Galuega o Talafaasolopito o Aiga ma Gafa

I le aso 3 o Aperila, 1836, na asiasi mai ai le perofeta o Elia ia Iosefa Samita ma Oliva Kaotui i totonu o le Malumalu i Katelani. Na ia tuuina atu ia te i laua le mana faamau o le Perisitua, ina ia mafai ai e aiga ona faamauina mo augatupulaga uma. I le tuuina atu o lenei mana, ua faataunuuina ai le valoaga o le a auina mai e le Alii o ia “e faaliliu loto o matua i fanau ma loto o fanau i o latou matua“ (tagai MFF 110:14–16; tagai foi Malaki 4:5–6).

O galuega o talafaasolopito o aiga, e mafai ai ona e auai i le faaauauina o le faataunuuina o lenei valoaga. E mafai ona e aoao e uiga i ou tuaa ma faateleina lou alofa ia i latou. E mafai ona musuia oe i tala e uiga i lo latou lotototoa ma le faatuatua. E mafai ona e tuufaasolo atu lena measina i au fanau.

O faamanuiaga tumau nei e maua mai galuega o talafaasolopito o aiga, ae e le o mafuaaga autu ia mo taumafaiga e tele a le Ekalesia e faaputuputu mai faamaumauga tau gafa. O taumafaiga uma a talafaasolopito o aiga a le Ekalesia e taulai atu i le faia o se “sootaga … i le va o tama ma fanau“ (MFF 128:18). O lenei sootaga o loo fausia e ala i le mana o le Perisitua, e ala i sauniga paia o le malumalu ua tatou maua e fai ma sui o o tatou augatama.

Faaolaina o e Maliliu

O le toatele o fanau a le Tama Faalelagi ua maliliu e aunoa ma le mauaina o le avanoa e maua ai le atoatoa o le talalelei. I Lona alofa mutimutivale ma le lē i’u, na saunia ai e le Alii se ala mo i tatou e maua ai se molimau o le talalelei ma maua ai sauniga faaola o le perisitua.

I le lalolagi o agaga, o loo “talai atu ai le talalelei ia i latou o e na oti i le solitulafono, e aunoa ma se malamalama i le upu moni, pe ona o agasala, na latou teena ai perofeta. Sa aoaoina i latou ia i le faatuatua i le Atua, o le salamo mai agasala, o le faia o papatisoga sui mo e ua oti mo le faamagaloina o agasala, o le mea foai fua o le Agaga Paia i le faaee atu o lima, faapea ma isi mataupu faavae uma o le talalelei sa tatau ona latou iloa ina ia agavaa ai i latou ma faamasinoina ai le tino i la tagata, ae ola ai i le agaga i la le Atua“ (MFF 138:32–34).

O le toatele i le lalolagi o agaga ua talia le talalelei. Ae peitai, e le mafai ona latou maua sauniga o le Perisitua mo i latou lava aua e leai ni o latou tino faitino. I totonu o malumalu paia, ua tatou maua ai le faamanuiaga o le taliaina lea o sauniga e fai ma sui mo i latou. O nei sauniga e aofia ai le papatisoga, faamauga, faauuina i le Perisitua Mekisateko (mo alii), o faaeega paia, o le faamauina o faaipoipoga, ma le faamauina o fanau i matua. Na faaalia e le Alii lenei galuega i le Perofeta o Iosefa Samita, i le toefuataiina o se faiga sa faaali atu i le au Kerisiano i sina taimi puupuu talu ona mavae le Toetu o Iesu Keriso (tagai 1 Korinito 15:29).

A o e mauaina sauniga o le Perisitua e fai ma sui o e ua maliliu, ua avea oe ma faaola i luga o le Mauga o Siona mo i latou (tagai Opetaia 1:21). O au taumafaiga ua faapei lava o le agaga o le taulaga togiola a le Faaola—ua e faataunuuina se galuega mo isi ia e lē mafai ona latou faia mo i latou lava.

O Ou Tiutetauave i Galuega o Talafaasolopito o Aiga

I galuega o talafaasolopito o aiga, e tolu ou tiutetauave autu:

Ia e mauaina sauniga o le malumalu mo oe lava ma fesoasoani i tagata o lou aiga patino ia latou maua foi ia sauniga.
Ia e umia se pepa faataga aoga o le malumalu ma alu soo i le malumalu e tusa ma avanoa uma e maua.
Ia faaputuputu faamatalaga o talafaasolopito o aiga ina ia mafai ona maua e ou augatuaa faamanuiaga o le malumalu.

E mafai ona e auai i le malumalu ma le faatinoina o galuega o talafaasolopito o aiga, i se vaega, e le afaina po o fea e te nofo ai ae po o le a foi lou tulaga. Atonu e le mafai ona e faia mea uma, ae e mafai ona e faia se vaega. E mafai ona fesoasoani manatu nei ia te oe e amata ai:

Tusi faamaumau faamatalaga taua e uiga i lou lava olaga. Faamau lou aso fanau ma le nofoaga na e fanau ai ma le aso na papatiso ma faamauina ai oe. Tausia se talaaga o lou olaga e faamaumau ai mea taua o lou olaga, e aofia ai poto masani patino e mafai ona faamalolosia ai lau fanau ma isi tupulaga i le lumanai.
Aoao e uiga i ou augatama. Ia amata i le tusitusia o faamatalaga o loo e manatua ma mai risosi e mafai ona e faitau ai i le aiga. Ia tusitusia faamatalaga taua e te manatua lelei pe mafai foi ona e maua e uiga i fanau, matua, tuagane o tina po o uso o tama, tuafafine o tama po o uso o tina, matua o matua, ma matua o matua o matua. Afai e mafai, ia fai ni kopi o aso fanau po o isi faamaumauga e maua mai ai nei faamatalaga. A’o e aoina faamatalaga e tele, atonu e mafai ona e sailia isi nofoaga e pei o faamaumauga faalemalo. I uarota ma paranesi e i ai se sui faufautua o talafaasolopito o aiga e mafai ona fesoasoani ia te oe. Atonu e te manao foi e asia le tuatusi faavaomalo i le Initoneti o talafaasolopito o aiga, www.familysearch.org.
A’o e mauaina ou augatuaa, faaaoga pepa o faasologa o gafa ma pepa o faamatalaga o aiga e faamaumau ai faamatalaga ua e maua. O loo maua ni kopi o nei pepa o faamatalaga ma o loo i ai foi i polokalama faakomepiuta a le Ekalesia, e pei o le Personal Ancestral File.

Pe a e aoina faamatalaga talafeagai e uiga i ou augatuaa o ē ua maliliu ae latou te le’i taliaina le Talalelei, ia mautinoa ua faia galuega faalemalumalu sa mo i latou. E tusa lava pe e te le nofo latalata i se malumalu e mafai ai e oe ma tagata o lou aiga ona faia sauniga, e mafai ona e tuuina atu igoa o ou augatuaa i se malumalu ina ia mafai ai e isi ona faia ia galuega mo i latou. E mafai ona e asiasi i se ofisa o talafaasolopito o aiga pe fesootai i se faatonu o mataupu tau talafaasolopito o aiga o le uarota po o le paranesi e iloa ai le mea e tatau ona fai.

Na faaali mai e le Perofeta o Iosefa Samita o “mataupu faavae e uiga i e ua oti ma e o ola e le mafai lava ona ta’u faatauvaaina, e tusa ma lo latou faaolataga. Aua o lo latou faaolataga e tatau ma aoga i lo tatou faaolataga, e pei… a aunoa ma i tatou e le mafai ona faaatoatoaina lelei i latou—e faapea foi i tatou pe a aunoa ma o tatou tagata oti, e le faaatoatoaina“ (MFF 128:15). O lou auai e faatino galuega o talafaasolopito o aiga, e mafai ai e oe ma ou augatuaa ona agai atu i luma i le faaolataga.