Seoli

E lua ni itu o loo ta’ua ai Seoli i faaaliga o aso e gata ai. Muamua, o se tasi lea o igoa mo le falepuipui o agaga, o se nofoaga i le lalolagi o agaga pe a mavae le olaga faaletino mo i latou o e na “oti i le solitulafono, e aunoa ma se malamalama i le upumoni pe ona o agasala, na latou teena ai perofeta” (MFF 138:32). O se nofoaga le tumau lea o le a aoaoina ai agaga i le talalelei ma maua ai le avanoa e salamo ai ma talia sauniga o le faaolataga, ia o loo faatinoina mo i latou i totonu o malumalu (tagai MFF 138:30–35). O i latou o e talia le talalelei e mafai ona nonofo i le parataiso seia oo i le Toetutu. Pe a uma ona toefaatuina i latou ma faamasinoina, o le a latou maua le tikeri o mamalu ia ua latou agavaa ai. O i latou ua filifili e lē salamo ae e lē o i latou o ni atalii o le malaia, o le a nonofo pea i le falepuipui o agaga seia oo i le faaiuga o le Meleniuma, pe afai o le a faasaolotoina i latou mai seoli ma le faasalaga ma toetutu i le mamalu telesitila (tagai MFF 76:81–85).

Lona lua, o le upu seoli o loo faasino i fafo i le pogisa, o se nofoaga e nofo ai le tiapolo, o ana agelu, ma atalii o le malaia (tagai MFF 29:36–38; 76:28–33). O atalii o le malaia o i latou ia ua “leai se faamagaloga i lenei lalolagi po o le lalolagi a sau—ina ua faafitia le Agaga Paia ina ua uma ona maua, ma faafitia le Atalii e Toatasi na Fanaua e le Tama, ma faasatauroina o ia ia te i latou lava ma faalumaina o ia i luma o tagata” (MFF 76:34–35; tagai foi fuaiupu 31–33, 36–37). O i latou ia o le a le maua se nofoaga i soo se malo o mamalu; mo i latou, o le a tumau ai tulaga o seoli (tagai MFF 76:38; 88:24, 32).