Isi Punaoa
Perofeta

Perofeta

I le avea ai o i tatou ma tagata o le Ekalesia a Iesu Keriso o le Au Paia o Aso e Gata Ai, ua faamanuiaina i tatou aua ua ta’ita’i e perofeta soifua—o alii musuia ua tofia e saunoa e fai ma sui o le Alii, e pei lava o Mose, Isaia, Peteru, Paulo, Nifae, Mamona, ma isi perofeta o tusitusiga paia. Ua tatou lagolagoina le Peresitene o le Ekalesia o so tatou perofeta, tagata vaai, ma tali faaaliga—ua na o le pau lea o le tagata i le lalolagi e mauaina faaaliga e taitaiina ai le Ekalesia aoao. Tatou te lagolagoina foi fesoasoani i le Au Peresitene Sili ma sui o le Korama a le Toasefululua o ni perofeta, tagata vaai, ma tali faaaliga.

O perofeta o aso nei ua faapei lava o perofeta anamua e molimau ia Iesu Keriso ma aoao atu Lana talalelei. Latou te faailoa atu le finagalo ma uiga moni o le Atua. Latou te saunoa mai ma le lē fefefe ma le manino, e ta’utino mai le leaga o le agasala ma lapatai mai i ona taunuuga. E i ai foi taimi e musuia ai i latou e perofeta ane i mea o le a tutupu i le lumanai mo lo tatou manuia.

E mafai lava ona e faatuatuaina i taimi uma perofeta soifua. O a latou aoaoga e faaalia ai le finagalo o le Alii, o lē na folafola mai: “O le mea ua fai atu ai au le Alii ua ou fai atu ai lava, ma ou te le faatoese ai lava au; ma e ui ina mavae atu le lagi ma le lalolagi, a e le mavae atu lava la’u upu, a o le a faataunuuina lava, pe fai atu i lo’u lava leo po o le leo o au auauna, ua tusa lava ia” (MFF 1:38).

O lou saogalemu silisili o loo taoto i lou mulimuli tonu lea i afioga a le Alii ua tuuina mai e ala mai i Ana perofeta, aemaise lava i le Peresitene o le Ekalesia o loo i ai nei. Na lapatai mai le Alii, o i latou o e le talia upu a perofeta soifua o le a pauu (tagai MFF 1:14–16). Ua Ia folafola mai faamanuiaga silisili ia i latou o e mulimuli i le Peresitene o le Ekalesia:

“Ia outou gauai i ana upu uma ma poloaiga o le a tuuina atu e ia ia te outou e pei ona ia maua, ma savavali i o’u luma i le paia atoatoa;

“Aua o lana upu o le a outou talia, e pei lava o loo alu atu mai ia te au, i le onosai uma ma le faatuatua.

“Aua o le faia o nei mea o le a le manumalo ai faitotoa o seoli ia te outou; ioe, a e tafieseina e le Alii le Atua le malosi o le pogisa mai o outou luma, ma luluina le lagi mo lo outou lelei, atoa ma le mamalu o lona suafa” (MFF 21:4–6).