Molimau
O se molimau o se faamautinoaga faaleagaga e aumaia e le Agaga Paia. O le faavae o se molimau o le malamalamaaga lea o loo soifua le Tama Faalelagi ma e alofa ia i tatou; o loo soifua Iesu Keriso, o Ia o le Alo o le Atua, ma sa Ia faia le Togiola e le iu; o Iosefa Samita o se perofeta a le Atua o le na valaauina e toefuatai mai le talalelei; o loo taitaiina i tatou e se perofeta soifua i aso nei; o le Ekalesia a Iesu Keriso o le Au Paia o Aso e Gata Ai o se Ekalesia moni a le Faaola i luga o le fogaeleele. Faatasi ai ma lenei faavae, o le a tupu ai se molimau ma aofia uma ai mataupu faavae o le talalelei.
Mauaina ma le Faamalosiaina o se Molimau
I le avea ai ma se tagata o le Ekalesia a Iesu Keriso o le Au Paia o Aso e Gata Ai, o loo ia te oe se avanoa ma se tiutetauave paia e mauaina ai sau lava molimau. Pe a mauaina se molimau, ua ia te oe le tiute e galueaiina ai i le gasologa o lou olaga. O lou fiafia i lenei olaga ma le olaga e tau atu i le faavavau e faalagolago lea pe e te “toa i le molimau ia Iesu” (MFF 76:79; Tagai foi i le fuaiupu 51, 74, 101). Ao e galue ai i lenei faagasologa, ia manatua mataupu faavae nei:
O le sailiga mo se molimau e amata i se manaoga faamaoni amiotonu. O le a faamanuiaina oe e lou Tama Faalelagi e tusa ai ma manaoga amiotonu o lou loto ma au taumafaiga e faia Lona finagalo. Ao ia talanoa atu i se vaega o tagata e lei mauaina ni molimau o le talalelei, na aoao atu ai Alema: “Afai tou te ala mai, ma fagua o outou mafaufau e oo i le tofotofo i a’u upu, ma faaaoga sina faatuatua itiiti lava; ioe, afai tou te le mafaia se mea e sili i le manao i le fia faatuatua, ina tuu ia lenei manao e galue i totonu ia te outou, seia lava lo outou faatuatua e talia ai nisi o a’u upu” (Alema 32:27).
O le molimau e oo mai e ala i uunaiga filemu a le Agaga Paia. O taunuuga o se molimau e mafai ona avea o se vavega ma suia ai le olaga, peitai o le meaalofa o se molimau e masani lava ona oo mai o se faamautinoaga filemu, e aunoa ma le faaaliga ofoofogia o le mana o le Atua. E oo lava ia Alema, o le na asiasi mai i ai se agelu ma vaai foi i le Atua o nofo i lona nofoalii, na manaomia foi ona anapogi ma tatalo ina ia mafai ona ia mauaina se molimau e ala mai le mana o le Agaga Paia (tagai Alema 5:45–46; 36:8, 22).
O lau molimau o le a faasolosolo lava ona tupu e ala mai i ou aafiaga. E leai se tasi e na te mauaina se molimau atoatoa i se taimi se tasi. O le a tupu ma malosi lau molimau e ala mai i ou aafiaga. O le a faalauteleina a o e faaalia le naunautai e auauna i totonu o le Ekalesia, i soo se mea lava e valaauina ai oe. O le a faateleina a o e faia filifiliga ina ia tausia poloaiga. A o e siitia ma faamalosiau atu i isi, o le a e vaaia lau molimau ua faaauau pea ona tupu. A o e tatalo ma anapogi, suesue i tusitusiga paia, auai i sauniga a le Ekalesia, ma faalogo atu i isi o fetufaai mai a latou molimau, o le a faamanuiaina oe i taimi o musumusuga lea o le a faamausaliina ai lau molimau. O na taimi o le a oo mai i lou olaga a o e tauivi e ola i le talalelei.
O le a faatupuina lau molimau pe a e fetufaai atu. Aua e te faatali mo lau molimau sei atoatoa ona atiina ae ona faatoa e faasoaina atu lea. O le vaega o le atiina ae o se molimau e maua pe a fetufaai atu. O le mea moni, o le a e iloaina pe a e tufaina atu le vaega ua ia te oe o lau molimau, o le a toe foi mai ia te oe—faatasi ai ma se faaopoopoga.
Fetufaaiina atu o le Molimau
I Aso Sa anapogi ma sauniga molimau ma taimi o talanoaga e te faia ma tagata o lou aiga ma uo, e ono uunaia ai oe e fetufaai atu lau molimau. I lena taimi, ia manatua e te le tau manaomia ona e tau fai atu se lauga musuia. O le a matua sili ona i ai le mana i lau molimau pe a e tuuina atu i se tulaga puupuu, faamaoni, ma mautinoa e uiga i le Faaola, o Ana aoaoga, ma le Toefuataiina. Tatalo mo le taitaiga, ma o le a fesoasoani le Agaga ia te oe e te iloa ai pe faapefea ona faailoa atu lagona i totonu o lou loto. O le a e maua le fiafia sili a o e fesoasoani atu i isi e fetufaai le faamoemoe ma le mautinoa ua tuuina mai ia te oe e le Alii.