Aoaoina Atu o le Talalelei
Ua fetalai mai le Alii: “Ou te tuuina atu foi ia te outou le poloaiga ia outou aoao le tasi i le tasi i mataupu o le malo. Ia outou aoao atu ma le filifiliga, ma o lo’u alofa tunoa o le a mafuta ma outou, ina ia aoaoina atoatoa lelei outou i teori, mataupu autu, mataupu faavae, i le tulafono o le talalelei, ma mea uma lava tau le malo o le Atua, e tatau mo outou ona malamalama ai” (MFF 88:77–78).
I le tuuina mai o lenei poloaiga, ua tuuina mai ai e le Alii ia i tatou se tiutetauave paia. Ua faapea foi ona ia taitaiina i tatou i avanoa e le mafaitaulia mo auaunaga. E itiiti lava aafiaga e faatusatusa atu i le olioli e maua i le fesoasoani atu i isi e aoao ma ola i le talalelei.
O lenei poloaiga e aoao atu ua faatatau ia te oe, e tusa lava pe le o ia te oe se valaauga patino o se faiaoga. O loo ia te oe avanoa faafaiaoga i le avea ai ma se tagata o lou aiga, o se faiaoga o aiga poo se faiaoga asiasi, ma e tusa foi pe o se isi tagata faigaluega, tuaoi, ma se uo. O nisi taimi e te aoao atu ai e ala i upu ua e saunia e tuuina atu. O nisi taimi e mafai ona e faaaogaina ni taimi pupuu e le tau fuafuaina e mafai ai ona e fetufaai atu upumoni o le talalelei. Ae o le mea masani lava o lou aoao atu lea e ala i faataitaiga.
Aoao atu e Faapei ona Aoao le Faaola
I au taumafaiga e aoao atu le talalelei, ia vaai atu ia Iesu Keriso o sou faataitaiga. Suesue i tala o Lana galuega i le lalolagi, ma vaavaai mo auala e aoao atu ai e pei ona Ia aoao atu. Sa Ia faailoa atu le alofa moni ma le popole mo i latou na Ia auauna atu i ai. Sa ia faamalosiau atu i tagata taitoatasi, i le aoaoina atu o mataupu faavae i se auala na fesoasoani atu ai ia i latou i o latou manaoga patino. Na ia faaosofia le manao o nisi ia malamalama ma ola i le talalelei. E i ai taimi na Ia fesili atu ai fesili na mafai ona fesoasoani ia i latou ia faaaogaina mea na latou aoaoina. Sa Ia aoao atu upu moni faaola o le talalelei, ma Ia fesoasoani atu i e na faalogologo ina ia malamalama i mea na latou manaomia ona iloa, faia, ma avea ai i latou, ina ia latou maua ai le ola e faavavau.
A e mulimuli i le faataitaiga a le Faaola, o le a mafai e au aoaoga ona fafagaina ma siitia, fausia lo latou faatuatua, ma tuuina atu ai ia te i latou le loto mautinoa e faafetaiaia ai luitau o le olaga. O le a uunaia ai i latou e lafoai agasala ma usiusitai i poloaiga. O le a fesoasoani ia i latou e o mai ia Keriso ma tumau ai i Lona alofa.
Aoao atu e ala i le Agaga
Na fetalai mai le Alii, “O le a tuuina atu foi le Agaga ia te outou i le tatalo i le faatuatua; a e afai tou te le maua le Agaga aua tou te aoao atu” (MFF 42:14). O le Agaga, po o le Agaga Paia, o se tasi o le Aiga Atua. O le isi faamoemoega o le Agaga o le a “iloa ai le tonu i mea uma lava” (Moronae 10:4–5). E na o le uunaiga lava a le Agaga o le a mafai ai ona malamalama ma musuia aoaoga a le talalelei.
O lou avanoa i le avea ai ma se faiaoga o le talalelei o le avea lea ma se meafaigaluega e mafai ai e le Agaga Paia ona aoao atu, molimau, faamafanafana, ma musuia. E pei ona aoao mai le perofeta o Nifae, “Pe a tautala atu le tagata i le mana o le Agaga Paia, e moliooina ai i le mana o le Agaga Paia i loto o le fanauga a tagata” (2 Nifae 33:1).
Afai e te saunia faaleagaga, o le a fesoasoani le Agaga Paia e te iloa ai le mea e fai ma talanoa atu ai i lau aoaoga. E mafai ona e saunia e ala i le tatalo soo, suesue i tusitusiga paia, ola i le talalelei, ma ia lotomaualalo.
Auala e Aoao atu Ai
O le a matua sili ona lelei ona e aoao atu pe a faaaogaina metotia eseese talafeagai e aoao atu ai. Mo se faataitaiga, e mafai ona e faamatala tala ma tuuina atu faataitaiga e aumaia ai lagona o tagata ma faailoa atu ai pe faapefea ona faaaoga mataupu faavae o le talalelei i le olaga i aso uma. E mafai ona e faaaogaina ata ma meafaitino e faamalosia ai le malamalama o isi i tala i tusitusiga paia ma mataupu faavae. E mafai e oe ma i latou o loo e aoaoina ona valaauliaina le uunaiga a le Agaga Paia e ala i musika ma faailoa atu ai lagona ia atonu e faigata ona faailoa atu i isi auala. E mafai ona e fesili atu i fesili e uunaia ai le aoaoina o manatu ma talanoaga lena e taitaiina atu ai i le fetufaai o aafiaga faaletagata lava ia. Faatasi ai ma gaoioiga faigofie, e mafai ona e fesoasoani atu i e o loo aoao ina ia gauai mai o latou mafaufau.
Pe a e mafaufau e faaaoga se metotia faapitoa e aoao atu ai, ia fesili ifo ia te oe i fesili nei: Pe o lenei metotia e valaaulia ai uunaiga a le Agaga? Pe e talafeagai ma le paia o mataupu faavae o loo ou aoaoina atu? Pe o le a siitia ma faamalosia ai i latou o loo ou aoaoina?
Ia manatua o le avea ai ma se faiaoga o le talalelei, ua avea oe ma sui o le Alii. Ia mautinoa o mea uma e te faia ma tautala atu ai e faaaloalo ma ogatasi ma Lona finagalo.
Mo manatu faaopoopo i le aoaoina atu o le talalelei, tagai O Le Aoao Atu, E Leai se Isi Vaalauga e Sili Ai (36123 890); o le Tusitaiala Faafaiaoga (34595 890); ma le “Aoaoina Atu o le Talalelei ma le Taitaiga,” vaega 16 o le Tusitaulima o Faatonuga a le Ekalesia, Tusi 2: Taitai o le Perisitua ma Ausilali (35903 890).