Meleniuma

O le Meleniuma o se vaitau e 1,000 tausaga. Pe a tatou talanoa e uiga i le “Meleniuma,” tatou te talanoa agai i le 1,000 tausaga e mulimuli mai i le Afio Faalua mai o le Alii (tagai Faaaliga 20:4; MFF 29:11). I le taimi o le Meleniuma, “o le a nofo tupu lava Keriso i le lalolagi” (Mataupu Faavae o le Faatuatua 1:10).

O le Meleniuma o le a avea ma se taimi o le amiotonu ma le filemu i luga o le fogaeleele. Ua faaali mai e le Alii e faapea “O lena foi aso o le a faaiuina ai le feitagai o tagata ma le feitagai o manu, ioe le feitagai o tino aano uma” (MFF 101:26; Tagai foi i le Isaia 11:6–9). O Satani o le a “fusifusia ina ia le toe avanoa ia te ia loto o le fanau a tagata” (MFF 45:55; Tagai foi i le Faaaliga 20:1–3).

I le taimi o le Meleniuma, o tagata uma i luga o le fogaeleele o le a lelei ma amiotonu, peitai e toatele o le a le mauaina le atoatoa o le talalelei. O le mea lea, o le a auai ai tagata o le Ekalesia i le galuega faafaifeautalai.

O le a auai foi tagata o le Ekalesia i galuega faalemalumalusa i le taimi o le Meleniuma. O le a faaauau pea ona fausia e le Au Paia malumalu ma maua sauniga mo o latou tuaa ua maliliu. A o ta’ita’i i latou i faaaliga, o le a latou saunia faamaumauga o o latou tuaa e tau lava i tua ia Atamu ma Eva.

O le a faaauau ai pea le amiotonu atoatoa ma le filemu seia oo i le faaiuga o le 1,000 tausaga, i le taimi o le a toe “tatalaina ai [Satani] mo ni nai aso puupuu, ina ia faapotopoto faatasi e ia ana au.” O le a tau le au a Satani ma le au sili i le lagi, lea o le a taitaiina e Mekaeli, po o Atamu. O le a faatoilaloina Satani ma i latou e mulimuli ia te ia ma o le a lafoaiina i latou e faavavau. (Tagai MFF 88:111–115.)