“Na Faamāmāina e Iesu Keriso A’u Avega,” Liahona, Iuni 2024.
O Leo o le Au Paia o Aso e Gata Ai
Sa Faamāmāina e Iesu Keriso A’u Avega
Faatasi ai ma le vāvao uma i lo’u olaga, sa ou lagonaina e pei ua ou malemo seia oo ina ou maua le filemu mai le faitauina o le Tusi a Mamona.
Ata na tusia e Mariko Kowalski
I se tasi aso a o ou auauna atu i se tuafafine i le matou uarota, sa ia fai mai ia te a’u na te faitauina le Tusi a Mamona i tausaga taitasi. Sa ia molimau mai foi i faamanuiaga maoae na aumaia e lenei taumafaiga ia te ia. Ou te faafetai i lena tuafafine mo lana faataitaiga.
A o lei oo i lena asiasiga, sa na o le faatasi ona ou faitauina le Tusi a Mamona mai le faavaa i le faavaa, e ui sa ou suesueina i taimi uma pe a saunia mo tofiga faafaiaoga. Ina ua uma la’u asiasiga, sa ou filifili loa e mulimuli i le faataitaiga a lenei tuafafine. Sa ou toe amata i le 1 Nifae ma faitau e oo i le iuga. Na sa’o lava o ia! Sa faamanuiaina a’u i le tele o auala sa ou iloaina ma, ou te mautinoa, i isi auala ou te lei iloaina.
E lei leva ona uma ona ou faamaeaina le Tusi a Mamona mo le taimi lona lua, ae tuua loa e lo’u toalua lo matou aiga. O galuega e foliga mai e le mafai ona fai o la’u galuega fou na matuai faigata lava, ma o le tulaga o le soifua maloloina tumau o lo’u atalii na tuua ai a’u ma le lagona e pei ua ou malemo.
Ae na ou manatuaina lea o le faitauina i le Tusi a Mamona e uiga i le ala na tuu ai e Amulona ni avega tetele i luga o Alema ma lona nuu. Ina ua tatalo tagata mo se fesoasoani, sa ta’u atu e le Alii ia i latou sa Ia silafia lo latou tulaga ma o le a laveaiina i latou. Seia oo i lena taimi, na Ia fetalai ai, “Ma o le a Ou faamāmāina foi avega ua tuu i o outou tauau, e oo ia te outou tou te le lagonaina i latou i luga o o outou tua” (Mosaea 24:14).
Sa ou suesueina lena mataupu i le Mosaea i le tele o taimi muamua, ma sa ou aoaoina atu i le tele o taimi i isi i vasega o le talalelei. Sa ou talitonu i le moni o na fuaiupu. Ona sa ou masani i aoaoga o le Tusi a Mamona, sa ou iloa ai o upumoni patino e faaali mai pe a ou faatatauina tusitusiga paia i o’u tulaga patino.
O lea sa amata ai ona ou faitauina lena mataupu i aso uma mo le malosi ma faamanatu ia te a’u lava na agalelei foi le Alii ia te a’u. Sa tatau pea ona ou oo i tofotofoga, ae sa Ia faamāmāina a’u avega.
O na fuaiupu i le Tusi a Mamona na tauaveina a’u i se taimi o puapuaga maoae faaletagata lava ia, ma tuuina mai ai ia te a’u le filemu ma se malamalama mafanafana e manatua e le Alii Ana fanau uma.