Fesili ma Tali e uiga i le “Molimau Mamā”

“Ia avea lau molimau ma au faamuamua aupito maualuga.”¹ —Peresitene Russell M. Nelson

I le avea ai ma faamasino sili, na vaai Alema ua “amata ona faamaualuluga tagata o le ekalesia” (Alema 4:6) ma “tuu atu o latou loto i luga o oa ma luga o mea le aoga o le lalolagi, i le sa amata ai ona latou inoino, o le tasi i le isi” (Alema 4:8). Nai lo le faia o tulafono, sa filifili e Alema se isi tagata e nofoia lona tulaga o se faamasino sili, ma sa ia tuuto atu o ia lava i le talaiina atu o le afioga a le Atua i tagata, “i le vaai atu ua leai se auala e mafai ai ona ia toe aumai o i latou, vagana ai le faamalosi atu e ala i le molimau mamā” (Alema 4:19).

O a vaega taua o se molimau?

E mafai ona tatou maua se molimau i mataupu faavae uma o le talalelei, ae o upumoni faavae nei:

O le Atua o lo tatou Tama oi le Lagi, ma e alofa o Ia ia i tatou.
O loo soifua Iesu Keriso. O Ia o le Alo o le Atua ma lo tatou Faaola.
O Iosefa Samita o le perofeta lea na valaauina e toefuatai mai le talalelei.
O Le Ekalesia a Iesu Keriso o le Au Paia o Aso e Gata Ai o le Ekalesia moni a le Faaola ma o loo taitaia e se perofeta soifua.²

Pe o se molimau ua na o ni upu?

“E te tuuina atu lau molimau pe a e faasoa atua ni lagona faaleagaga i isi. …

“O le isi auala e te faasoa atu ai lau molimau e ala lea i amioga amiotonu. O lau molimau ia Iesu Keriso e le na o mea e te tautala ai— o le ituaiga tagata e iai oe” (Gary E. Stevenson o le Korama a Aposetolo e Toasefululua, “Faafaileleina ma Le Tuuina Atu o Lau Molimau,” Liahona, Nov. 2022, 112).

O le a le mana o se molimau mamā?

Sa toe ta’ua e Peresitene Polika Iaga le aafiaga o le molimau faamaoni ma le faigofie a “se tagata e aunoa ma se malamalama faale-failauga, po o ni taleni o le tautala [i tagata] lautele, o le e na o le faapea mai lava, ‘Ou te iloa, e ala i le mana o le Agaga Paia e moni le Tusi a Mamona, o Iosefa Samita o se perofeta a le Alii.’ O le Agaga Paia e sau mai lena tagata e faapupula ai lo‘u malamalama … ; E siomia ai a’u, faatumulia ai, ma iloa ai mo a’u lava e moni le molimau a le tagata” (“Discourse,” Deseret News, Feb. 9, 1854, 4).

Ae faapefea pe afai e le taliaina e tagata la’u molimau?

Sa faasoa atu e se talavou matua lana molimau i tagata asiasi i le Lotoa o le Malumalu i le Aai o Sate Leki ina ua luiina o ia e se alii i ni fesili faavevesi.

“Ou te le iloa,” sa tali atu ai o ia. “E na o mea ou te iloa e mafai ona ou ta’u atu ia te oe.”

Sa ia osofaia o ia: “Aua le tuuina mai lau molimau ia te au.”

“Pau lena o le mea ua ia te au,” o lana tala lea.

“Ia, e le tele, a ea?” o lana tala lea.

Na uma le talanoaga, ae sa le mautonu ia te ia. Peitai, a o ia tomanatu i ai, sa ia iloaina o lana molimau sa sili atu nai lo le “e le tele.” Ia te ia lava, o lona uiga ua aofia ai o mea uma lava. Na aafia ai faaiuga taitasi i lona olaga.

O a ni auala e mafai ona ou faasoa atu ai la’u molimau?

E masani ona tatou mafaufau i le tuuina atu o molimau i le sauniga faamanatuga i le Aso Sa anapogi, ae e tele isi auala e faasoa atu ai o tatou lagona faaleagaga:

Tusi se tusi i lau fanau po o fanau a fanau e faasoa atu ai lau molimau ia Iesu Keriso ma Lana talalelei toefuataiina.
Faasao lau molimau i “Manatuaga” o le FamilySearch e faamalosia ai au fanau.
Tuu i luga o ala o faasalalauga faaleagafesootai le uiga o Iesu Keriso ia te oe.
I sauniga i Aso Sa, faasoa atu pe faapefea e se mataupu faavae o le talalelei o loo talanoaina ona faamanuiaina ai lou olaga.