“Aoaoina o Fanau i le Mana o Sootaga ma Auaunaga,” Liahona, Iuni 2024.
Aoaoina o Fanau i le Mana o Sootaga ma Auaunaga
O le fesoasoani ai i a tatou fanau e auauna atu i isi i o latou aiga, i le Ekalesia, ma i le alalafaga e faataatia ai se faavae mo le fiafia i le lumanai e ala i le fesoasoani ia i latou ia maua le fiafia moni i le taimi nei.
Sa masani ona ou valaauina le ma tama teine e fitu tausaga le matua o la’u auupega faalilolilo. A o ou auauna atu o se epikopo, sa ou manao e faaaofia la’u fanau i la’u auaunaga. O le aumaia o ia faatasi ma a’u e asiasi i tagata o le uarota e le gata ina faatagaina ai a’u e faaalu se taimi tele faatasi ma ia ae sa masani foi ona tatalaina faitotoa na tapunia muamua. E faigata ona teena le epikopo pe a ataata mai ia te oe lona afafine aulelei e fitu tausaga le matua. Ma e faapei ona mo le lelei o tagata o la matou uarota, ou te talitonu sa faapea foi ona lelei mo la’u teineitiiti. E le gata ina sa ia maitauina le alofa o lona tamā ma auauna atu i isi, ae sa ia aoaoina a o laitiiti e mafai ona ia alofa ma auauna atu foi i isi—ma faamanuiaina o ia i le olioli i le taimi lava e tasi.
Tatou te mananao uma lava ia sologa manuia a tatou fanau. Tatou te mananao ia latou ola i ni olaga fiafia e faatumulia i sootaga alofa. Ae o le lalolagi o loo tatou ola ai e masani ona avea lenei mea ma luitau. O le tele o faatosinaga faaonapo nei e uunaia ai a tatou fanau ina ia taulai atili atu i le “a’u”. E masani ona latou maua savali e faapea e maua le fiafia i le taulai atu i mea o loo i ai mo i latou.
O le saienisi faaagafesootai sili ona lelei e faaalia ai e faapea o amioga faapogai i fegalegaleaiga o se ki lea i le sologa manuia. O “Amioga Fegalegaleai” o se auala faafaigofie e faamatala ai lenei aoaoga a le Faaola: tatou te mauaina i tatou lava (ma le fiafia moni) e ala i le faamaumauina o i tatou lava i auaunaga alofa (tagai Mataio 10:39).
Ae o loo i ai se faamai pipisi o le tuuatoatasi i lo tatou lalolagi, mai tamaiti e oo atu i le autalavou matutua faapea ma tagata matutua. E toatele e sili atu ona fesootai atu i isi e ala i faasalalauga faaagafesootai nai lo se isi lava taimi muamua. Ae, o le mea e faanoanoa ai, ua sili atu ona momotuuese atu i latou mai sootaga moni o le olaga nai lo se isi lava taimi muamua.1
E mafai faapefea la ona tatou fesoasoani i a tatou fanau ia iloa o sootaga anoa ma auaunaga aoga o le a aumaia ai ia i latou le olioli sili atu?
Faafesootai le Auaunaga i lo Latou Faasinomaga Autu
O se galuega taua tele mo matua o le fesoasoani lea i a latou fanau ia iloa po o ai i latou. O le toatele i aso nei e taulai atu i le faasinomaga i auala e tuueseese ai ma vaevaeina ai i tatou. Nai lo le taulai atu i lo tatou faasinomaga o se vaega o le aiga o le Atua, e toatele e filifilia faailoga e faalotovaivaia ai le agaalofa ma le tausiaina o i latou o siomiaina i tatou.
E leitioa faamamafa mai e Peresitene Russell M. Nelson le taua o le iloa ma le faamuamua o o tatou faasinomaga sili ona taua:
“O ai oe?
“O le mea muamua lava ma le sili, o oe o se atalii ma se afafine o le Atua.
“Lua, i le avea ai ma se tagata o le Ekalesia, o oe o se tagata o le feagaiga. Ma le tolu, o oe o se so’o o Iesu Keriso.”2
Afai tatou te vaai muamua ia i tatou lava o ni fanau a le Atua, ua tatou aoao ai o i tatou taitoatasi “ua i ai se natura paia ma se taunuuga.”3 O lona uiga, o lo tatou natura faavae e paia, ma ua ia i tatou le gafatia e avea ai faapei o le Atua. Ua Ia fetalai mai ia i tatou, “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39). O mea uma e faia e le Atua [e faatino ai] le alofa ma faamanuia ma faaea i tatou. “E le faia e ia se mea sei vagana mo le manuia o le lalolagi” (2 Nifae 26:24).
Tou te silafia, e silafia e le Atua le auala e faia ai le fiafia e sili atu nai lo le mea tatou te faia. Pe o se mea ea e ofo ai pe a tatou ola i se olaga e faatotonugalemu ia i tatou lava, o le tatou agai faasagatau lea i lo tatou natura e faavavau? Ua amata ona tatou lagonaina le leai o se faamoemoe ma se fiafia. O i latou o e “ua le tusa ai ma le natura o le Atua … ua i ai i se tulaga ua le tusa ai ma le natura o le fiafia” (Alema 41:11). O lo tatou natura e faavavau e faigata ai ona maua le fiafia i le ola ai e faatotonugalemu ia i tatou lava, ma le amioletonu (tagai Helamana 13:38).
E ala i le taulai atu i lo tatou faasinomaga moni o ni fanau a le Atua, tatou te aoao ai o loo tatou i ai moni lava o ni uso ma tuafafine/tuagane. O le iloaina o lo tatou faasinomaga moni e fesoasoani ia i tatou e faataua atili ai le auaunaga ma sootaga. Ua tatou iloa ai ua tatou “faipaaga ma le Silisiliese i le ausiaina o le faamoemoega o le fuafuaga e faavavau o le faaolataga,” e pei ona aoao mai e Elder John A. Widtsoe.4 Tatou te “faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma … tutu o ni molimau a le Atua i taimi uma” (Mosaea 18:9).
Fesoasoani i a Tatou Fanau ia Faataua Sootaga ma Auaunaga
I le avea ai ma matua, e mafai ona tatou fesoasoani ia tatou fanau ia ola fiafia e ala i le fesoasoani ia i latou e faataua sootaga. E leai se tasi e mafai ona ola manuia e aunoa ma ni sootaga lelei. Sa silafia e le Atua lenei mea, o Lana fuafuaga atoatoa la ua tuuina ai i tatou i aiga, i uarota po o paranesi, ma i nuu. Na te silafia tatou te manaomia lenei mea e aoao ai e alolofa ma auauna atu e pei ona Ia faia. E pei ona faamanatu mai e Elder Quentin L. Cook o le Korama a Aposetolo e Toasefululua ia i tatou: “Ua talosagaina i tatou e Peresitene Russell M. Nelson ’ia faaalia le feavata’i sili atu, o le lotogatasi o lanu ma ituaiga tagata ma le faaleaganuu ma le fefaaaloaloai.’ O lona uiga o le alofa o le tasi i le isi ma le Atua ma taliaina tagata uma o ni uso ma ni tuafafine/tuagane ma avea moni ai o se nuu o Siona.”5
Mafaufau i le mamana tele o le mafai ai ona iloaina e a tatou fanau e le gata ina poloaiina i tatou e le Atua e tausi e le tasi le isi ae ua ofo mai foi e faatasi ma i tatou i a tatou taumafaiga. E le tuua i tatou e le Atua e faia e na o i tatou lava lenei auaunaga. Ua Ia folafola mai e savavali faatasi ma i tatou: “O le a mau oe ia te a’u, ma a’u ia te oe; o le a savali faatasi ma a’u” (Mose 6:34). O le taunuuga o le savavali faatasi ma le Atua i auaunaga alofa o le suia lea o le olaga. Tau lava ina faitau i mea na mafai ona ausia e Enoka faatasi ai ma le fesoasoani a le Atua ma le totonugalemu o sootaga i le fatuina o Siona. O se faataitaiga mamana e mafai ona tatou vaai atu i ai. (Tagai Mose 6--7.)
O le fesoasoani ai i a tatou fanau e auauna atu i isi i o latou aiga, i le Ekalesia, ma i le alalafaga e faataatia ai se faavae mo le fiafia i le lumanai e ala i le fesoasoani ia i latou ia maua le fiafia moni i le taimi nei. Tatou te fesoasoani ia i latou ia avea atili e faapei o le Atua ma maua ai le olioli lea e fatuina e se olaga faaleatua.
Sa faamalamalama mai e Elder David A. Bednar o le Korama a Aposetolo e Toasefululua e faapea, a o tatou atiina a’e le uiga o Keriso, e masani lava ona tatou liliu atu i fafo atu i auaunaga alofa i isi.6 E iloa e Satani lenei mea ma e manao ia tatou liliu ane ma taulai ia i tatou lava. Ae e mafai ona tatou fesoasoani ia tatou fanau ia malamalama o le auaunaga alofa e sili atu ona aoga i le fatuina o le fiafia nai lo le taulai ane ia i tatou lava. E moni pea lava le faataoto tuai: “Fesoasoani i le vaa a lou uso i le isi itu, ma tagai foi, ua taunuu ai ma lou foi vaa i le apitaogalu.”7
E faapefea? Faaaofia le Atua ma “Siia’e Le Mea E Te Tu Ai”
O le fesoasoani i a tatou fanau e aoao e vaai atu i isi o ni uso ma ni tuafafine/tuagane e mafai ona amata i a tatou tatalo faaleaiga. Mo le tele o tausaga, o a matou tatalo faaleaiga na aofia ai aioiga mo le Atua e faamanuia lo matou aiga. I le faaaogaina o le “aiga,” o lona uiga (ma tatalo patino mo) o matou aiga patino (matua ma fanau), o lo matou aiga lautele, o le matou aiga faaleuarota, ma lo matou aiga i le pitonuu. Sa ma’ua mananao i le ma fanau ia vaai atu ia i latou na tuuina e le Atua e siomiaina i matou o se vaega o lo matou aiga.
Ona matou tula’i lea mai o matou tulivae ma taumafai e auauna atu i e o loo matou tatalo mo i latou. Ma te faaaofia la ma’ua fanau i sootaga alofa ma o latou tauaiga tamaitai, tauaiga tane, tausoga, ma matua matutua. Mo se faataitaiga, sa fesoasoani le ma fanau ia i ma’ua a o ma tausia lo’u tina agelu mo nai tausaga mulimuli o lona olaga. E mautinoa lava matou te lei faia ma le atoatoa, ae o a matou taumafaiga na faia ai se eseesega.
I le tele o itu, o le faia o lenei mea e le sili atu nai lo le “siitiaina a’e o le mea tatou te tutu ai,” e pei ona fai mai ai le saunoaga a Elder Dieter F. Uchtdorf o le Korama a Aposetolo e Toasefululua.8 E masani lava, o sini faigata e mafai ona faatino pe a tatou amata i le mea o tatou i ai ma faia mea tatou te mafaia. O o tatou lava aiga, ekalesia, ma nuu e maua ai le tele o avanoa e fesoasoani ai i a tatou fanau ia lagonaina le olioli i auaunaga anoa.
O Le Olioli o Fesootaiga i Feagaiga
Atonu ua outou maitauina le tele o taimi e faatatau ai [saunoaga] a o tatou taitai o le Ekalesia i le taua o le tumau ai i luga o le ala o feagaiga. O le ala o feagaiga e sili atu nai lo se seti o ni tulafono. O sauniga tatou te maua ma feagaiga tatou te osia o le ala lea a le Atua e fusia ai i tatou ia te Ia ma le tasi ma le isi i se auala e fesoasoani ai ia i tatou ia avea e faapei o Ia. O lenei mea e aofia ai e le gata o le poloaiga muamua ma le sili o le alofa i le Atua ae faapea foi le poloaiga sili lona lua ia alofa le tasi i le isi. O le mea moni, a o tatou faamaumauina i tatou lava i auaunaga, o le a maua e i tatou ma a tatou fanau o tatou ituaiga moni faaletagata.