Isi Punaoa
Agaga Paia

Agaga Paia

O le Agaga Paia o le tagata lona tolu lea o le Aiga Atua. O Ia o se peresona agaga, e leai se tino o aano ma ivi (tagai MFF 130:22). E masani lava ona ta’ua o Ia o le Agaga, o le Agaga Paia, o le Agaga o le Atua, o le Agaga o le Alii, po o le Fesoasoani.

Matafaioi a le Agaga Paia

O le Agaga Paia e galulue i le lotogatasi atoatoa ma le Tama Faalelagi ma Iesu Keriso, i le faataunuuina o matafaioi e tele e fesoasoani ai ia te oe ia ola amiotonu ma maua faamanuiaga o le talalelei.

Na te “molimau i le Tama ma le Alo” (2 Nifae 31:18) ma faaalia ma aoaoina “le tonu o mea uma lava” (Moronae 10:5). Ua na o le Agaga Paia lava e mafai ona e maua ai se molimau maumaututu e uiga i le Tama Faalelagi ma Iesu Keriso. O Lana fesootaiga i lou agaga e avatu ai se faamautinoaga e sili atu nai lo se isi lava fesootaiga e mafai ona e maua e ala i ou sane [senses] faanatura.

A o e taumafai e tumau i luga o le ala e tau atu i le ola e faavavau, o le Agaga Paia “na te faaali ia te [oe] mea uma e tatau ona [e] faia“ (tagai 2 Nifae 32:1–5). E mafai ona Ia taitaiina oe i au filifiliga ma puipuia oe mai tulaga matautia faaletino ma le faaleagaga.

O Ia, e mafai ai ona e maua meaalofa a le Agaga mo lou lelei ma le lelei o ē e te alofa ma auauna i ai (tagai MFF 46:9–11).

O Ia o le Fesoasoani (Ioane 14:26). E pei lava o se leo malu o se matua alofa e mafai ona faanaina ai se tagi a se tamaitiiti, o le musumusu a le Agaga e mafai ona faatoamalie ai lou fefe, e faafilemu ai le lē mautonu o popolega o lou olaga, ma faamafanafana oe pe a e faanoanoa. E mafai e le Agaga Paia ona faatumuina oe “i le faamoemoe ma le alofa atoatoa” ma “aoaoina oe i mataupu tau le filemu o le malo“ (Moronae 8:26; MFF 36:2).

O Lona mana, e faapaiaina ai oe pe a e salamo ma maua sauniga o le papatisoga ma le faamauga, ma tumau i le faamaoni i au feagaiga (tagai Mosaea 5:1–6; 3 Nifae 27:20; Mose 6:64–68).

O Ia o le Agaga Paia o le Folafolaga (tagai Efeso 1:13; MFF 132:7, 18–19, 26). I le tulaga lea, Na te faamautuina sauniga o le Perisitua ua e maua ma feagaiga ua uma ona e osia e talia e le Atua. O lenei faamaoniga e faalagolago i lou tumau ai pea i le faamaoni.

O Le Meaalofa a le Agaga Paia

O tagata sailiili faamaoni i le upu moni, e mafai ona latou lagona uunaiga a le Agaga Paia, e taitaiina atu ai i latou ia Iesu Keriso ma Lana talalelei. Ae peitai, o le atoatoaga o faamanuiaga e tuuina atu e ala i le Agaga Paia, e avanoa mo na o i latou o e ua maua le meaalofa a le Agaga Paia ma tumau i le agavaa.

Ina ua uma ona e papatiso i totonu o le Ekalesia a Iesu Keriso o le Au Paia o Aso e Gata Ai, e toatasi pe sili atu nisi e umia le Perisitua Mekisateko na faaee o latou lima i luga o lou ulu ma, i se sauniga paia o le perisitua, na faamauina ai oe o se tagata o le Ekalesia. O se vaega o lenei sauniga, ua ta’ua o le faamauga, na tuuina atu ai ia te oe le meaalofa a le Agaga Paia.

O le meaalofa a le Agaga Paia e ese mai aafiaga a le Agaga Paia. Ae le i faia lou papatisoga, na mafai ona e lagonaina uunaiga a le Agaga Paia mai lea taimi i lea taimi, ma e ala i lena uunaiga e mafai ai ona e maua se molimau o le upu moni. O le taimi nei ua e maua le meaalofa a le Agaga Paia, ua e maua le aia tatau mo le mafutaga faifai pea a lea sui lona tolu o le Aiga Atua pe afai e te tausia poloaiga.

O le atoatoaga o le olioli i le meaalofa a le Agaga Paia e aofia ai le mauaina o faaaliga ma faamafanafanaga, auauna ma faamanuia isi e ala i meaalofa faaleagaga, ma faamamaina mai agasala ma faaagavaa mo le faaeaga i le malo selesitila. O nei faamanuiaga e faalagolago i lou agavaa; e auauai mai i lea taimi ma lea taimi a o e sauniuni mo ia faamanuiaga. Ao taitaiina mai lou olaga ia o gatasi ma le finagalo o le Atua, o le a e maua malie le Agaga Paia i se laasaga sili. Na faailoa mai e le Perofeta o Iosefa Samita o mea lilo o le malo o le Atua “na ona vaaia ma malamalama i ai i le mana o le Agaga Paia, e tuuina atu e le Atua i e alolofa ia te ia, ma faamamaina i latou lava i ona luma“ (tagai MFF 76:114–116).

Ia manatua “e le afio le Agaga o le Atua i malumalu e le paia “ (Helamana 4:24). E ui lava ua e mauaina le meaalofa a le Agaga Paia, ae o le a mafuta pea le Agaga ma oe pe afai e te tausia poloaiga. O le a alu ese mai o Ia pe afai e te faamaina o ia e ala i gagana masoa ma le palauvale, o mea eleelea, lē usiusitai, tetee, po o isi agasala. Ia tausia oe ia mama. Ia faatumuina lou olaga i le lelei ina ia mafai ona e agavaa mo le mafutaga faifai pea ma le Agaga Paia.