Isi Punaoa
Tulafono e Sefulu

Tulafono e Sefulu

O Tulafono e Sefulu o mataupu faavae e faavavau ia o le talalelei e tatau mo lo tatou faaeaga. Na faaali atu e le Alii ia Mose i aso anamua (tagai Esoto 20:1–17), ma Ia toe taua foi i latou i faaaliga o aso e gata ai (tagai MFF 42:18–29; 59:5–13; 63:61–62). O Tulafono e Sefulu o se vaega taua o le talalelei. O le usitaia o nei poloaiga e faataatia ai le ala e usiusitai ai i isi mataupu faavae o le talalelei.

O vaaiga nei i Tulafono e Sefulu o loo aofia ai faamatalaga otooto i le ala e faaauau ai pea ona faatatau i o tatou olaga i aso nei:

  1. “Aua nei e fai mo oe ni atua ese i ou luma” (Esoto 20:3). E tatau ona tatou faia “mea uma i le manatu tasi i le mamalu o le Atua” (MFF 82:19). E ao ona tatou alolofa i le Alii ma o tatou loto atoa, ma o tatou manatu, mafaufau, ma o tatou malosi atoa (tagai Teuteronome 6:5; MFF 59:5).

  2. “Aua e te fai mo oe se tupua ua ta” (Esoto 20:4). I lenei poloaiga, ua tausalaina ai e le Alii le tapuai atu i tupua. O le ifo i tupua e ono tele ni ona vaega. O nisi tagata latou te le ifo i ni tupua ua ta ma ni faatagata peitai ua latou suitulaga le Atua soifua i isi tupua, e pei o tupe, ma meatotino, manatu, po o latou tulaga. I o latou olaga, “o latou oa o atua ia te i latou”—ma o atua e “fano faatasi ma i latou” (2 Nifae 9:30).

  3. “Aua e te tau fua le suafa o Ieova lou Atua” (Esoto 20:7). Mo se faamatalaga i lenei tulafono, tagai “Gagana Masoa,” itulau 75.

  4. “Ia e manatua le aso sapati e te faapaiaina” (Esoto 20:8). Mo se faamatalaga i lenei tulafono, tagai “Sapati,” itulau 151–152.

  5. “Ia e ava i lou tama ma lou tina” (Esoto 20:12). O le poloaiga lenei e faatumauina pea e tusa lava pe ua tatou matutua. E tatau lava ona tatou sailia e le aunoa auala e faamamaluina ai o tatou matua.

  6. “Aua e te fasioti tagata” (Esoto 20:13). Mo se faamatalaga pe faapefea ona faatatau lenei tulafono ia i latou o e tatau ona o atu i taua, tagai “Taua,” itulau 172–173.

  7. “Aua e te mulilua” (Esoto 20:14). I se faaaliga o aso e gata ai, na tausalaina ai e le Alii e le gata i le mulilua, ae o “soo se mea lava faapena” (MFF 59:6). O sootaga feusuai ae lei faaipoipo, faiga faatauatane ma faatauafafine, ma isi agasala tau feusuai o le solia na o le tulafono e fitu. Mo nisi faamatalga faaopoopo, tagai “Legavia,” itulau 87–92.

  8. “Aua e te gaoi” (Esoto 20:15). O le gaoi o se tulaga o le le faamaoni. Mo se faamatalaga i le faamaoni, tagai itulau 49–50.

  9. “Aua e te molimau pepelo i le lua te tuaoi” (Esoto 20:16). O le tuuina atu o se molimau pepelo o se tasi foi lea tulaga o le le faamaoni. Mo se faamatalaga i le faamaoni, tagai itulau 49–50.

  10. “Aua e te manao” (Esoto 20:17). O le manao, po o le matapeapea foi i se mea e patino i le isi tagata, e faaleagaina ai le agaga. E mafai ona faaleagaina ai o tatou mafaufau ma fetuuina ai i tatou i lagona faifai pea o le le fiafia ma le le faamalieina. E masani ona tau atu i isi agasala ma nofo aitalafu ai i mea tau tupe.

E ui o le tele o Tulafono e Sefulu o loo lisi mai ai mea e le tatau ona tatou faia, o loo faapena foi ona faaalia ai mea e tatau ona tatou faia. Na aoteleina e le Faaola ia Tulafono e Sefulu i mataupu faavae e lua—alofa mo le Alii ma le alofa mo tatou uso a tagata:

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).