aufaigaluega o le a gauai mai lenei tamaitai pe afai e usuina pea e KennaDee pese Peraimeri. Ua mafai ona latou faa’ofu, faataele, ma fafaga o ia ma avatu ana vai, ma na o sina tauiviga po o le tetee. Sa aoao atu foi e KennaDee ni pese Peraimeri i isi tagata o le aufaigaluega ina ia mafai ai ona latou fesoasoani i lenei tamaitai i taimi e le faigaluega ai KennaDee.
Ina ua uma ona ou faalogo i tala a la’u tama teine, sa ou iloaina se isi mafuaaga e taua tele ai le valaauga o le taitai musika o le Peraimeri. Na suia o’u uiga a o ou malamalama atoatoa e faapea o musika, aemaise lava musika faalelotu, atonu e na o le pau lea o le mea e fesoasoani ai i tamaiti e ala i o latou tofotofoga sili ona loloto i le olaga. Sa ou faia o la’u sini e aoao tamaiti i le tele o pese e uiga ia Iesu Keriso i le mea na ou mafaia. Atonu e le manatuaina e tamaiti se lauga se tasi o le Peraimeri po o le sauniga faamanatuga, atonu latou te le manatuaina ni lesona patino, ma o nisi atonu e se ese mulimuli ane mai le ala o feagaiga, ae atonu o le a latou manatuaina pese sa latou aoaoina ma pe na faapefea o latou lagona ona o pese. I le tulaga o lenei tamaitai, sa ia manatuaina na pese e tusa lava pe na te lei manatuaina lona lava aiga! Faamolemole ia silafia le taua o lenei valaauga!